(ឧត្តរមានជ័យ)៖ មន្រ្តីយោធា២នាក់ នៅកងពលតូចអន្តរាគមន៍លេខ៥ បានជួបគ្រោះថ្នាក់ចរាចរណ៍ដោយខ្លួនខ្លួនឯង (ដួលម៉ូតូ) បណ្តាលឲ្យស្លាប់ទាំង២នាក់តែម្តង ស្ថិតនៅចំណុចផ្លូវជាតិលេខ៥៦ (ចន្លោះបង្គោលគីឡូម៉ែតលេខ១០៧-១០៨) ក្នុងភូមិត្របែក សង្កាត់បុស្បូវ ក្រុងសំរោង ខេត្តឧត្តរមានជ័យ នៅវេលាម៉ោងរំលងអាធ្រាត្រឈានចូលថ្ងៃទី២១ ខែកុម្ភៈ ឆ្នាំ២០១៧នេះ។
សមត្ថកិច្ចមូលដ្ឋានបានឲ្យដឹងថា ជនរងគ្រោះជាមន្ត្រីយោធាទី១-ឈ្មោះ ចាន់ ថូ អាយុ២៧ឆ្នាំ រស់នៅភូមិពោធិ៍ចាស់ ឃុំបេង ស្រុកបន្ទាយអំពិល ខេត្តឧត្តរមានជ័យ (អ្នកបើកម៉ូតូម៉ាកហុងដាវ៉េវ C-100 ពណ៌ខ្មៅ ពាក់ស្លាកលេខ ឧ.មានជ័យ 1B-6477 គ្មានពាក់មួកសុវត្ថិភាព) និងទី២-ឈ្មោះ ចាន់ សុផល អាយុ២៨ឆ្នាំ រស់នៅភូមិពោធិ៍ចាស់ ឃុំបេង ស្រុកបន្ទាយអំពិល ខេត្តឧត្តរមានជ័យ (អ្នករួមដំណើរ គ្មានពាក់មួកសុវត្ថិភាព)។
ក្រោយពីទទួលបានពត៌មាន កម្លាំងជំនាញ និងប៉ុស្តិ៍បានចុះទៅដល់កន្លែងកើតហេតុ ធ្វើការត្រួតពិនិត្យ និងស្រាវជ្រាវរកសាច់ញាតិនៃសព ហើយបានធ្វើកំណត់ហេតុប្រគល់ជូនសាច់ញាតិ យកទៅធ្វើបុណ្យតាមប្រពៃណី៕
ប្រភព៖ Fresh News
ដោយឡែករំលឹកព័ត៌មានមួយផ្សេងទៀត៖ ស្ទះចរាចរណ៍ខ្លាំងពេក ចុះពីលើម៉ូតូឌុបឆ្លងទន្លេលើស្ពានព្រះមុនីវង្សថ្មី
រាជធានីភ្នំពេញ ៖ កាលពីវេលាម៉ោង៩ព្រឹកថ្ងៃទី ២០ ខែកុម្ភៈ ឆ្នាំ២០១៧ ស្ត្រីម្នាក់បានជិះម៉ូតូឌុបទៅសម្រាលកូន នៅមន្ទីរពេទ្យបង្អែកមានជ័យ ប៉ុន្តែដោយសារស្ទះចរាចរណ៍ខ្លាំងពេក ស្រាប់តែស្ត្រីរូបនោះចុះពីលើម៉ូតូឆ្លងទន្លេ បានកូនស្រីមួយនៅលើស្ពានព្រះមុនីវង្សថ្មី ត្រើយខាងកើត ស្ថិតក្នុងសង្កាត់ច្បារអំពៅទី១ ខណ្ឌច្បារអំពៅ បង្កឲ្យការភ្ញាក់ផ្អើលជាខ្លាំង ។
ស្ត្រីរូបនេះឈ្មោះ ស្រីចិន អាយុ២៩ឆ្នាំ មុខរបរមិនពិតប្រាកដ បច្ចុប្បន្នសុំផ្ទះប្រជាពលរដ្ឋស្នាក់នៅបណ្តោះអាសន្ន នៅភូមិព្រែកតានូ សង្កាត់ចាក់អង្រែលើ ខណ្ឌមានជ័យ ។
ប្រភពព័ត៌មានពីក្រុមអ្នកភូមិ ដែលរស់នៅជាមួយនាង បានឲ្យដឹងថា កាលពីវេលាព្រឹកថ្ងៃ២០ ខែកុម្ភះ នាងថ្ងូរថាឈឺពោះ ខ្លាំងណាស់ ម្យ៉ាងទៀតកូនដែលនៅក្នុងផ្ទៃរបស់នាងក៏គ្រប់ខែនឹងត្រូវកើតទៀត ។ ដោយឃើញការខ្វះខាត អ្នកស្រុកបានរៃអង្គាសលុយគ្នាម្នាក់បន្តិច ជួលម៉ូតូឌុបឲ្យឌុបនាងទៅសម្រាកកូន នៅមន្ទីរពេទ្យបង្អែកមានជ័យ ស្ថិតក្នុងសង្កាត់ច្បារអំពៅ១ ខណ្ឌច្បារអំពៅ ។
លុះធ្វើដំណើរមកដល់ លើស្ពានព្រះមុនីវង្សថ្មី ត្រើយខាងកើត ដោយសារស្ថានភាពចរាចរណ៍មានភាពណែនណាន់ តាន់តាប់ខ្លាំងពេក ស្ត្រីខាងលើក៏បានចុះពីលើម៉ូតូ ហើយសម្រាលកូន នៅលើស្ពានដោយខ្លួនឯង បង្កឲ្យមានការភ្ញាក់ផ្អើលដល់អ្នកដំណើរពាសពេញស្ពាន នាំគ្នាចោមរោមមើល ខណៈចរាចរណ៍នៅចំណុចខាងលើកំពុងមានការកកកុញស្ទះយ៉ាងខ្លាំង ។
ភ្លាមៗនោះ គេសង្កេតឃើញកម្លាំង អាជ្ញាធរមូលដ្ឋានចុះអន្តរាគមន៍ និងជួយទំនាក់ទំនងទៅកាន់រថយន្ត សាមុយរបស់មន្ទីរពេទ្យបង្អែក មានជ័យឲ្យមកជួយសង្គ្រោះផងដែរ ។ ប៉ុន្តែយ៉ាងណាក៏ដោយ មុនពេលរថយន្ត សាមុយមកដល់ ស្ត្រីរូបនេះបានប្រសូតបានកូនស្រីម្នាក់ហើយ ព្រមទាំងមានឈាមស្រោច ពេញថ្នល់លាយឡំនឹងសម្រែកស្រែកថ្ងូរគួរឲ្យអាណិតជាទីបំផុត ។
យ៉ាងណាមិញ គិតមកត្រឹមម៉ោង១រសៀល ថ្ងៃដដែលនេះ ស្ត្រីខាងលើ និងកូនស្រី កំពុងសម្រាកព្យាបាល នៅមន្ទីរពេទ្យបង្អែកមានជ័យ ដោយមានការយកចិត្តទុកដាក់ពីក្រុមគ្រូពេទ្យផងដែរ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]