រាជធានីភ្នំពេញ ៖ បុរស៥នាក់ ខណៈចូលច្រៀងខារ៉ាអូខេ សំរិទ្ធិ មាស នៅតាមបណ្តោយផ្លូវបេតុងវលេខ២០០៤ សង្កាត់កាកាប ខណ្ឌពោធិ៍សែនជ័យ ហើយចង់ស្ទាបភ្លៅនារីចាប់ទឹកកក តែនាងមិនព្រមឲ្យស្ទាប ស្រាប់តែមួម៉ៅបោកកែវបោកក្បាលមេក្រូបង្កឲ្យមានការភ្ញាក់ផ្អើល កាលពីវេលាម៉ោង៨ និង៣៥នាទីយប់ ថ្ងៃទី១៥ ខែកុម្ភៈ ឆ្នាំ២០១៧ ។
ប្រភពព័ត៌មានពីមេការ អ្នកកាន់បន្ទប់បានឲ្យដឹងថា នៅវេលាម៉ោងជាង ៦ព្រលប់ថ្ងៃកើតហេតុមានភ្ញៀវបុរស៥នាក់ ជិះម៉ូតូ៤គ្រឿង ម៉ាកហុងដាឌ្រីម១គ្រឿង ម៉ាកវ៉េវ២គ្រឿង និងស្មាស់ REVO ១គ្រឿង បានចូលច្រៀងខារ៉ាអូខេក្នុងបន្ទប់លេខ២ ផឹកស្រាបៀរអស់១កេសដោយមិនបាន យកនារីអូតេសអង្គុយកំដរទេ មានតែនារីម្នាក់ជាអ្នកចាក់បទចំរៀង និងនារីចាប់ទឹកកក២នាក់ទៀត ។ លុះបុរសទាំង៥នាក់ផឹកស្រាបៀរអស់១កេសហើយបានហៅ១កេសទៀត ។
ពេលនោះបុរសទាំង៥នាក់ ហាក់រៀងស្រវឹងបន្តិច ហើយចង់ស្ទាបភ្លៅនារីចាប់ទឹកកក តែនាងមិនព្រមឲ្យស្ទាប ស្រាប់តែខឹងម៉ួម៉ៅស្រែកថា អស្ចារ្យអី គ្រាន់តែស្រីខារ៉ាអូខេសោះ រួចហើយបានបោះ ក្បាលមីក្រូហ្វូនចោលរបៀបឌឺដង ប៉ុន្តែភ្លាមៗនោះក្បាលមីក្រូហ្វូននៅច្រៀងកើតនៅឡើយទេ និងបានបោកកែវអស់២ទៀត ពេលនោះនារីចាប់ទឹកកកនៅក្នុងបន្ទប់ បានរត់ទៅប្រាប់ថៅកែ ឲ្យគិតលុយថ្លៃបែកកែវអស់២ កែវ១ថ្លៃ១០ដុល្លារ និងគិតថ្លៃមីក្រូហ្វូន៣០ដុល្លារ ។
បន្ទាប់ពីផឹកស៊ីរួចរាល់ហើយ បុរសទាំង៥នាក់ បានហៅគិតលុយអស់ប្រាក់សរុបទាំងអស់១៦០ដុល្លារ ក្នុងនោះថ្លៃស្រាបៀរ២កេស៦០ដុល្លារ និងថ្លៃខូចខាតរបស់របរក្នុងបន្ទប់ខារ៉ាអូខេ ធ្វើឲ្យបុរសទាំង៥នាក់ខឹងម៉ួម៉ៅ និងរកវាយបុគ្គលិកក្នុងហាង ព្រមទាំងវាយកម្ទេចកញ្ច្រែងដាក់ស្ករគ្រាប់ ឲ្យម្រិញគង់វាលចោលទៀត និងមិនព្រមសងថ្លៃខូចខាតទេ មិនតែប៉ុណ្ណោះប្រាប់ឲ្យ ខាងខារ៉ាអូខេប្តឹង ដល់ណាក៏ប្តឹងទៅ ទើបថៅកែខារ៉ាអូខេប្តឹងសមត្ថកិច្ច ចុះមកដល់សម្របសម្រួល ប្រាប់ទៅបុរសទាំង៥នាក់ដែលធ្វើឲ្យខូចខាតរបស់គេ ត្រូវសងសំណងចំនួន១១០ដុល្លារ ដើម្បីបញ្ចប់រឿង ៕
ប្រភព៖ កោះសន្តិភាព
ដោយឡែក ព័ត៌មានចាប់អារម្មណ៍មួយផ្សេងទៀត៖
នាយិកាក្រុមហ៊ុនស្រីរ័ត្នទេសចរណ៍អន្តរជាតិ ត្រូវកម្លាំងកងរាជអាវុធហត្ថបញ្ជូនទៅតុលាការ
រាជធានីភ្នំពេញ ៖ នាយិកាក្រុមហ៊ុន ស្រីរ័ត្ន ទេសចរណ៍អន្តរជាតិ កាលពីរសៀលថ្ងៃទី១៥ កុម្ភៈ ត្រូវបានកម្លាំងសមត្ថកិច្ច កងរាជអាវុធហត្ថរាជធានីភ្នំពេញ បញ្ជូនខ្លួនទៅកាន់សាលាដំបូង ដើម្បីជូនតំណាងអយ្យការ ធ្វើការសាកសួរពីបទឆបោក។
នាយិការូបនោះឈ្មោះ រស់ សុធីរ័ត្ន អាយុ៣៥ឆ្នាំ ស្នាក់នៅផ្ទះលេខ១៧E0 ផ្លូវលេខ១២៨ សង្កាត់មិត្តភាព ខណ្ឌ៧មករា រាជធានីភ្នំពេញ។ គួរបញ្ជាក់ថា កម្លាំងសមត្ថកិច្ចកងរាជអាវុធហត្ថរាជធានីភ្នំពេញ សហការជាមួយកម្លាំង អាវុធហត្ថខណ្ឌ៧មករា កាលពីម៉ោង៨ និង៣០នាទីយប់ ថ្ងៃទី១៣ កុម្ភៈ ២០១៧ បានធ្វើការឃាត់ខ្លួននាយិកាក្រុមហ៊ុន ស្រីរ័ត្ន ទេសចរណ៍អន្តរជាតិ នៅចំណុចផ្ទះលេខ១៧E0 ផ្លូវលេខ១២៨ សង្កាត់មិត្តភាព ខណ្ឌ៧មករា។
ការឃាត់ខ្លួននាយិកាក្រុមហ៊ុននោះ ត្រូវបានសមត្ថកិច្ចអះអាងថា គឺជាការធ្វើឡើងតាមពាក្យបណ្តឹងរបស់អតិថិជន ប្រមាណ៤០នាក់ បានទៅតវ៉ានៅមុខក្រុមហ៊ុន ដោយចោទប្រកាន់ថា ក្រុមហ៊ុនបោកប្រាស់លក់សំបុត្រយន្តហោះអត់មានកៅអីអង្គុយ និងមិនមានជើងយន្តហោះ ហោះហើរ។ នាយិការូបនោះឈ្មោះ រស់ សុធីរ័ត្ន អាយុ៣៥ឆ្នាំ ស្នាក់នៅអាសយដ្ឋានឃាត់ខ្លួនខាងលើ។
ដើមចមនៃការឃាត់ខ្លួន នាយិកាក្រុមហ៊ុននោះ ត្រូវបានមន្ត្រីកងរាជអាវុធហត្ថឲ្យដឹងថា កន្លងទៅមានអតិថិជនច្រើននាក់ បានយកប្រាក់ទៅកក់ នៅក្រុមហ៊ុនស្រីរ័ត្ន ទេសចរណ៍អន្តរជាតិ ដើម្បីទិញសំបុត្រយន្តហោះទៅដើរលេង ក្រៅប្រទេស។
ខាងក្រុមហ៊ុនបានសន្យា ជាមួយអតិថិជន ថានឹងប្រគល់សំបុត្រយន្តហោះឲ្យទៅអតិថិជនតាមថ្ងៃកំណត់ លុះដល់ថ្ងៃកំណត់ ត្រូវធ្វើដំណើរទៅដើរ ស្រាប់តែក្រុមហ៊ុនមិនបានប្រគល់សំបុត្រ យន្តហោះឲ្យអតិថិជននោះទេ។
មន្ត្រីកងរាជអាវុធហត្ថបន្តថា មានអតិថិជនខ្លះត្រូវក្រុមហ៊ុន ប្រគល់សំបុត្រយន្តហោះឲ្យដល់ដៃហើយ ប៉ុន្តែនៅពេលដល់ម៉ោង ត្រូវឡើងយន្តហោះ ស្រាប់តែមន្ត្រីអាកាសយានបញ្ជាក់ថា សំបុត្រនោះមិនមានកន្លែងអង្គុយទេ ពោលគឺមានគេទិញបាត់ហើយ ដូច្នេះអតិថិជននោះបង្ខំចិត្ត ត្រូវទិញសំបុត្រថ្មី នៅព្រលានយន្តហោះក្នុងតម្លៃខ្ពស់ ធ្វើយ៉ាងណាឲ្យខាងតែបាន ព្រោះដល់ពេលវេលាត្រូវចេញដំណើរ។
ដោយសារតែមានរឿង កើតឡើងញឹកញាប់យ៉ាងដូច្នេះ អតិថិជនបានទៅទាមទារយកប្រាក់កក់ពីក្រុមហ៊ុននោះវិញ។ តែម្តងហើយម្តងទៀត នាយិកាមានសម្ដីត្រជាក់ បានគេចវេសមិនព្រមសងប្រាក់កក់ ឲ្យទៅអតិថិជនវិញទេ បានជានៅថ្ងៃទី១៣ កុម្ភៈ ២០១៧ អតិថិជនប្រមាណ៤០នាក់ នាំគ្នាប្រមូលផ្តុំនៅមុខ ទីស្នាក់ការក្រុមហ៊ុន ដើម្បីតវ៉ាយកប្រាក់ ដោយភ្ជាក់នូវពាក្យបណ្តឹងរៀងៗខ្លួន ទៅជាមួយផងដែរ។
ជាហេតុធ្វើឲ្យសមត្ថកិច្ចសម្រេច ឃាត់ខ្លួននាយិកាឈ្មោះ រស់ សុធីរ័ត្ន ទៅកាន់ទីបញ្ជាការកងរាជអាវុធហត្ថរាជធានីភ្នំពេញ ដើម្បីធ្វើការសាកសួរ និងដោះស្រាយលើពាក្យបណ្តឹងរបស់ជនរងគ្រោះ ដែលជាអតិថិជនត្រូវក្រុមហ៊ុន (ស្រីរ័ត្នទេសចរណ៍អន្តរជាតិ)ពាក់ព័ន្ធថា បានរំលោភលើសេចក្ដីទុកចិត្ត៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]