(ភ្នំពេញ)៖ ចោរជំនាញខាងឆ្កឹះសោបន្ទប់ និងផ្ទះប្រជាពលរដ្ឋម្នាក់ នៅពេលនេះត្រូវបានកម្លាំងនគរបាល ចាប់វាយខ្នោះ ខណៈចូលគាស់បន្ទប់ជួលរបស់ប្រធានផ្សារ «វ៉ិនមីង» ក្បែររបងសួនឧស្សាហកម្មកាណាឌីយ៉ា យកបានទូរស័ព្ទ២គ្រឿង។ ការចាប់ខ្លួនជនសង្ស័យរូបនេះ ដោយសារម្ចាស់ផ្ទះ មើលឃើញទាន់តាមកាមេរ៉ាសុវត្ថិភាព ហើយបានទៅប្តឹងនគរបាលតែម្តង។
ហេតុការណ៍នេះ បានកើតឡើងនៅព្រឹកថ្ងៃទី២១ ខែកុម្ភៈ ឆ្នាំ២០១៧ នៅផ្សារ «វ៉ិនមីង» ជាប់របងសួនកាណាឌីយ៉ា ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។
ជនសង្ស័យឈ្មោះ តុល សារ៉ាត អាយុ២៤ឆ្នាំ មុខរបរជាងផ្សារដែក ស្នាក់នៅបន្ទប់ជួល នៅភូមិព្រៃព្រីងជើង សង្កាត់ចោមចៅ ខណ្ឌពោធិ៍សែនជ័យ មានស្រុកកំណើត នៅស្រុកត្រាំកក់ ខេត្តតាកែវ។ ចំណែកម្ចាស់បន្ទាប់ឈ្មោះ ផេង វុត្ថា ភេទប្រុស មុខរបរជាប្រធានផ្សារ«វីលមីង» ស្នាក់នៅកន្លែងកើតហេតុ។
សមត្ថកិច្ចមូលដ្ឋានឲ្យដឹងថា នៅមុនពេលកើតហេតុ ម្ចាស់បន្ទប់ដែលជាប្រធានផ្សារ «វីលមីង» មិនបាននៅក្នុងបន្ទប់ ដោយបានចាក់សោត្រឹមត្រូវ មុននិងចាកចេញទៅធ្វើការបាត់។ បន្ទាប់មកម្ចាស់បន្ទប់ បានឆែកឃើញតាមកាមេរ៉ាសុវត្ថិភាព ដោយជនសង្ស័យកំពុងធ្វើសកម្មភាពគាស់បន្ទប់ ទើបម្ចាស់ផ្ទះរាយការណ៍ ទៅសមត្ថកិច្ចចុះឃាត់ខ្លួនភ្លាមៗតែម្តង ខណៈជនសង្ស័យទើបតែលួចបានទូរស័ព្ទ២គ្រឿងតែប៉ុណ្ណោះ។
បច្ចុប្បន្ន ជនសង្ស័យត្រូវបានយកទៅធ្វើការសាកសួនៅប៉ុស្តិ៍ចោមចៅ ដើម្បីកសាងសំណុំរឿងចាត់ការតាមផ្លូវច្បាប់៕
ប្រភព៖ Fresh News
ដោយឡែករំលឹកព័ត៌មានមួយផ្សេងទៀត៖ បុរសដែលវាយសម្លាប់ប្រពន្ធ នៅខណ្ឌឬស្សីកែវ ថ្ងៃនេះតុលាការ កាត់ទោសឲ្យជាប់ពន្ធនាគារ៥ឆ្នាំ
(ភ្នំពេញ)៖ ប្រធានក្រុមប្រឹក្សាជំនុំជំរះសាលាដំបូងរាជធានីភ្នំពេញលោក កោ វណ្ឌី នៅថ្ងៃទី២០ ខែកុម្ភៈ ឆ្នាំ២០១៧ បានប្រកាស សាលក្រមផ្ដន្ទាទោស ដាក់ពន្ធនាគារកំណត់៥ឆ្នាំ ពីបទ «ហិង្សាដោយចេតនាមានស្ថានទម្ងន់ទោស ដោយមរណភាព នៃជនរងគ្រោះ តាមមាត្រា២២៤ នៃក្រមព្រហ្មទណ្ឌ» ទៅលើបុរសម្នាក់ដែលបានវាយប្រពន្ធរបស់ខ្លួនរហូតស្លាប់។
សូមបញ្ជាក់ថា ជនជាប់ចោទ ទុន កែវ អាយុ៤៤ឆ្នាំ ជាកម្មករសំណង់ស្នាក់នៅផ្ទុះលេខ៤៦៣ សង្កាត់ទួលសង្កែ ខណ្ឌឬស្សីកែវ បានវាយសម្លាប់ប្រពន្ធរបស់ខ្លួនឈ្មោះ ភាព អាយុ២៧ឆ្នាំ កាលពីថ្ងៃទី២៣ ខែសីហា ឆ្នាំ២០១៦។
យោងតាមរបាយការណ៍របស់សមត្ថកិច្ច រៀងរាល់ថ្ងៃ ពេលបញ្ចប់ការងារ ២នាក់ប្តី-ប្រពន្ធនេះ តែងតែផឹកស្រាលេងនៅក្រោមផ្ទះ ហើយតែងមានជម្លោះវាយតប់គ្នា មិនលោះថ្ងៃឡើយ។ ម្យ៉ាងទៀត ប្រពន្ធរបស់គេមានជំងឺបេះដូងទៀតផង។
រហូតដល់ថ្ងៃទី២២ ខែសីហា ឆ្នាំ២០១៦ មានអ្នកធ្វើការសំណង់ជាមួយគ្នា មកលេងស្រាប់តែពួកគេ បានទិញស្រាមកផឹកដូចរាល់ដង គឺផឹកស្មើដៃគ្នាជាមួយប្រពន្ធ។ លុះដល់យប់ជ្រៅ ក៏ចូលដេកលក់នៅលើផ្ទះ ទាំង២នាក់ រហូតដល់ម៉ោង៥ទាបភ្លឺថ្ងៃទី២៣ ខែសីហា ស្រាប់តែប្រពន្ធរបស់គេ ថប់ដង្ហើមហៅឲ្យជួយ ពេលនោះ ខ្លួនគេក៏បានគោះរឹតទ្រូងឲ្យប្រពន្ធ និងហៅអ្នកជិតខាងមកជួយទៀត ប៉ុន្តែប្រពន្ធរបស់គេបានស្លាប់បាត់ទៅហើយ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]