ខេត្តបន្ទាយមានជ័យ ៖ ស្ត្រីម្នាក់ត្រូវគេប្រទះឃើញ ទូលបន្លែលក់ចិញ្ចឹមកូនប្រុសស្រី៣នាក់ ខណៈបុរសជាប្តីទៅប្រទេសថៃ បាត់ដំណឹងសូន្យឈឹងកន្លះឆ្នាំមកហើយ ។ នាងនិងកូនរស់នៅ ក្រោមដំបូលកៅស៊ូតង់ ដោយសុំដីគេជ្រកកោនគួរឲ្យសង្វេគ ។ កន្លែងស្នាក់នៅគ្រាន់ នឹងរស់ឃើញពន្លឺថ្ងៃនេះ នៅក្នុងភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត ។
ស្ត្រីខាងលើឈ្មោះ ធិន ធី អាយុ២៨ឆ្នាំ មកពីខេត្តកំពង់ចាម មានកូនប្រុសស្រី៣នាក់ ដោយកូនប្រុសច្បងអាយុ៥ឆ្នាំ ពិការជើងស្តាំ ខណៈដើរដួលបាក់កជើង និងកូនស្រីពៅពុំទាន់ផ្តាច់ដោះនៅឡើយ ។ ជួបស្ត្រីកម្សត់នេះតាមដងផ្លូវ មើលទៅគួរឲ្យអាណិតពេកណាស់ លក់បន្លែមិនដាច់អង្គុយ លើចិញ្ចើមផ្លូវ កូនក៏យំទារបៅថែមទៀត ។
ជួបសម្ភាសន៍ផ្ទាល់ ដល់កន្លែងស្នាក់នៅ នាងប្រាប់ថា ប្តីនាងបានចាកចេញទៅប្រទេសថៃ តាំងពីកូនស្រីពៅទើប កើតបានអាយុ១ខែកន្លះ រហូតមកដល់ពេលនេះបាត់ដំណឹងសូន្យឈឹង មិនដែលទទួលដំណឹងពីប្តីឡើយ ។
នាងរៀបរាប់ពីជីវិតពិតថា ការចិញ្ចឹមកូនប្រុសស្រីទាំង ៣នាក់តូចៗនេះពិតជាពិបាកណាស់ គឺក្នុងរដូវវស្សានាងផ្ញើកូនគេ ហើយចូលទៅទឹកដីថៃ ដើរបេះបន្លែលក់ ។ លុះដល់រដូវប្រាំងគ្មានបន្លែ បេះនាងទិញពីផ្សារយកមកទូលលក់ ដើម្បីបន្តរបរដោះស្រាយជីវភាព ។
យ៉ាងណាក៏ដោយ នៅព្រឹកថ្ងៃទី២១ កុម្ភៈ មន្ត្រីការិយាល័យ សង្គមកិច្ចក្រុងប៉ោយប៉ែត និងអង្គការក្តីស្រឡាញ់ គ្មានព្រំដែនហៅកាត់ថា (LWB) បានទៅជួបគ្រួសារកម្សត់នេះជាមួយនឹងភ្នាក់ងារកោះសន្តិភាព ។ បុគ្គលិកអង្គការខាងលើនិយាយថា និងយកកុមារពិការនៃគ្រួសារក្រីក្រមួយនេះ ទៅព្យាបាលជើងឲ្យត្រង់ ដូចដើមក្នុងពេលឆាប់ខាងមុខ ។ ព្រោះដួលទៅកាច់ជើងវៀច អត់បានយកទៅព្យាបាលទេ ។ ដល់ជាទៅជើងក៏វៀចឆ្អឹង ។ គ្រួសារក្រីក្រមួយនេះ អំពាវនាវសុំសប្បុរសជន ក្នុងនិងក្រៅប្រទេសមេត្តាជួយផ្តល់តាមសទ្ធាផង ។
ជួបគ្រួសារក្រីក្រមួយទៀត ក៏ពិបាកភ្នែកដែរដោយឡែក គ្រួសារមួយទៀត មានកូនប្រុសស្រីក្នុងបន្ទុក៥នាក់ សរុបចំនួន៧នាក់ ទាំងឪពុកម្តាយជាគ្រួសារក្រីក្រ គ្មានមុខរបរនាំគ្នាឆ្លងព្រំដែនខុសច្បាប់ ទៅរកបេះបន្លែលើទឹកដីថៃ ព្រឹកវិលល្ងាចដូចគ្រួសារខាងលើ ។ គ្រួសារមួយនេះសុំដីគេ រស់នៅក្រោមដើមអំពិលទឹក មានគ្រែ២តូចៗ ដំបូលប្រក់កៅស៊ូតង់ មិនដឹងថាដេកពួន យ៉ាងម៉េចអស់គ្នានោះទេ ។
បុរសជាប្តីឈ្មោះ គៀន ថុល អាយុ៥៤ឆ្នាំ ប្រពន្ធឈ្មោះ អ៊ូ ម៉ារី អាយុ៤៩ឆ្នាំ កូនក្នុងបន្ទុក៥នាក់ ប្រុស៤នាក់ ស្រីម្នាក់ ។ គ្រួសារមួយនេះនិយាយថា ក្រៅពីមុខរបរដើរបេះបន្លែលើទឹកដីថៃយកមកលក់ គឺគ្មានមុខរបរអ្វីផ្សេងឡើយ ព្រោះគ្មានដើមទុនរកស៊ី ។ ពួកគាត់ថា ចង់ចូលទៅផ្សាររុងក្លឿ ដើម្បីរកមុខរបរស្របច្បាប់ដែរ តែគ្មានប្រាក់ធ្វើកាតចេញចូលទឹកដីថៃ (Immigration Card) ។
ជាចុងក្រោយគ្រួសារមួយនេះ និយាយថា ពួកគាត់មិនចង់ឆ្លងដែនខុសច្បាប់ទេហើយបានសំណូមពរសុំអាជ្ញាធរ និងសមត្ថកិច្ចនៅច្រកទ្វារ ព្រំដែនអន្តរជាតិប៉ោយប៉ែត ជួយសម្រួលយ៉ាងណាឲ្យពួកគាត់ និងកូនៗបានធ្វើកាត ចេញចូលផ្សាររុងក្លឿ ដើម្បីរករបរណាដែលស្របច្បាប់វិញ បើទោះជាស៊ីឈ្នួលអូសរទេះក៏ដោយ ៕
ប្រភព៖ កោះសន្តិភាព
ដោយឡែក ព័ត៌មានចាប់អារម្មណ៍មួយផ្សេងទៀត៖
ស្រីស្អាតជិះម៉ូតូខ្លាចឆ្កែខាំជើង ជ្រុលទៅបុកប៉ូលិស
ខេត្តស្វាយរៀង ៖ ហេតុការណ៍គ្រោះថ្នាក់ចរាចរណ៍មួយ កើតឡើងរវាងម៉ូតូបុកជាមួយម៉ូតូ បណ្តាលឱ្យមន្ត្រីនគបាលម្នាក់រងរបួសស្រាល ខណៈមានឆ្កែមួយក្បាលបានដេញខាំជនរងគ្រោះជិះម៉ូតូនោះ កើតឡើងកាលពីវេលាម៉ោង០៧ និង៤០នាទីព្រឹកថ្ងៃទី២២កុម្ភៈ ស្ថិតនៅចំណុចផ្លូវបំបែកជាបី លើផ្លូវលេខ២០៤ ក្នុងភូមិមេភ្លើង សង្កាត់ស្វាយរៀង ក្រុងស្វាយរៀង ។
ប្រភពឱ្យដឹងថា ជនរងគ្រោះទាំងសងខាង មិនត្រូវស្គាល់ឈ្មោះនោះទេ តែគេឃើញនារីដែលជិះម៉ូតូបង្ក បានលើកដៃសំពះសុំទោសដល់ជនរងគ្រោះដែលរងរបួសថា «នាងសុំទោសការជ្រុលមកបុកនេះ គឺដោយសារតែឆ្កែដេញខាំជើង ទើបនាងភ័យ ក៏ខំប្រឹងលើកជើងឱ្យផុតដាក់លើម៉ូតូ ។ ពេលងាកមកដល់ផ្លូវបំបែក វ៉ាក់ជាមួយម៉ូតូមន្ត្រីនគបាលរងគ្រោះ ក៏ចាប់ហ្វ្រាំងដៃ ទើបបណ្តាលឲ្យវេចង្កូតទៅបុកម៉ូតូដួលទាំងអស់គ្នាតែម្តង បណ្តាលឲ្យរងរបួសដៃស្តាំ និងរលាត់ជើងស្តាំដំណំដែរ ងើបមិនរួចរហូតមានគេមកជួយលើក ទើបឡើងរួច ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
