ប្លែកៗ

វេទមន្តធម្មជាតិ! ទឹកធ្លាក់ពីលើភ្នំ ដូចកំអែលភ្នំភ្លើងហូរ មួយឆ្នាំមានតែម្តង (មានវីដេអូ)

ឈៀងហួរ ៩ ខែមុន

អាមេរិក៖ បាតុភូតធម្មជាតិ ប្រចាំឆ្នាំ 'Firefall' ឬទឹកធ្លាក់ដែលមានពន្លឺដូចជាភ្លើង នៅក្នុងឧទ្យានជាតិ Yosemite National Park បានធ្វើឲ្យមនុស្សម្នាជាច្រើនដែលរង់ចាំមើលទិដ្ឋភាពដ៏អស្ចារ្យមួយនេះរំភើបយ៉ាងខ្លាំង បើទោះបីជាឆ្នាំនេះ មានស្ថានភាពពិបាក ដោយសារលក្ខខណ្ឌអាកាសធាតុអាក្រក់យ៉ាងណាក៏ដោយ។

បាតុភូត 'Firefall' ដែលជាទឹកធ្លាក់ មានពណ៌ទឹកក្រូចភ្លឺចាំង ដូចជាកំអែលភ្នំភ្លើងនេះ ធ្លាក់មកពីកំពូលភ្នំមួយនៃជ្រលងភ្នំ Yosemite ប៉ុន្តែការពិតវាមិនមែនមានពណ៌ទឹកក្រូចនោះទេ ហើយមួយឆ្នាំម្តងបាតុភូតនេះ នឹងកើតមានឡើងក្នុងរយៈពេលខ្លី នៃសប្តាហ៍ទី២ ក្នុងខែកុម្ភៈ។

វាកើតឡើងដោយសារពន្លឺព្រះអាទិត្យរំកិលមកចំមុំស្របនឹងទឹកធ្លាក់ Horsetail Fall ហើយពន្លឺព្រះអាទិត្យចាំងទៅលើផ្ទៃទឹកទាំងមូល ដែលមើលទៅដូចជាភ្លើងកំពុងតែហូរចុះពីលើភ្នំអ៊ីចឹង។ 

វេទមន្តធម្មជាតិមួយនេះ កើតឡើងនៅជ្រលងភ្នំ Yosemite ក្នុងអំឡុងពេលសប្តាហ៍​ទី​២ នៃខែកុម្ភៈ ដែលជាធម្មតាវាតែងតែកើតឡើងនៅថ្ងៃទី១៦ តែសម្រាប់ឆ្នាំនេះ ហាក់មានសភាពលឿនជាងឆ្នាំមុនៗ ដោយវាបានចាប់ផ្តើមឡើងនៅថ្ងៃទី១២ ទៅវិញ ធ្វើឲ្យអ្នកដែលបានធ្វើដំណើរទៅចាំមើលបាតុភូតមួយនេះមានចំនួនតិច។

តែទោះជាយ៉ាងណា អ្នកដែលបានទៅទស្សនាទិដ្ឋភាពដ៏អស្ចារ្យនៅឆ្នាំនេះ ពិតជាមានសំណាងខ្លាំងណាស់ ព្រោះទឹកធ្លាក់មានសភាពធំជាងមុន ដោយសារតែមានភ្លៀងធំ ធ្លាក់ជាច្រើន ព្រមទាំងមានព្រិលក្រាស់ផងដែរនៅក្នុងរដូវនេះ មិនតែប៉ុណ្ណោះអាកាសធាតុក៏មានសភាពស្រលះថែមទៀតផង។

លោក Sangeeta Day ដែលជាអ្នកថតរូបម្នាក់បាននិយាយថា “ឆ្នាំនេះខ្ញុំមានអារម្មណ៍​ថា​មានសំណាងខ្លាំងណាស់ ដោយបានក្លាយជាមនុស្សម្នាក់ ក្នុងចំណោមមនុស្សជាច្រើនទៀត ដែលជាមនុស្សដំបូងបានឃើញបាតុភូតដ៏អស្ចារ្យមួយនេះ។ ហើយរឿងអច្ឆរិយធម្មជាតិបែបនេះ គឺមិនមែនអាចឲ្យយើងបានមើលឃើញដោយងាយស្រួលនោះទេ មិនតែប៉ុណ្ណោះវាថែមទាំងមានរយៈពេលខ្លីទៀតផង”៕

ប្រភព : Dailymail

ដោយឡែកព័ត៌មានគួរឲ្យចាប់អារម្មណ៍មួយទៀត៖ គ្រវីនោះគ្រវី! ចងដឹងទេថា បក្សីពណ៌ស្វាយនេះ មានប្រភពមកពីណា?

ជឿជាក់ថាប្រិយមិត្តច្បាស់ជាបានដឹងហើយពី បក្សីពណ៌ស្វាយ ដែលកំពុងវាយលុកបណ្តាញសង្គមហ្វេសប៊ុករយៈពេលថ្មីៗនេះ។ ប៉ុន្តែមានដែលឆ្ងល់ទេថា បក្សីពណ៌ស្វាយ គ្រវីដាច់ក្បាលចោលនេះ មានប្រភពមកពីណា?

Sticker បក្សីពណ៌ស្វាយនេះ គឺជាប្រភេទសត្វព្រាប ដែលគូរឡើងដោយវិចិត្រករស្រី Syd Weiler មកពីសហរដ្ឋអាមេរិក។ ហើយ Sticker នេះផងដែរ ទទួលបានការពេញនិយមដំបូងបំផុតនៅក្នុងប្រទេសថៃ រហូតមកទល់ថ្មីៗនេះ ត្រូវបានអ្នកលេងហ្វេសប៊ុកចែករំលែកតៗគ្នា ធ្វើឲ្យបក្សីនេះ កាន់តែល្បី និងទទួលបានការចាប់អារម្មណ៍យ៉ាងខ្លាំងពីបណ្តាប្រទេសជុំវិញតំបន់អាស៊ី សូម្បីកម្ពុជាយើងក៏ដូច្នោះដែរ។

គួរបញ្ជា់ថា វាគឺជាប្រភទ Sticker ក្នុងហ្វេសប៊ុកដែលគេឲ្យឈ្មោះវាថា Trash Dove ត្រូវបានគូរឡើងនៅក្នុងខែកញ្ញា ឆ្នាំ២០១៦ ក្រោយមកក៏បានបញ្ចូលទៅក្នុងហ្វេសប៊ុកនៅដើមឆ្នាំ២០១៧នេះតែម្តង។

Trash Dove គឺជា Sticker ដែលមានបែងចែកនូវរូបភាពផ្សេងៗគ្នាជាច្រើន ប៉ុន្តក្នុងនោះ មានមួយដែលពេញនិយមជាងគេគឺ បក្សីដែលគ្រវីក្បាលចុះឡើងៗ ឥតឈប់ ដែលនេះហើយជាមូលហេតុដែល Sticker បក្សីពណ៌ស្វាយនេះ ទទួលបានការចាប់អារម្មណ៍។

ដោយឡែកវិចិត្រករស្រី ឈ្មោះ Syd Weiler បន្ទាប់ពីបានដឹងពីប្រជាប្រិយភាពរបស់វាហើយនោះ នាងបាននិយាយថា « អរគុណអ្នកទាំងអស់គ្នា ជាពិសេសអ្នកគាំទ្រនៅថៃដែលបានធ្វើឲ្យ Sticker នេះល្បី។ ខ្ញុំរីករាយណាស់ដែលអ្នកទាំងអស់គ្នាចូលចិត្តវា» ៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 085836679 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 085836679 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload