កម្លាំងនគរបាល ឃាត់ខ្លួនជនសង្ស័យម្នាក់ ក្នុងចំណោមបក្ខពួក២នាក់ បន្ទាប់ពីលួចម៉ូតូ នៅស្រុកស្នួល

(ក្រចេះ)៖ នគរបាលប៉ុស្តិ៍រដ្ឋបាលស្វាយជ្រះ សហការជាមួយនគរបាលស្រុកស្នួល ប្រដេញស្ទាក់ចាប់ខ្លួនជនសង្ស័យបានម្នាក់ភ្លាមៗ ក្នុងចំណោមបក្ខពួក២នាក់ បន្ទាប់ពីពួកគេ បានលួចម៉ូតូឌ្រីមសង់មួយគ្រឿង ដោយម្នាក់ទៀតរត់គេចខ្លួនបាត់។ ករណីអំពើលួចកាច់សោរកម៉ូតូនេះ បានធ្វើឡើង នៅចំណុចស្ពានតេ ឃុំស្វាយជ្រះ ស្រុកស្នួល ខេត្តក្រចេះ កាលពីព្រឹកថ្ងៃទី២០ ខែកុម្ភៈ ឆ្នាំ២០១៧នេះ។

សមត្ថកិច្ចបានឲ្យដឹងថា ជនសង្ស័យដែលបានឃាត់ខ្លួនឈ្មោះ ជីប ជាតិ អាយុ២៣ឆ្នាំ មុខរបរមិនពិតប្រាកដ រស់នៅភូមិព្រែកជ្រីវ ឃុំសែនដី ស្រុកសំរោងទង ខេត្តកំពង់ស្ពឺ។ បន្ទាប់មកកម្លាំងសមត្ថកិច្ច បានឃាត់ខ្លួន រួមទាំងវត្ថុតាងមានម៉ូតូ០១គ្រឿង ម៉ាកឌ្រីមសង់ C125 ឆ្នាំ២០១៤ពណ៌ខ្មៅ គ្មានស្លាកលេខ ជាមធ្យោបាយរបស់ជនមានតម្រុយជិះធ្វើសកម្មភាព និងស្លាកលេខក្រចេះ 1B-7822 ជារបស់ជនរងគ្រោះ។

រីឯម៉ូតូរបស់ជនរងគ្រោះម៉ាកឌ្រីមសង់ C១២៥ ឆ្នាំ២០១៤ពណ៌ខ្មៅស្លាកលេខក្រចេះ 1B-7822 ត្រូវបានបក្សពួកម្នាក់ទៀតឈ្មោះ អោ ប៊ុត ភេទប្រុស អាយុ២៤ឆ្នាំ មានទីលំនៅភូមិឃុំជាមួយគ្នា បានជិះគេចខ្លួនយកទៅបាត់។

បច្ចុប្បន្ន ជនមានតម្រុយខាងលើ ត្រូវបានឃាត់ខ្លួនបណ្តោះអាសន្ន នៅអធិការដ្ឋាន នគរបាលស្រុកស្នួល ដើម្បីកសាងសំណុំរឿងបញ្ជូនទៅជំនាញខេត្តបន្តតាមនិតិវិធី៕

ប្រភព៖ Fresh News

ដោយឡែករំលឹកព័ត៌មានមួយផ្សេងទៀត៖ ដល់ក! ២នាក់ប្តី-ប្រពន្ធ ជាមេចែកចាយ​គ្រឿងញៀន នៅក្រុង​បានលុង ពេលនេះ​កម្លាំងអាវុធហត្ថ​បង្ក្រាបបាន​ហើយ ដកហូតថ្នាំញៀន និងសម្ភារជាច្រើន

(រតនគិរី)៖ មេក្លោងចែកចាយគ្រឿងញៀន នៅក្រុងបានលុង ខេត្តរតនគិរី ដែលរកស៊ីបទល្មើសនេះយូរមកហើយនោះ នៅពេលនេះ ត្រូវបានកម្លាំងអាវុធហត្ថក្រុង ចុះបង្ក្រាប និងចាប់ខ្លួនពួកគេទាំង២នាក់ រហូតដកហូតថ្នាំញៀន និងសម្ភារយ៉ាងច្រើន។

មេបញ្ជាការអាវុធហត្ថមូលដ្ឋាន ក្រុងបានលុង លោកវរសេនីយ៍ត្រី ហៃ វណ្ណារ៉ា បានបញ្ជាក់ថា ប្រតិបត្តិការចាប់ខ្លួនជនសង្ស័យទាំង២នាក់នេះ បានធ្វើឡើងនៅថ្ងៃទី២០ ខែកុម្ភៈ ឆ្នាំ២០១៧នេះ ស្ថិតនៅផ្ទះជនសង្ស័យតែម្តង ភូមិជ័យជំនះ សង្កាត់ឡាបានសៀក ក្រុងបានលុង ដោយមានបញ្ជាផ្ទាល់ពីលោកឧត្តមសេនីយ៍ត្រី គឹម រស្មី មេបញ្ជាការអាវុធហត្ថខេត្ត ព្រមទាំងមានការសម្របសម្រួលពីលោក រ៉ា ប៉ូរ៉ាន់ឌី ព្រះរាជអាជ្ញារងអមសាលាដំបូងខេត្តផងដែរ។

លោកវរសេនីយ៍ត្រី ហៃ វណ្ណា បានបញ្ជាក់ទៀតថា ជនសង្ស័យជាប្តីឈ្មោះ ឈៀង សំណាង អាយុ៤៤ឆ្នាំ និងប្រពន្ធឈ្មោះ ឈឿន សេងហុង អាយុ៣៦ឆ្នាំ។ វត្ថុតាងរួមមាន ម្សៅក្រាមព៌ណសថ្លាចំនួន១៤កញ្ចប់ ក្នុងនោះ២កញ្ចប់ធំ និងសម្ភារសេពគ្រឿងញៀនមួយចំនួន ព្រមទាំងម៉ូតូ C-125ពណ៌ខ្មៅពាក់ស្លាកលេខរតនគិរី 1A-9860។