ខេត្តពោធិ៍សាត់ ៖ បុរស៣នាក់ពាក់មួកសុវត្ថិភាព និងពាក់ម៉ាស់ជិត បានចូលទៅចាប់ស្ត្រីម្នាក់ចងដៃចងជើង យកស្កុតរុំមាត់មិនឲ្យស្រែក រួចរើកកាយស្រេចចិត្ត រួចប្រមូលយកលុយ និងគ្រឿងអលង្ការមានតម្លៃអស់ប្រមាណជិត១ម៉ឺនដុល្លារ ។ ហេតុការណ៍នេះកើតឡើងកាលពីវេលាម៉ោង៤ទៀបភ្លឺ ថ្ងៃទី១៥ ខែកុម្ភៈ ឆ្នាំ២០១៧ នៅផ្ទះមន្ត្រីប៉េអឹមម្នាក់ ស្ថិតក្នុងភូមិរ៉ា សង្កាត់ផ្ទះព្រៃ ក្រុងពោធិ៍សាត់ ។
សមត្ថកិច្ចឲ្យដឹងថា ស្ត្រីរងគ្រោះឈ្មោះ អិន ស្រីមុំ អាយុ៥០ឆ្នាំ ធ្វើការនៅរោងចក្រកាត់ដេរស្រុក្រគរ មានប្ដីជាមន្ត្រីប៉េអឹម ចំណែកកូនៗទៅរៀននៅឯភ្នំពេញអស់ ។
តាមការសាកសួររបស់សមត្ថកិច្ចឲ្យដឹងថា នៅយប់នោះបុរសជាប្ដីមិននៅផ្ទះទេ គឺជាប់រវល់ទៅប្រចាំការនៅឯកន្លែងធ្វើការ ដោយទុកឲ្យស្ត្រីជាប្រពន្ធដេកនៅចាំផ្ទះម្នាក់ឯង ។ លុះវេលាម៉ោង៤ទៀបភ្លឺ ស្ត្រីរងគ្រោះបានបើកទ្វាចុះមកដាំបាយដើម្បីរៀបចំហូបចុក និងវេចខ្ចប់យកទៅធ្វើការនៅរោងចក្រដូចសព្វដង ។ ខណៈកំពុងដាំបាយស្រាប់តែមានមនុស្សប្រុស៣នាក់ពាក់មួកសុវត្ថិភាព និងម៉ាស់ដើរចូលមក ដោយម្នាក់កាន់ដាវ ម្នាក់ដកកាំភ្លើងភ្ជង់ និងម្នាក់ទៀតយកស្កុតមករុំមាត់មិនឲ្យស្រែក និងចងដៃចងជើង បន្ទាប់មកពួកគេបានដើររើកកាយពេញផ្ទះយកលុយក្នុងទូអស់ចំនួន៧ពាន់ដុល្លាអាមេរិក មាស៦ជី និងប្រាក់៦ជី រួចនាំគ្នាឡើងជិះម៉ូតូចេញទៅបាត់អស់តែម្ដង ។
ស្ត្រីរងគ្រោះឲ្យដឹងថា លុយ៧ពាន់ដុល្លាអាមេរិកនេះជាលុយដែលគាត់ទើបលក់ដីបានប៉ុន្មានថ្ងៃមុននេះ ឥឡូវមិនទាន់បានចាត់ចែងធ្វើអ្វីផងក៏ត្រូវក្រុមចោរប្លន់អស់តែម្ដង ។
សូមបញ្ជាក់ថា កាលពីថ្ងៃទី១៥ កុម្ភៈ សមត្ថកិច្ចបានឃាត់ខ្លួនបុរសម្នាក់សង្ស័យថាជាក្រុមរបស់ចោរប្លន់ខាងលើ ប៉ុន្តែពេលសួរនាំទៅមិនមានជាប់ពាក់ព័ន្ធក៏ដោះលែងទៅវិញទៅ ។
សមត្ថកិច្ចបានធ្វើការសន្និដ្ឋានថា ករណីប្លន់នេះក្រុមចោរមានគម្រោងគិតទុកជាមុន ។ ក្រុមចោរខាងលើអាចស្គាល់ម្ចាស់ផ្ទះ ហើយដឹងរឿងម្ចាស់ផ្ទះលក់ដីបានលុយទៀតមើលទៅ ព្រោះពេលធ្វើសកម្មភាពប្លន់នោះពួកគេបានពាក់មួកសុវត្ថិភាព និងពាក់ម៉ាស់ ដើម្បីកុំឲ្យម្ចាស់ផ្ទះស្គាល់មុខ ។ ករណីនេះសមត្ថកិច្ចកំពុងសហការគ្នាតាមស្រាវជ្រាវវែកមុខរកក្រុមចោរប្លន់ទាំងនោះ ដើម្បីចាប់ខ្លួនយកមកដាក់ទោសច្បាប់ ៕
ប្រភព៖ កោះសន្តិភាព
ដោយឡែករំលឹកព័ត៌មានមួយផ្សេងទៀត៖ បានប្រាណចង់ដោះដៃ មិនព្រមចូលស្តីតាមសន្យា ប្តឹងប៉ូលិសថាចាប់រំលោភ
ខេត្តកំពង់ស្ពឺ ៖ គូស្នេហ៍ដែលស្រឡាញ់គ្នារហូតបានខ្លួនប្រាណរួចហើយកន្តើយចង់ដោះដៃមិនចូលស្តីដណ្តឹង ត្រូវឪពុកនារីរងគ្រោះប្តឹងពីបទចាប់រំលោភ ព្រោះតែមិនចេះទទួលខុសត្រូវទង្វើរបស់ខ្លួន ។
សមត្ថកិច្ចនគរបាលស្រុកឧដុង្គបានឱ្យដឹងថា ករណីនេះជារឿងត្រូវរ៉ូវគ្នា ដែលបានកើតឡើងតាំងពីថ្ងៃទី១០ ខែកុម្ភៈ វេលាម៉ោង១០យប់នៅក្នុងឃុំចាន់សែន ស្រុកឧដុង្គ ។ យុវជនជាប់ចោទឈ្មោះ អ៊ី អ៊ីម អាយុ១៩ឆ្នាំ រស់នៅក្នុងឃុំខាងលើ ចំណែភាគីខាងស្រីអាយុទើប១៥ឆ្នាំ គឺជាអនីតិជន ។
សមត្ថកិច្ចបន្តថា នៅថ្ងៃទី១៣ ខែកុម្ភៈ វេលាម៉ោង១១និង៥នាទី ឪពុកក្មេងស្រីបានដាក់ពាក្យប្តឹងយុវជនរូបនេះ ពីបទបានធ្វើសកម្មភាពចាប់រំលោភកូនស្រីរបស់គាត់បានសម្រេចចំនួន២លើក កាលពីពេលថ្មីៗកន្លងទៅ ។ ក្រោយពីទទួលពាក្យបណ្តឹង សមត្ថកិច្ចបានឃាត់ខ្លួនយុវជនរូបនេះនាំមកអធិការដ្ឋាននគរបាលស្រុក ដើម្បីសាកសួរ ។
នៅចំពោះមុខសមត្ថកិច្ច យុវជនជាប់ចោទឆ្លើយថា នេះមិនមែនជាការចាប់រំលោភទេ គឺជាការព្រមព្រៀងគ្នាដោយមិនមានការបង្ខិតបង្ខំឡើយ ព្រោះរវាងរូបនាងនិងរូបគេគឺជាសង្សារនឹងគ្នាជាយូរមកហើយ ។
ដោយឡែក នារីរងគ្រោះនិយាយថា នាងនិងជនជាប់ចោទធ្វើការនៅរោងចក្រជាមួយគ្នានិងបានស្រឡាញ់គ្នា ដោយខាងប្រុសសន្យាថា នឹងចូលស្តីដណ្តឹងនាងយកធ្វើជាប្រពន្ធ រហូតដល់នាងជឿលង់ចិត្តក៏បានប្រគល់ខ្លួនប្រាណឱ្យសង្សាររបស់ខ្លួនដោយមិនស្រណោះព្រោះតែជឿជាក់ថា សង្សារនឹងចូលស្តីដណ្តឹងរៀបការតាមច្បាប់ ។
នារីរងគ្រោះបន្តថា ក្រោយពីបានខ្លួនប្រាណនាងហើយ នៅពេលនាងសួរនាំរឿងចូលស្តីដណ្តឹងម្តងជា២ដង សង្សាររូបនេះចេះតែគេចវេះដូចជាមិនចង់ជួបដើម្បីទទួលខុសត្រូវក្នុងទង្វើរបស់ខ្លួន ទើបនាងយករឿងនេះប្រាប់ឪពុកម្តាយ ហើយឪពុកនាងបានដាក់ពាក្យបណ្តឹងដើម្បីឱ្យសមត្ថកិច្ចកោះហៅមកសាកសួរនៅប៉ុស្តិ៍នគរបាលរដ្ឋបាលដើម្បីចាត់ការតាមច្បាប់ ។
សមត្ថកិច្ចបានបញ្ជាក់ថា នៅព្រឹកថ្ងៃទី១៤ខែកុម្ភៈ ជនជាប់ចោទត្រូវបានមន្ត្រីជំនាញកសាងសំណុំរឿងបញ្ជូនទៅកាន់ស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធី ដោយសារតែគេមានកំហុសរួមរ័កជាមួយអនីតិជន ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
