រាជធានីភ្នំពេញ ៖ ស្ត្រីជាកម្មការិនីរោងចក្រម្នាក់ បានធ្វើដំណើរទៅកាន់ប៉ុស្ដិ៍ចោមចៅ ដាក់ពាក្យបណ្ដឹង សុំការអន្តរាគមន៍ពីនគរបាល ដោយនាងប្រាប់ថា មានជនខិលខូចបានទូរស័ព្ទមកកាន់នាងថា នាងបានឈ្នះរង្វាន់ជាទឹកប្រាក់ចំនួន១ម៉ឺនដុល្លារពីធនាគារមួយ ។
ខណៈនោះនាងមានការត្រេកអរខ្លាំងណាស់ ហើយជននោះ បានប្រាប់ឲ្យនាងវេរលុយចំនួន១.១៥០ដុល្លារ ដើម្បីរត់ការឯកសារ និងមិនឲ្យនាងនិយាយរឿងនេះប្រាប់នរណាម្នាក់ឡើយ។ ដោយសារតែខ្វះការពិចារណា នាងក៏បានធ្វើតាមការបង្គាប់របស់ជនខិលខូច លុះក្រោយពេលផ្ញើអស់លុយ ទើបដឹងថា ចាញ់បោកជននោះ នាងក៏បានប្ដឹងឲ្យនគរបាលជួយតែម្ដង។
ហេតុការណ៍នេះ បានកើតឡើងកាលពីវេលា ម៉ោង៨ព្រឹក ថ្ងៃទី១៤ ខែកុម្ភៈ ឆ្នាំ២០១៧ នៅក្នុងភូមិជម្ពូវ័ន្ត សង្កាត់ចោមចៅ ខណ្ឌពោធិ៍សែនជ័យ លុះដល់វេលាម៉ោង១រសៀល ថ្ងៃទី១៥ ខែកុម្ភៈ ឆ្នាំ២០១៧ ទើបនាងបានរត់ទៅប្តឹងឲ្យនគរបាលជួយអន្តរាគមន៍។
ស្ត្រីដែលប្រាក់ក៏បង់ ថង់ក៏ដាច់នោះ ឈ្មោះ ហម ផល្លី អាយុ៣០ឆ្នាំ មុខរបកម្មការិនីរោងចក្រកាត់ដេរ ស្នាក់នៅក្នុងភូមិជម្ពូវ័ន្ត សង្កាត់ចោមចៅ ខណ្ឌពោធិ៍សែនជ័យ ហើយលុយដែលចាញ់បោកគេនោះ សរុបមានចំនួន១.១៥០ដុល្លារ។ ស្ត្រីរងគ្រោះបានឲ្យដឹងថា កាលពីវេលាព្រឹកថ្ងៃទី១៤ ខែកុម្ភៈ ឆ្នាំ២០១៧ មានមនុស្សប្រុសម្នាក់បានខលមកប្រាប់នាងថា នាងមានសំណាងបានឈ្នះរង្វាន់ ពីកម្មវិធីពិសេសធនូវទឹកប្រាក់៥.០០០ដុល្លារ។
បន្ទាប់មកជនសង្ស័យនោះ បានបង្គាប់ឲ្យនាង ផ្ញើលុយតាមវិញទៅឲ្យគេចំនួនសិន ដើម្បីរត់ឯកសារ ដោយបញ្ជាក់ថា លុយទាំងនោះគឺជារបស់នាង ហើយគេនឹងវេរលុយនោះមកឲ្យនាងតាមរយៈវីងមកវិញ។ ខណៈនោះដោយសារតែខ្វះការពិចារណា ព្រោះតែត្រេកអរខ្លាំងពេក នាងក៏បានយល់ព្រមដោយ ផ្ញើរលុយម្ដង១០០ដុល្លារៗជាបន្តបន្ទាប់ទៅឲ្យជននោះ ។
ស្ត្រីរូបនោះបានបន្តថា ក្រោយពេលដែលនាងវេរលុយឲ្យបានខ្លះ ជនសង្ស័យនោះក៏បានខលមកម្តងទៀតដោយប្រាប់ថា លុយរបស់នាងដែលឈ្នះរង្វាន់នោះ បានកើនឡើងរហូតដល់១ម៉ឺនដុល្លារហើយ ដែលបានធ្វើឲ្យនាងមានចិត្ត រំភើបក្រៃលែងរកអ្វីប្រៀបផ្ទឹមមិនបានឡើយ ព្រោះនៅសុខៗស្រាប់តែ មានសំណាងម្លឹងៗ ហើយក៏បានធ្វើតាមជននោះវេរលុយបន្ថែម រហូតគ្រប់ចំនួន១.១៥០ដុល្លារ។
បន្ទាប់មក នាងបានទន្ទឹងរង់ចាំការផ្ញើលុយ១ម៉ឺនដុល្លារត្រឡប់មកវិញយ៉ាងអន្ទះសារ ប៉ុន្តែចាំបាត់ៗគ្មានដំណឹងនោះទេ ក្រោយមកនាងខលទៅសួរជននោះ ប៉ុន្តែស្រាប់តែបិទទូរស័ព្ទទាក់ទង់លែងចូល ទើបដឹងថា ត្រូវចាញ់បោកជនខិលខូចខាងលើ ហើយក៏និយាយប្រាប់អ្នកជិតខាង ក៏ត្រូវអ្នកជិតខាងប្រាប់ថា នាងចាញ់បោកជននោះហើយ ទើបទីបំផុតនាងសម្រេចចិត្ត ប្ដឹងឲ្យនគរបាលជួយការ អន្តរាគមន៍តែម្ដង៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]