(សៀមរាប)៖ ទីងមោងយក្ស ឬហៅម្យ៉ាងទៀតថា ជាតុក្កតាយក្ស ត្រូវបានគេរៀបចំដង្ហែតាមដងផ្លូវនានា ក្នុងទីក្រុងសៀមរាប-អង្គរ នៅព្រលប់ថ្ងៃទី១៨ ខែកុម្ភៈ ឆ្នាំ២០១៧ ជាមួយនឹងអ្នកចូលរួមទស្សនាដ៏ច្រើនកុះករ ប្រហែល២ម៉ឺននាក់ អមដោយតន្ត្រីព្យុហយាត្រាកាយរឹទ្ធិជាតិកម្ពុជា ខេត្តសៀមរាបផងដែរ។
លោក អ៊ុន សាវ៉ាន់ ជាសមាជិករបស់គំរោងតុក្កតាយក្ស ប្រចាំខេត្តសៀមរាប បានឱ្យដឹងថា ឆ្នាំនេះរូបតុក្កតាយក្ស (ទីមោងយក្ស) ដែលបានដំឡើងក្រោមប្រធានបទ «សិល្បៈ និងចម្រៀង ក្នុងទស្សវត្សទី៦០» រួមមាន៖
១- លោកតា គង់ ណៃ សិល្បៈករចាប៉ីដងវែង ក្នុងនិមិត្តរូប ដើម្បីចូលរួមអបរសារទ ការដាក់បញ្ចូលសិល្បៈចាប៉ីដងវែងខ្មែរ ជាបេតិកភណ្ឌវប្បធម៌អរូបី របស់មនុស្សជាតិ នាថ្ងៃទី៣០ ខែវិច្ឆិកា ឆ្នាំ២០១៦ និងការអភិរក្សមរតកមនុស្សរស់នៃកម្ពុជា ។
២- សត្វមាន់គក គឺជានិមិត្តរូបឆ្នាំរកា ដែលជនានុជនខ្មែរ នឹងចូលរួមអបរសារទពិធីចូលឆ្នាំខ្មែរ ឆ្នាំថ្មី ឆ្នាំរកា ។
៣-សិល្បៈកររបាំក្ងោកប៉ៃលិន ដើម្បីរំលឹកដល់ការបង្កើតឡើង ដល់ការបង្កើតរបាំក្ងោកប៉ៃលិន ជាការបង្ហាញប្រពៃណី នៃជនជាតិកូឡា ក្នុងខេត្តប៉ៃលិន ជាតំបន់សម្បូណ៌ត្បូងធម្មជាតិដ៏មានតម្លៃ របស់ប្រទេសកម្ពុជា ។
៤- ក្រុមភ្លេងឆៃយុំា ជាភ្លេងប្រពៃណីវប្បធម៌ខ្មែរ ដែលប្រកបដោយភាពរីករាយស្វាហាប់ នៃប្រជាជាតិខ្មែរ ។
៥- ម៉ាស៊ីនថតភាពយន្ត និង អ្នកថតភាពយន្ត ដើម្បីរំលឹកដល់សម័យទស្សវត្សទី៦០ នៃការអភិវឌ្ឍវណ្ណកម្មភាពយន្តខ្មែរ ដែលធ្លាប់ល្បីរន្ទឺក្នុងតំបន់អាស៊ី និងពិភពលោក។
៦- រូបក្រពើ និងពស់កេងកង ជានិមិត្តរូបនៃភាពយន្តខ្មែរ រឿងក្រៃថោងក្រពើឆារ៉ាវ៉ាន់ និងរឿងពស់កេងកង រំលឹកដល់ស្នាដៃ នៃការផលិតភាពយន្តខ្មែរ ក្នុងទស្សវត្សទី៦០។
លោក អ៊ុន សាវ៉ាន់ បានឱ្យដឹងថា គម្រោងសហគមន៍សិល្បៈរបស់កុមារក្នុងស្រុកមួយនេះ បង្កើតឡើងក្នុងគោលបំណង ផ្តល់ឱ្យកុមារ ដែលជួបការលំបាកនូវមូលដ្ឋានបង្ករបង្កើត ដើម្បីជំរុញនិងលើកកំពស់ ការបញ្ចេញទស្សនៈផ្ទាល់ខ្លួន ព្រមទាំងទំនុកចិត្ត តាមរយៈសិល្បៈ ។
នេះជាឆ្នាំទី១១ហើយ ដែលព្រឹត្តិការណ៍ដ៏អស្ចារ្យ និងមានតែមួយ បានប្រារព្ធឡើង ដើម្បីកុមារដែលជួបការលំបាកជាង ៥០០នាក់ នៅក្រុងសៀមរាប បង្កើតបាននូវអារម្មណ៏ដ៏សំខាន់មួយ នៃសាមគ្គីគ្នាជាសហគមន៍ បង្កើតការងារជាក្រុម ផ្តល់នូវក្តីសង្ឃឹមមោទនភាព និងការកោតសរសើរ សម្រាប់ជាការលើកទឹកចិត្តពួកគេ ឱ្យជំនះរាល់ បញ្ហាលំបាកនានាប្រចាំថ្ងៃ ដែលពួកគេនឹងជួបប្រទះ។
គំរោងតុក្កតាយក្ស (ទីមោងយក្ស) បានចាប់បដិសន្ធិឡើងនាឆ្នាំ២០០៧ ក្នុងនាមជាគំរោង សហគមន៍សិល្បៈរបស់កុមារ ក្នុងស្រុកមួយ ដែលរហូតមកទល់សព្វថ្ងៃនេះ បានក្លាយជាគម្រោងសិល្បៈរបស់កុមារដ៏ធំបំផុត នៅប្រទេសកម្ពុជា ក៏ដូចជាតំបន់អាស៊ីអាគ្នេយ៍ទាំងមូល៕
ប្រភព៖ Fresh News
ដោយឡែករំលឹកព័ត៌មានមួយផ្សេងទៀត៖ ដឹងមូលហេតុដែលមានដង្កូវជាង 80 រស់ក្នុងច្រមុះបុរសមកពី ខេត្តកំពង់ចាម
រាជធានីភ្នំពេញ ៖ ដង្កូវជាង៨០ក្បាលរស់នៅក្នុងច្រមុះ ។ នេះមិនមែនជារឿងលេងសើចទេដង្កូវប្រមាណជាង៨០ក្បាល បានរស់នៅក្នុងច្រមុះរបស់បុរសម្នាក់ដែលរស់នៅក្នុងក្រុងកំពង់ចាម និងកំពុងត្រូវបានក្រុមគ្រូពេទ្យជំនាញរបស់មន្ទីរពេទ្យព្រះអង្គឌួងចាប់យកចេញ និងព្យាបាលកាលពីថ្ងៃទី១៣ កុម្ភៈ ថ្មីៗនេះ ។
បើតាមការអះអាងរបស់លោកវេជ្ជបណ្ឌិត អ៊ុង នរិន្ទ ជាអនុប្រធានត្រចៀក ច្រមុះ បំពង់ក E3(អគារទី៣) និងជាសមាជិកសហគមន៍ ត្រចៀក ច្រមុះ បំពង់ក ក្បាល កម្ពុជា បានរៀបរាប់ប្រាប់កោះសន្តិភាពឱ្យដឹងថា នេះជាករណីទី៣ហើយ ដែលលោកបានជួបប្រទះសត្វដង្កូវរស់នៅក្នុងត្រចៀក និងច្រមុះរបស់អ្នកជំងឺ បន្ទាប់ពីលោកបានចេញបំរើការងារអស់រយៈពេលជាង២០ឆ្នាំមកនេះ ។
ករណីទី៣នេះ ជាករណីដ៏គួរឱ្យរន្ធត់យ៉ាងខ្លាំងសម្រាប់អ្នកជំងឺ ព្រោះសត្វដង្កូវដែលរស់នៅក្នុងច្រមុះមានច្រើនរាប់សិបក្បាលប្រៀបដូចជាសំបុកឃ្មុំមិនទាន់ញាស់ ដែលវាបានរស់នៅក្នុងកោសិកា និងរស់នៅក្នុងច្រមុះ ។
លោកវេជ្ជបណ្ឌិតបានបន្តទៀតថា ករណីនេះបានកើតមានឡើងចំពោះបុរសអាយុ២៦ឆ្នាំមុខរបរជាកសិករ រស់នៅក្រុងកំពង់ចាម ស្រុកចំការលើ ឃុំវាល ។ មូលហេតុដែលមានដង្កូវក្នុងច្រមុះដ៏សន្ធឹកសន្ធាប់បែបនេះ គឺដោយសារតែអ្នកជំងឺមានជំងឺរលាកច្រមុះរ៉ាំរ៉ៃ និងត្រូវបានសត្វរុយពងទំលាក់ចូលក្នុងច្រមុះ ដោយមិនដឹងខ្លួន ពោលគឺកំពុងដេកលង់លក់នៅពេលថ្ងៃ។
អ្នកជំងឺដែលកើតមានជំងឺរលាកច្រមុះរ៉ាំរ៉ៃនេះមានរយៈពេលជិត១ឆ្នាំ និងមិនបានធ្វើអ្វីទាំងអស់ពីមួយថ្ងៃទៅមួយថ្ងៃ ។ ប្រពន្ធរបស់អ្នកជំងឺក៏មានអារម្មណ៍ថាអ្នកជំងឺស្អុយក្នុងច្រមុះ ប៉ុន្តែនៅតែមិនព្រមមកព្យាបាល រហូតដល់ដើមខែកុម្ភះនេះ អ្នកជំងឺស្រាប់តែមានអាការឈឺក្បាលខ្លាំង មានឈាមច្រមុះ ក្អកមកមានឈាម ហូបអ្វីមិនបាន អ្នកជំងឺក៏បានមកពិនិត្យនៅមន្ទីរពេទ្យព្រះអង្គឌួង ។
លោកវេជ្ជបណ្ឌិតបានបន្តទៀតថា នៅពេលដែលក្រុមគ្រូពេទ្យពិនិត្យផ្នែកច្រមុះរបស់អ្នកជំងឺជាមួយនឹងឧបករណ៍ទំនើបមានទាំងថត និងស្តែនស្រាប់តែឃើញមានដង្កូវរាប់សិបក្បាលរស់នៅក្នុងច្រមុះរបស់អ្នកជំងឺដែលសូម្បីតែគ្រូពេទ្យក៏មានការភ្ញាក់ផ្អើល ហើយនៅថ្ងៃទី១នោះគ្រូពេទ្យបានធ្វើការលាងសំអាត និងចាប់ដង្កូវចេញពីច្រមុះ
របស់អ្នកជំងឺបានចំនួន១២ក្បាល។ នៅថ្ងៃទី២បន្ទាប់ពីមានការប្រជុំ និងពិភាក្សាជាមួយក្រុមជំនាញរួចមក លោកក៏បានសំរេចធ្វើការវះកាត់ច្រមុះរបស់អ្នកជំងឺ ដើម្បីយកដង្កូវចេញ។
បន្ទាប់ពីធ្វើការវះកាត់អស់រយៈពេលជិត៤ម៉ោង លោកបានចាប់ដង្កូវក្នុងច្រមុះរបស់អ្នកជំងឺបានរហូតដល់ទៅ៥៧ក្បាល ហើយនៅថ្ងៃទី៣ លោកក៏បានចាប់ដង្កូវចេញបាន១០ក្បាលបន្ថែមទៀត ។ លោកវេជ្ជបណ្ឌិតបានបន្តទៀតថា ពេលនេះអ្នកជំងឺមានសភាពធូរស្បើយច្រើន ហើយចំពោះដង្កូវគឺនៅតែមានទៀត ដោយដង្កូវទាំងនោះបានរស់នៅក្នុងកោសិការបស់អ្នកជំងឺដែលជាផលវិបាកមិនអាចចាប់បាន តែមន្ទីរពេទ្យគឺមានថ្នាំសំលាប់ពពួកដង្កូវទាំងនោះឱ្យអស់ និងព្យាបាលឱ្យអ្នកជំងឺជាសះស្បើយទើបអនុញ្ញាតឱ្យចេញពីមន្ទីរពេទ្យបាន ។
លោកវេជ្ជបណ្ឌិតក៏បានផ្តល់អនុសាសន៍បន្ថែមទៀត ដើម្បីការពារនិងចៀសវាងកើតមានដង្កូវក្នុងច្រមុះ ដោយលោកអ្នកគួរតែអនុវត្តន៍តាមវិធីខាងក្រោមនេះមានដូចជា ៖
-ត្រូវតែមានអនាម័យជានិច្ច និងត្រូវលាងដៃជើង ខ្លួនប្រាណជាមួយសាប៊ូឱ្យបានស្អាត ដើម្បីការពារកុំឱ្យមានពងដង្កូវទាំងនោះនៅជាប់ខ្លូនប្រាណ និងដៃជើង ។
-ចំណីអាហារប្រចាំថ្ងៃគួរតែធ្វើការលាងសំអាតឱ្យបានស្អាតមុនពេលទទួលទាន ។
-រាល់ពេលដែលមានសញ្ញាដូចជា តឹងច្រមុះ ឈឺក្បាលខ្លាំង ពិបាកដកដង្ហើម(ថប់ក្នុងច្រមុះ)ស្អុយក្នុងច្រមុះ ឬមានឈាមទៀតនោះគួរតែប្រញាប់មកជួបជាមួយគ្រូពេទ្យជាបន្ទាន់ ។
-រាល់ពេលដែលមានដំបៅ ត្រូវចេះការពារកុំឱ្យរុយរោម និងត្រូវតែមកជួបជាមួយគ្រូពេទ្យ ដើម្បីព្យាបាល និងបិទមុខដំបៅមិនឱ្យសត្វរុយពងដាក់បាន ។
-ចំពោះឪពុកម្តាយដែលមានកូនតូចៗហើយមានបញ្ហាដូចជារលាកច្រមុះ មានហៀរសំបោរ ត្រូវចេះមានអនាម័យល្អ និងការពារកុំឱ្យសត្វរុយពងដាក់នាំឱ្យកើតមានដង្កូវ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
