រាជធានីភ្នំពេញ ៖ ស្ត្រីម្នាក់បានជួបរឿងស៊យ ខណៈពេលដែលគាត់ឈប់រថយន្តតាមផ្លូវ ដើម្បីឲ្យកូនស្រីតូចរបស់គាត់ចុះទៅបត់ជើង ដោយគាត់មិនបានដាក់គន្លឹះទ្វាររថយន្តឡើយ ស្រាប់តែពេលនោះមានចោរ២នាក់ ជិះម៉ូតូ២គ្រឿងទៅដល់ បានធ្វើសកម្មភាពបើកទ្វាររថយន្តរបស់គាត់លួចយកកាបូប រួចជិះគេចខ្លួនទៅបាត់ស្រមោល បន្ទាប់មកស្ត្រីរូបនោះបានបើករថយន្តទៅកាន់ប៉ុស្ដិ៍ចោមចៅ ដាក់ពាក្យបណ្ដឹងសុំឲ្យនគរបាលជួយអន្តរាគមន៍។
ហេតុការណ៍នោះ បានបង្កឲ្យមានការភ្ញាក់ផ្អើលឡើង កាលពីវេលាម៉ោង៩និង១០នាទីព្រឹក ថ្ងៃទី១៨ ខែកុម្ភៈ ឆ្នាំ២០១៧ ស្ថិតតាមផ្លូវវ៉េងស្រេង ត្រង់ចំណុចទល់មុខក្រុមហ៊ុនស្រាបៀរមួយ ក្នុងភូមិចោមចៅ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
ស្ត្រីរងគ្រោះឈ្មោះព្រំ គន្ធី អាយុ៣១ឆ្នាំ មុខរបរបុគ្គលិកក្រុមហ៊ុនមួយ ស្នាក់នៅក្នុងបុរី លឹម ឈាងហាក់ ស្ថិតនៅក្នុងភូមិកន្ទោកខាងជើង សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ និងមានស្រុកកំណើតនៅសង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ។ នៅក្នុងកាបូបរបស់នាង ដែលត្រូវចោរលួចយកទៅ នោះមានលុយចំនួន១.០០០ដុល្លារ, ទូរស័ព្ទដៃម៉ាកសាំស៊ុង១គ្រឿង, ម៉ាក អាយហ្វូនស៊ិក១គ្រឿង, ម៉ាកហូវៃ១គ្រឿង, អត្តសញ្ញាណប័ណ្ណ១សន្លឹក, លិខិតឆ្លងដែន១ច្បាប់ និងប័ណ្ណធនាគារចំនួន៣សន្លឹកផងដែរ។ ដោយឡែកក្រុមចោរមានគ្នា២នាក់ ជិះម៉ូតូម៉ាកស៊ីទី សេ១០០ កូរ៉េ ពណ៌ក្រហម១គ្រឿង។ ស្ត្រីរងគ្រោះរូបនោះបានប្រាប់ឲ្យនគរបាលដឹងថា នៅមុនពេលកើតហេតុគាត់បានបើករថយន្តម៉ាកហាយ ឡែនឌ័រ ពណ៌ស មួយគ្រឿង ធ្វើដំណើរតាមផ្លូវវ៉េងស្រេង ចេញពីផ្ទះឆ្ពោះទៅរាជធានីភ្នំពេញ ដោយបើកបរក្នុងទិសដៅពីលិចទៅកើត។ លុះពេលទៅដល់ត្រង់ចំណុចកើតហេតុ កូនស្រីរបស់គាត់បានឈឺបត់ជើង គាត់ក៏បានឈប់រថយន្តឲ្យកូនបត់ជើង ដោយមិនបានដាក់គន្លឹះទ្វាររថយន្តនោះទេ ហើយក្រោយពេលកូនបត់ជើងរួច គាត់មិនបានឡើងរថយន្តភ្លាមៗនោះឡើយ ដោយលាងគូទឲ្យកូនសិន។ ខណៈនោះស្រាប់តែជនសង្ស័យ២នាក់នោះ បានជិះម៉ូតូទៅឈប់រួចបើកទ្វាររថយន្តយកកាបូបលុយ និងទូរស័ព្ទ ហើយជិះម៉ូតូគេចខ្លួនបាត់ស្រមោល។ ក្រោយមកនាងក៏បានបើករថយន្តត្រឡប់ក្រោយវិញ និងបានចូលទៅកាន់ប៉ុស្ដិ៍ នគរបាលចោមចៅ ដាក់ពាក្យបណ្ដឹងសុំឲ្យជួយអន្តរាគមន៍ស្វែងរកក្រុមចោរ ចាត់ការតាមផ្លូវច្បាប់។
ប្រជាពលរដ្ឋបាននិយាយថា ការបើកទ្វាររថយន្តអ្នកដំណើរតាមផ្លូវនេះ មិនមែនទើបតែលើកទី១នោះទេ កន្លងមក ធ្លាប់បានកើតមានជាបន្តបន្ទាប់រួចមកហើយ នៅក្នុងភូមិសាស្ត្រខណ្ឌពោធិ៍សែនជ័យ ហើយគេសង្ស័យថា មុខសញ្ញាចោរខាងលើនោះ គឺដដែល ដែលបានចេញធ្វើសកម្មភាពគ្រប់ទីកន្លែង ជាពិសេសកន្លែងលក់ដូរ ឬចំណុចភ្លើងស្ដុបមុខអាកាសយានដ្ឋានអន្តរជាតិភ្នំពេញ ឲ្យតែមានរថយន្តឈប់ ហើយម្ចាស់ធ្វេសប្រហែស គឺពួកចោរទាំងនោះបើកទ្វារលួចយកកាបូប ហើយតែងតែមានសំណាងគេចខ្លួនរួចដោយសុវត្ថិភាពរហូត មិនដឹងថា ដល់ពេលណាទើប ត្រូវជាប់អន្ទាក់នគរបាលនោះឡើយ៕
ប្រភព៖ កោះសន្តិភាព
ដោយឡែករំលឹកព័ត៌មានមួយផ្សេងទៀត៖ ល្បិចថ្មី! បោកតាមសារជាសំឡេងក្នុងហ្វេសប៊ុក វេរលុយដដែលតាមវីង
ខេត្តបន្ទាយមានជ័យ ៖ ល្បិចថ្មីមួយទៀតដែលជនសង្ស័យប្រើតាមប្រព័ន្ធទំនាក់ទំនងសង្គមហ្វេសប៊ុក(ផ្ញើតាមសារជាសំឡេង) ដើម្បីឲ្យភាគីម្ខាងជាដៃគូសន្ទនា វេរលុយមកឲ្យខ្លួន ដោយផ្ញើលេខកូដតាមវីង ចំនួន១.៥០០ដុល្លារ ។ ជនសង្ស័យត្រូវបានសមត្ថកិច្ចចាប់ខ្លួនបានតាមរយៈការស្រាវជ្រាវលេខទូរស័ព្ទ ដែលជនរងគ្រោះផ្ញើលុយមកអោយ។
លោកវរសេនីយ៍ទោ ខែម សោភ័ណ នាយការិយាល័យនគរបាលព្រហ្មទណ្ឌកំរិតស្រាល បានឲ្យដឹងថា ជនសង្ស័យមានឈ្មោះរ៉េន តុលា ភេទប្រុស អាយុ៣១ឆ្នាំ រស់នៅភូមិសាមគ្គីមានជ័យ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ។
បើតាមបណ្តឹងរបស់ជនរងគ្រោះបានរៀបរាប់ថា កាលពីថ្ងៃទី២៤ មករា ២០១៧ វេលាម៉ោង១០និង៣០នាទីព្រឹក ជនសង្ស័យឈ្មោះរ៉េន តុលា នេះបានលួចគណនីហ្វេសប៊ុកមួយ ឈ្មោះ RAKSA TEPICH ជារបស់ឈ្មោះ ជិន សិរីសោភ័ណ ភេទស្រី អាយុ៣៧ឆ្នាំ នៅភូមិ-សង្កាត់៤ ខេត្តព្រះសីហនុ ហើយបានប្រើប្រាស់សំឡេងរបស់ជនរងគ្រោះ(ជិន សិរីសោភ័ណ) ផ្ញើទៅកាន់ជនរងគ្រោះម្នាក់ទៀតឈ្មោះ សុខលាភ ភេទស្រី អាយុ៣១ឆ្នាំ នៅភូមិឃុំជាមួយនិងជនរងគ្រោះទី១ដែរ ។
បណ្តឹងរបស់ជនរងគ្រោះ បន្តរៀបរាប់ថា ដោយសារ(សារក្នុងឆាតជាសារចាស់ ព្រោះមានសំឡេងជនរងគ្រោះធ្លាប់ផ្ញើសារអោយវេរលុយម្តងរួមមកហើយ) ស្រាប់តែជនសង្ស័យលួចយកហ្វេសប៊ុកជនរងគ្រោះខាងលើបាន ហើយឆាតជាសំឡេងដដែលសារជាថ្មី ឲ្យផ្ញើលុយចំនួន១ពាន់៥រយដុល្លារ ផ្ញើទៅចូលលេខ០៨៨ ៤៤៧១៨១០ ។ ជនរងគ្រោះឈ្មោះកាន់ សុខលាភ នឹកស្មានថា ជាសារឈ្មោះជិន សិរីសោភ័ណ ដែលធ្លាប់ឆាតនិយាយគ្នាតាមហ្វេសប៊ុក ក៏បានផ្ញើលុយមកចំនួន១ពាន់៥រយដុល្លារ បន្ទាប់ពីបានលេខកូដវីងហើយ ជនសង្ស័យក៏ទៅបើកយកលុយនោះ ។
បណ្តឹងរបស់ជនរងគ្រោះបន្តអោយដឹងទៀតថា ក្រោយមកជនរងគ្រោះ កាន់ សុខលាភ ក៏បានឆាតមកសួរនាំឈ្មោះជិន សិរីសោភ័ណ ពីរឿងបានទទួលលុយនោះ ទើបជិន សិរីសោភ័ណ បាននិយាយថា មិនដឹងទេ លុយអីគាត់មិនដឹងរឿងទេ ពេលនោះទើបដឹងថា មានគេឆបោក ។ ទើបជនរងគ្រោះទាំង២បានមកដាក់ពាក្យបណ្តឹងដល់សមត្ថកិច្ចនគរបាលជួយស្រាវជ្រាវ ។
លោកនាយការិយាល័យ បានបញ្ជាក់ថា ក្រោយពីទទួលបានបណ្តឹងជនរងគ្រោះ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានដាក់ចេញនូវបទបញ្ជា និងដោយមានការសម្របសម្រួលពីលោកមាស ចាន់ពិសិដ្ឋ ព្រះរាជអាជ្ញាអមសាលាដំបូងខេត្ត កម្លាំងនគរបាលជំនាញបានធ្វើការស្រាវជ្រាវ ដល់ថ្ងៃទី១៦ កុម្ភៈ ២០១៧ នៅវេលាម៉ោង៦និង៣០នាទី ទើបឃាត់ខ្លួនបានជនសង្ស័យ ហើយបានបញ្ជូនខ្លួនមកកាន់ស្នងការដ្ឋាននគរបាលខេត្ត ដើម្បីធ្វើការសាកសួរ។
លោកឧត្តមសេនីយ៍ត្រី សិទ្ធ ឡោះ ស្នងការរងទទួលបន្ទុកការិយាល័យកណ្តាលនគរបាលព្រហ្មទណ្ឌបានឲ្យដឹងថា តាមចម្លើយសារភាពរបស់ជនសង្ស័យបាននិយាយថា កាលពីព្រឹកថ្ងៃទី២៤ មករា រូបគេបានលួចប្រើប្រាស់គណនីហ្វេសប៊ុករបស់មនុស្សស្រីម្នាក់ តែមិនដឹងថា ជារបស់អ្នកណានៅឯណានោះទេ (មិនចាំឈ្មោះគណនី) ដោយក្នុងនោះ រូបគេបានឆែកមើលក្នុងសារ ក៏ឃើញមាននិយាយគ្នារឿងវេរលុយតាមវីងចំនួន១ពាន់៥រយដុល្លារ ហើយគេក៏ប្រើសំឡេងដដែលនោះ ផ្ញើសារឡើងវិញ ទៅឲ្យគេផ្ញើលុយមកឲ្យ ហើយអ្នកនោះក៏ផ្ញើលេខកូដវីងមកមែន ខ្លួនក៏ទៅបើកលុយនោះយកតែម្តង ។
ទាក់ទងនឹងករណីឆបោកនេះ តាមហ្វេសប៊ុកនេះ លោកឧត្តមសេនីយ៍ត្រី សិទ្ធ ឡោះ ក៏បានអំពាវនាវដល់បងប្អូនប្រជាពលរដ្ឋដែលនិយមលេងតាមហ្វេសប៊ុក មេត្តាប្រុងប្រយ័ត្នផងចំពោះការប្រើប្រាស់ និងសូមដាក់លេខសំងាត់ ឫដាក់សុវត្ថិភាព(Facebook Settings) ការពារអ្នកផ្សេងចូលបើកយកបាន ។
ចំពោះជនសង្ស័យត្រូវបានរៀបចំសំណុំរឿងបញ្ជូនទៅសាលាដំបូងខេត្តហើយ ចំណែកឯលុយត្រូវបានដកហូតចំនួន១ពាន់៥រយដុល្លារមកវិញ និងត្រៀមប្រគល់ជូនម្ចាស់ដើមវិញផងដែរ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
