រាជធានីភ្នំពេញ ៖ បុរសម្នាក់បានអង្គុយបែរខ្នងលើម៉ូតូចាំឪពុកក្មេកចុះងូតទឹក លុះមួយសន្ទុះក្រោយមកក៏ក្រឡេកមើល ស្រាប់តែឪពុកក្មេកបានលង់ទឹកស្រះស្លាប់បាត់ ។ ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង៥ និង១៥នាទីល្ងាច ថ្ងៃទី១៨ ខែកុម្ភៈ ឆ្នាំ២០១៧ នៅចំណុចស្រះទឹកមួយកន្លែង ស្ថិតក្នុងភូមិឧកញ៉ាវាំង សង្កាត់ភ្នំពេញថ្មី ខណ្ឌសែនសុខ។
បុរសរងគ្រោះឈ្មោះ អ៊ុង សារួនណា អាយុ៥៤ឆ្នាំ ស្នាក់នៅក្បែរកន្លែងកើតហេតុ និងមានស្រុកកំណើតនៅភូមិម្ទេស ស្រុកជីភូ ខេត្តស្វាយរៀង ។
បើតាមកូនប្រសារ ឈ្មោះ ប៊ុន សុធារុណ ភេទប្រុស អាយុ២៨ឆ្នាំ ជាមន្ត្រីអគ្គិសនីកម្ពុជា បានឲ្យដឹងថា មុនពេលកើតហេតុ គាត់ និងឪពុកក្មេក បាននាំគ្នាទៅអង្គុយផឹកស៊ីនៅភូមិច្រេស សង្កាត់ភ្នំពេញថ្មី ខណ្ឌសែនសុខ ។ បន្ទាប់ពីផឹកស៊ីស្រវឹង ខ្លួនបានដឹកឪពុកក្មេកគោលបំណងត្រឡប់មកផ្ទះវិញ ខណៈមកដល់ស្រះទឹកខាងលើឪពុកក្មេងបានចុះលាងខ្លួន ដោយគាត់ជាកូនប្រសារ អង្គុយចាំនៅលើម៉ូតូ ។
កូនប្រសាររូបនោះបានឲ្យដឹងទៀតថា ដោយសារតែឪពុកចុះលាងខ្លួនយូរពេក គាត់បានហៅឲ្យឡើងទៅហូបបបរនៅផ្សារក្រមួននៅក្បែរនោះ តែឪពុកមិនទៅទេ ដោយប្រាប់ថា នៅងូតទឹកសិន ទៅហូបបបរតែឯងទៅ តែគាត់មិនទៅទេ ដោយអង្គុយបែរខ្នងចាំលើម៉ូតូ ។ លុះមួយសន្ទុះក្រោយពេលក្រឡេកមើលឪពុក ស្រាប់តែបាត់មិនឃើញ ដោយមានការសង្ស័យក៏ចុះរាវមើលទើបប្រទះឃើញឪពុកក្មេកលង់ទឹកស្លាប់បាត់ទៅហើយ ក៏លើឡើងលើគោក បង្កឲ្យមានការភ្ញាក់ផ្អើលតែម្តង ។
ក្រោយពេលកើតហេតុ សពត្រូវបានក្រុមគ្រួសារនាំយកទៅធ្វើបុណ្យតាមប្រពៃណីនៅវត្តសំរោងអណ្តែត ៕
ប្រភព៖ កោះសន្តិភាព
ដោយឡែករំលឹកព័ត៌មានមួយផ្សេងទៀត៖ ចុះដកក្រអាវឈូក មិនទាន់បានដកផងរត់ឡើងមកវិញស្រែកហៅគេឲ្យជួយ
រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ហេតុការណ៍ដ៏ភ្ញាក់ផ្អើលមួយបានកើតឡើងកាលពីវេលាម៉ោង៩ និង២០នាទីព្រឹក ថ្ងៃទី១៩ ខែកុម្ភៈ ឆ្នាំ២០១៧ ខណៈអ្នកដកក្រអាវឈូកលក់ម្នាក់បានប្រទះឃើញសពស្ត្រីម្នាក់នៅក្នុងស្មៅកក់នៅក្នុងទឹកត្រពាំងមួយកន្លែងស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
ប្រភពពីកន្លែងកើតហេតុបានឲ្យដឹងថា មុនពេលកើតហេតុអ្នកដកក្រអាវឈូកម្នាក់បានចុះទៅដកក្រអាវឈូកដើម្បីយកទៅលក់ដើម្បីប្រាក់ចិញ្ចឹមជីវិត ខណៈទើបតែចុះទៅមិនទាន់ទាំងបានដកផង ក៏ប៉ះនឹងរបស់ទន់ៗក៏រាវមើល ស្រាប់តែប៉ះចំសពមនុស្សម្នាក់ធ្វើឲ្យគាត់ភ័យខ្លាចយ៉ាងខ្លាំងក៏រត់ឡើងមកវិញស្រែកហៅគេហៅឯងឲ្យជួយរាយការណ៍ទៅប្រាប់សមត្ថកិច្ច ។
សេចក្តីរាយការណ៍បន្តថា បន្ទាប់ពីទទួលបានព័ត៌មានភ្លាម សមត្ថកិច្ចក៏ចុះទៅដល់កន្លែងកើតហេតុដើម្បីពិនិត្យ តែជាជំហ៊ានដំបូងគ្រាន់តែដឹងថា ជាសពមនុស្សស្រីសង្ស័យស្លាប់ដោយអំពើឃាតកម្មប៉ុណ្ណោះ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]