(ក្រចេះ)៖ មន្រ្តីនគរបាលម្នាក់ ត្រូវខ្សែភ្លើងឆក់ស្លាប់ នៅនិងកន្លែងកើតហេតុ ខណៈដែលជនរងគ្រោះ ឡើងចងខ្សែនៅប៉ាណូដី​សម្បទានមួយកន្លែង នៅចំណុចឃុំចំបក ស្រុកព្រែកប្រសព្វ ខេត្តក្រចេះ កាលពីវេលាម៉ោង៥ល្ងាចថ្ងៃទី២០ ខែកុម្ភៈ ឆ្នាំ២០១៧។

នគរបាលប៉ុស្ដិ៍ចំបក់ បានឲ្យដឹងថា ជនរងគ្រោះខាងលើនេះ បានត្រូវខ្សែភ្លើងឆក់ស្លាប់ បណ្ដាលមកពីឡើងលើផ្លាក​ប៉ាណូដីសម្បទានសង្គមកិច្ច ចងដែកដែលធ្លាក់រហែក ហើយជនរងគ្រោះ ឃើញដែកទីបដែលជាប់លើប៉ាណូ ក៏លើកទាញបំរុងទំលាក់ចុះមកក្រោម តែត្រូវប៉ះខ្សែកាបបណ្ដាលជនរងគ្រោះ ឆក់ធ្លាក់មកដីស្លាប់តែម្ដង។

លោកនាយប៉ុស្តិ៍នគរបាលរដ្ឋបាលចំបក់ បានបញ្ជាក់ថែមទៀតថា ជនរងគ្រោះជាមន្រ្តីនគរបាលប៉ុស្តិ៍ចំបក ដែលត្រូវភ្លើងឆក់​ស្លាប់នោះ ឈ្មោះ ឈី ចាប អាយុ៤៨ឆ្នាំ​ រស់នៅឃុំបំបក់ ស្រុកព្រែកប្រសព្វ ខេត្តក្រចេះ។ បច្ចុប្បន្នសពជនរងគ្រោះ​ប្រគល់ក្រុមគ្រួសារធ្វើបុណ្យតាមប្រពៃណី៕

ប្រភព៖ Fresh News

ដោយឡែករំលឹកព័ត៌មានមួយផ្សេងទៀត៖ មិនគួរ! ឈឺផ្តាសាយ​​ត្រូវ​ពេទ្យ​ចាក់២ម្ជុល​ ប្រកាច់ស្លាប់​ 

ខេត្តស្វាយរៀង ​៖​ បុរស​ម្នាក់​មានជំងឺ​ផ្តាសាយ​ ក៏​ជិះ​ម៉ូតូ​ទៅ​ឱ្យ​​គ្រូពេទ្យ​ពិនិត្យ​​និងព្យាបាល ក៏ត្រូវ​គ្រូពេទ្យ​ចាក់​ថ្នាំ​​អស់​​ ២​​ម្ជុល ​ស្រាប់​តែ​​​ប្រកាច់​ត្រ​ដ.​ខ្យល់​ស្លាប់​ភ្លាម​ៗ ​​បង្ក​​ការ​ភ្ញាក់ផ្អើល​​យ៉ាងខ្លាំង ​ហើយ​​លោក​គ្រូ​ពេទ្យ​រូបនោះ​ បាន​ដាក់​មេ​ប្រូច​បាត់ ​។

​ហេតុការណ៍​​ចាក់​ថ្នាំ​​​ស្លាប់​នេះ ​គឺកើតឡើង​កាលពី​វេលា​ម៉ោង០​៦ ​និង​៤០​នាទី​ល្ងាច​ថ្ងៃ​ទី​១៩ ​កុម្ភៈ​ ស្ថិត​នៅ​ភូមិ​បឹង​វែង ​ឃុំ​ស្វាយ​ជ្រំ​ ស្រុក​​ស្វាយ​ជ្រំ​ ។

​បើ​តាម​ស្ត្រី​ឈ្មោះ​​ផាង ​សា​រ៉ា​ន អាយុ​៥០​ឆ្នាំ ជា​ប្រពន្ធ​បានឱ្យ​ដឹង​ថា ប្តី​​​គាត់​ដែលស្លាប់​ឈ្មោះ​ព្រាប សុវណ្ណ អាយុ​៤៤​ឆ្នាំ ជា​អ្នក​បើក​រថយន្ត​ដឹក​កម្មករ ។ នៅ​​មុន​ពេល​កើតហេតុ ប្តី​គាត់​​មាន​ជំងឺ​ផ្តាសាយ​ មួយ​អា​ទិត្យ​​មក​​ហើយ ​​ប៉ុន្តែ​នៅ​តែបើកបរ​រថយន្ត​ដឹក​កម្ម​ករ​​រាល់​ថ្ងៃបាន​ ។ លុះ​នៅ​ថ្ងៃ​កើតហេតុ វេលា​ម៉ោង​ប្រមាណ​​ជា០​៦​ និង​២០​នាទី​ល្ងាច​ដដែល ប្តីគាត់​បាន​​ប្រាប់​កូន​​ថា ឪ​មិន​ស្រួលខ្លួន​​ទេ ឪ​ទៅ​ផ្ទះ​ពេទ្យ​ឲ្យ​គេ​​ពិនិត្យ​​​រក​ថ្នាំលេប​ ហើយ​ចាំ​​​មក​វិញ ​ចាំ​ស្ល​ម្ហូប ​។

​ជន​រងគ្រោះ​​​ជិះ​ម៉ូតូ​ ទៅ​ផ្ទះ​ពេទ្យ​​ឈ្មោះ​សុខ​ ហ៊ិ​ន ភេទ​ប្រុស​ អាយុ​៧១​ឆ្នាំ​ ជា​អតីត​ពេទ្យ​ចូល​និ​វត្ស​នៅ​ភូមិ​ជាមួយ​គ្នា​ ចម្ងាយ​ជិត​១​គីឡូម៉ែត្រ ​ដើម្បី​ពិនិត្យ​ព្យាបាល ស្រាប់តែ​ម៉ោង​ប្រមាណ​ជា​៦​ និង​៤០​នាទី​ល្ងាច កូនប្រុស​គ្រូពេទ្យ​​ឈ្មោះ​សុខ​ កុសល ទូរ​សព្ទ័​ហៅ​រូប​​គាត់​ជា​ប្រពន្ធ​ថា បងស្រី​ជួយ​ទៅ​មើល​បងប្រុស​​ផង មិនដឹង​យ៉ាងម៉េច​ទេ មុខ​​ឡើង​ខ្មៅ​អស់​ហើយ​ ។

​គ្រាន់តែ​ឮ​ភ្លាម កូន​ៗ​ក៏​បាន​បើក​រថយន្ត​ទៅ​មើល​ តែឪពុក​បាន​ស្លាប់​បាត់​ទៅ​ហើយ​ ​​ប៉ុន្តែ​ប្រពន្ធ​កូន​មិន​អស់ចិត្ត​ បាន​លើក​ជន​រង​គ្រោះ​​ ដាក់​លើ​រថយន្ត​ដឹក​បញ្ជូន​ទៅ​មន្ទីរពេទ្យ​បង្អែក​ ស្រុក​ស្វាយ​ជ្រំ​ ដើម្បី​សង្គ្រោះ ក៏​ប៉ុន្តែ​គ្រូពេទ្យ​ប្រាប់​ថា ​ជន​រង​គ្រោះ​ស្លាប់​បាត់​ទៅ​​ហើយ​ ។​

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]