រាជធានីភ្នំពេញ ៖ យុវជនម្នាក់ដោយសារតែខឹងគេហៅថា ខ្ទើយ ក៏ក្លាយជាទំនាស់ពាក្យសម្ដីឈានទៅប្រើហឹង្សា បណ្តាលឱ្យរងរបួសខ្លួនឯង រយះថ្ងាស់យ៉ាងដំណំ។ ករណីទំនាស់ខាងលើកើតឡើងម៉ោង០៨និង៣០នាទីយប់ ថ្ងៃទី១១ កុម្ភៈ ២០១៧ នៅផ្លូវបេតុង ភូមិថ្មគោ១ សង្កាត់ចោមចៅ ខណ្ឌពោធិ៍សែនជ័យ។
យុវជនដែលរងរបួសឈ្មោះ គឹម ង៉ែត អាយុ១៧ឆ្នាំ មុខរបរកម្មករសំណង់ ស្នាក់នៅផ្លូវបេតុង ភូមិថ្មគោ១ សង្កាត់ចោមចៅ ខណ្ឌពោធិ៍សែនជ័យ របួសថ្ងាស់មុខផ្នែកខាងឆ្វេង។ អ្នកបង្កឈ្មោះ កង ពេជមុន្នី ភេទប្រុស អាយុ៣៣ឆ្នាំ មុខរបរនៅផ្ទះ ស្នាក់នៅផ្ទះជួលភូមិថ្មគោ១ សង្កាត់ចោមចៅ ខណ្ឌពោធិ៍សែនជ័យ ។
តាមសម្ដីយុវជនរងគ្រោះបានប្រាប់ថា មុនកើតហេតុខណៈដែលខ្លួនដើរមកលេងក្រៅផ្ទះស្រាប់តែមនុស្សក្នុងផ្ទះ ជនបង្កបានស្រែកដៀមដាមឱ្យខ្លួនថា ជាខ្ទើយ ដោយសារខឹងក៏ក្លាយជាទំនាស់ពាក្យសម្ដីទៅវិញទៅមក ស្រាប់តែគ្រួសារជនបង្កខាងលើមានគ្នាប្រហែល១០នាក់មកព្រួតវាយមកលើគាត់តែម្នាក់ឯង បណ្តាលឱ្យរងរបួសរយះថ្ងាស់ខាងឆ្វេងហូរឈាមពេញមុខតែម្តង។
បើតាមសម្ដីបុរសដែលចោទជាអ្នកបង្កបានប្រាប់សមត្ថកិច្ចថា មុនកើតហេតុក្មួយស្រីគាត់ឈ្មោះ រុណ សុភត្ត្រា អាយុ១៩ឆ្នាំ បានមកឈរលេងមុខផ្ទះ ក្រោយមកស្រាប់តែឃើញមានទំនាស់ជាមួយយុវជនខាងលើ ពេលនោះគាត់បានចេញពីក្នុងផ្ទះមកជួយអន្តរាគមន៍ និងបានប្រវាយប្រតប់ជាមួយយុវជនខាងលើមែន ប៉ុន្តែប្រើដៃទៅវិញទៅមកទេ ចំណែកក្បាលដែលបែកនោះ គឺយុវជននេះដួលប៉ះដុំថ្មដោយខ្លួនឯងទេ។
ប្រភពពីប្រជាពលរដ្ឋដែលស្នាក់នៅក្បែចំណុចខាងលើ បានលួចប្រាប់ថា តាមពិតគ្រួសារទាំង០២ខាងលើនេះ ឃើញមានទំនាស់ជេរគ្នាទៅវិញទៅមកតាំងពីរសៀលថ្ងៃទី១០ កុម្ភៈ មកម្ល៉េះ និងចេះតែដៀមតាមសម្ដីទៅវិញទៅមក រហូតដល់យប់កើតហេតុផ្ទុះរឿងវាយតប់គ្នាតែម្តង។
ក្រោយហេតុការណ៍កើតឡើងសមត្ថកិច្ចមូលដ្ឋានបានហៅភាគីសងខាងមក សម្របសម្រួលគ្នាបញ្ចប់រឿងនៅប៉ុស្តិ៍នគរបាលរដ្ឋបាលចោមចៅ ដោយគ្រាន់ចេញថ្លៃថ្នាំព្យាបាល។
ប្រភព៖ កោះសន្តិភាព
ដោយឡែករំលឹកព័ត៌មានមួយផ្សេងទៀត៖ ប្រយ័ត្ន !! ល្បិចថ្មី យកស្រីស្អាតធ្វើជាធ្នាក់
ខេត្តកំពង់ស្ពឺ ៖ មុខសញ្ញាប្លន់ដែលតែងតែធ្វើសកម្មភាពនាពេលកន្លងមក ពេលនេះអស់លក្ខណ៍ត្រូវបានសមត្ថកិច្ចនគរបាលស្រុកសំរោងទង ឃាត់ខ្លួនបាន ខណៈបក្សពួក២នាក់ទៀត យកម៉ូតូដែលប្លន់បានជិះគេចខ្លួនបាត់។ ក្រោយឃាត់ខ្លួនបានសមត្ថកិច្ចកំពុងកសាងសំណុំរឿងបញ្ជូនទៅកាន់ការិយាល័យព្រហ្មទណ្ឌកំរិតស្រាលចាត់ការបន្ត។
ការឃាត់ខ្លួនក្រុមជនសង្ស័យធ្វើឡើងកាលវេលាម៉ោង1 ថ្ងៃទី11 ខែកុម្ភៈ ឆ្នាំ2017 នៅចំណុចតាមផ្លូវជាតិលេខ4 គីឡូម៉ែត្រលេខ42-43 ស្ថិតនៅភូមិចំបក់ ឃុំវល្លិស ស្រុកសំរោងទង ខេត្តកំពង់ស្ពឺ។
ជនសង្ស័យដែលជាមុខសញ្ញាប្លន់ ១-ឈ្មោះ មុត ផល្លី ភេទប្រុស អាយុ17ឆ្នាំ នៅភូមិរលាំងសង្កែ សង្កាត់សុព័រទេព ក្រុងច្បារមន ខេត្តកំពង់ស្ពឺ ២-ឈ្មោះ សុខ អាទិត្យ ភេទប្រុស អាយុ20ឆ្នាំ នៅភូមិស្នោរទី1 សង្កាត់រកាធំ ក្រុងច្បារមន ខេត្តកំពង់ស្ពឺ។ ជនរងគ្រោះជាម្ចាស់ម៉ូតូឈ្មោះ ម៉ៅ ប៊ុនថា ភេទប្រុស អាយុ19ឆ្នាំ នៅភូមិក្រាំងចចាប ឃុំមហាសាំង ស្រុកភ្នំស្រួច ខេត្តកំពង់ស្ពឺ ។
ប្រភពពីសមត្ថកិច្ចនគរបាលបានឱ្យដឹងថា ក្រុមជនសង្ស័យ រួមទាំងបក្សពួកបានធ្វើសកម្មភាពវាយប្លន់យកម៉ូតូ1គ្រឿង ម៉ាកស៊ូម័រ ពណ៌ខៀវ ស៊េរីឆ្នាំ2015 គ្មានផ្លាកលេខ ជារបស់ជនរងគ្រោះខាងលើ។ ក្រុមជនសង្ស័យបានប្រើល្បិចដោយឱ្យមនុស្សស្រីម្នាក់ទាក់ទងជាមួយជនរងគ្រោះនៅក្នុងក្លឹប ក្រោយមកពេលស្គាល់គ្នាមួយភ្លែតហើយនោះ ក៏បានប្រើល្បិចថា ពឹងឱ្យជូនទៅផ្ទះ ពេលទៅដល់កន្លែងស្ងាត់ដែលជាគោលដៅដែលពួកគេណាត់គ្នាទុកជាមុននោះ បន្ទាប់មកមនុស្សស្រីដែលបក្សពួកគេរបស់ជនសង្ស័យនោះបានប្រាប់ឱ្យជនរងគ្រោះឱ្យឈប់ ស្រាប់តែពេលនោះក្រុមជនដៃដល់ក៏ចេញមកវាយប្លន់យកម៉ូតូពីជនរងគ្រោះតែម្តង។ ក្រោយពីវាយប្លន់បានហើយ ស្រីម្នាក់ដែលបក្សពួករបស់គេដែលប្រើជានុយសម្រាប់ទាក់នោះ ក៏យកម៉ូតូជិះគេចខ្លួនបាត់តែម្តង ។ ក្រោយកើតហេតុសមត្ថកិច្ចបានចុះអន្តរាគមន៍ឃាត់ខ្លួនជនសង្ស័យទាំង២នាក់បានភ្លាមៗផងដែរ។
ប្រភពបន្តថា ក្រោយឃាត់ខ្លួនបានជនសង្ស័យទាំង២នាក់ខាងលើ បានឆ្លើយសារភាពថា ក្រុមខ្លួនមានគ្នា4នាក់ ប្រុស3នាក់ និងស្រីម្នាក់ ១-ឈ្មោះ ណុប ភេទប្រុស អាយុប្រហែល20ជាង នៅម្ដុំភ្នំជាល មិនស្គាល់ភូមិ-ឃុំ បានរត់គេចខ្លួនបាត់ ២-ឈ្មោៈ ម៉ី ភេទស្រី អាយុប្រហែល20ឆ្នាំ មិនស្គាល់ទីលំនៅ ជាអ្នកយកម៉ូតូជនរងគ្រោះជិះគេចខ្លួន។
លោកអនុសេនីយ៍ឯក ម៉ិច សុភាន់ អធិការរងនគរបាលស្រុកសំរោងទង បានឱ្យដឹងថា នៅព្រឹកថ្ងៃទី១២កុម្ភៈ ថា ករណីនេះជំនាញព្រហ្មទណ្ឌកំពុងសហការជាមួយព្រហ្មទណ្ឌកំរិតស្រាលនៃស្នងការដ្ឋាននគរបាលខេត្ត កំពុងធើ្វការស្រាវជ្រាវតាមចាប់បក្សពួកផ្សេងទៀតដែលកំពុងរត់គេចខ្លួនជាបន្តបន្ទាប់ ដោយឡែកជនសង្ស័យដែលឃាត់ខ្លួនបាន កម្លាំងរបស់លោកបានកសាងសំណុំរឿងបញ្ជូនទៅកាន់ការិយាល័យព្រហ្មទណ្ឌកំរិតស្រាល ចាត់ការបន្តតាមនីតិវិធី។
សូមរំលឹកថា ក្រុមជនសង្ស័យ គឺជាមុខសញ្ញាចាស់ដែលតែងតែប្រើល្បិច និងធ្វើសកម្មភាពវាយប្លន់បែបនេះជាច្រើនដងមកហើយ និងស្ថិតក្រោមការតាមដានរបស់សមត្ថកិច្ចជាយូរមកហើយដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
