(កំពត)៖ កម្លាំងនគរបាលស្រុកដងទង់ ខេត្តកំពតក្រោមការបញ្ជាពីលោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្ត បានចាប់ជនគ្រឿងញៀន៤នាក់ ក្នុងនោះព្រះសង្ឃ៣អង្គ នៅថ្ងៃទី១៥ ខែកុម្ភៈ ឆ្នាំ២០១៧នេះ នៅចំណុចវត្តថៅកុង ភូមិព្រៃឃ្មុំ ឃុំខ្ជាយខាងជើង។
បើតាមនគរបាល ជនគ្រឿងញៀន ដែលចាប់ខ្លួនបាននេះទី១៖ ឈ្មោះ ច្រឹត វី អាយុ៣១ឆ្នាំ នៅភូមិព្រៃកែស ឃុំដំណាក់កន្ទួតខាងជើង ស្រុកកំពង់ត្រាច, ទី២៖ឈ្មោះ ញេវ ពិទូ (ព្រះសង្ឃ) ព្រះជន្ម១៦វស្សា, ទី៣៖ឈ្មោះ មាស សុភា (ព្រះសង្ឃ) ព្រះជន្ម១៨វស្សា និង៤៖ឈ្មោះ ប៉ុន តាំង (ព្រះសង្ឃ) ព្រះជន្ម១៦វស្សា ក្នុងនោះជំនាញ ដកហូតបានថ្នាំញៀនចំនួន៥កញ្ចប់។
បច្ចុប្បន្នជនសង្ស័យទាំង៤នាក់ កំពុងកសាងសំណុំរឿងដើម្បីអនុវត្តតាមនីតិវិធី៕
ប្រភព៖ Fresh News
ដោយឡែករំលឹកព័ត៌មានមួយផ្សេងទៀត៖ ឧក្រិដ្ឋជនអាជីពមួយក្រុម សម្លាប់មនុស្សនៅប្រទេសថៃ រត់មកសម្ងំលាក់ខ្លួននៅកម្ពុជា ត្រូវកម្លាំងនគរបាលអន្តោប្រវេសន៍ ចាប់ខ្លួនម្នាក់ និង៣នាក់កំពុងគេចខ្លួន
(ភ្នំពេញ)៖ កម្លាំងនគរបាលអន្តោប្រវេសន៍ ក្រសួងមហាផ្ទៃ នៅថ្ងៃទី១៥ ខែកុម្ភៈ ឆ្នាំ២០១៧នេះ បានចាប់បុរសជនជាតិអង់គ្លេសម្នាក់ ក្នុងចំណោមបក្ខពួក៤នាក់ ដែលជាក្រុមឧក្រិដ្ឋជនឆ្លងដែន ក្រោយក្រុមពិឃាតអាជីពទាំនេះ បានសម្លាប់មនុស្សនៅប្រទេសថៃ ហើយលួចរត់មកសម្ងំលាក់ខ្លួននៅកម្ពុជា ក្នុងថ្ងៃនេះតែម្ដង។
មន្រ្តីនគរបាលអន្តោប្រវេសន៍ ដែលចូលរួមក្នុងប្រតិបត្តិការនោះ បានឲ្យដឹងថា ក្រុមឧក្រិដ្ឋជនមានគ្នា៤នាក់ តែចាប់បានម្នាក់ ជាជនជាតិ អង់គ្លេស ចំណែក៣នាក់ទៀត កំពុងរត់គេចខ្លួន ហើយកម្លាំងសមត្ថកិច្ចចម្រុះក៏កំពុងតាមប្រមាញ់យ៉ាងសស្រះ សស្រាំផងដែរ។
មន្រ្តីនគរបាលអន្តោប្រវេសន៍ បានបង្ហើបប្រាប់ថា នាពេលកន្លងមក ជនសង្ស័យមានវិវាទរឿងពាណិជ្ជកម្មនៅប្រទេសថៃជាមួយ ជនរងគ្រោះដែលស្លាប់នោះ ហើយជននេះបានបញ្ជាឲ្យជនសង្គមងងឹតជាដៃជើងរបស់ខ្លួន សម្លាប់គូវិវាទនោះទៅ។ បន្ទាប់មក មេក្លោងជនជាតិអង់គ្លេស និងបក្ខពួក បានរត់គេចខ្លួនមកសម្ងំលាក់ខ្លួន នៅប្រទេសកម្ពុជា ហើយក៏ត្រូវបានកម្លាំងសមត្ថកិច្ច កម្ពុជាចាប់ខ្លួនតែម្ដង។
មន្រ្តីនគរបាលបានបន្តថា ខាងស្ថានទូតអង់គ្លេសមិនអនុញ្ញាតឲ្យបញ្ជូនជនសង្ស័យជនជាតិអង់គ្លេងម្នាក់នេះ ទៅកាត់ទោសនៅ ប្រទេសថៃវិញទេ គឺប្រគល់ជូនសមត្ថកិច្ចរបស់តុលាការកម្ពុជា ជាអ្នកដោះស្រាយតាមនីតិវិធីច្បាប់។
ទោះបីយ៉ាងណា សមត្ថកិច្ចនៅមិនទាន់បង្ហាញអត្តសញ្ញាណជនសង្ស័យខាងលើនៅឡើយទេ ហើយកំពុងដំណើរការសំណុំរឿង ជនខាងលើ ជាបណ្ដើរៗហើយ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
