ចាន់ វឌ្ឍនាកា ចាកចេញពីកម្ពុជា ទៅជប៉ុន ម៉ោង១០៖៥០នាទីយប់នេះហើយ!

(ភ្នំពេញ)៖ កីឡាករដ៏ល្បីរបស់កម្ពុជា ចាន់ វឌ្ឍនាកា នឹងត្រូវចាកចេញពីកម្ពុជា ឆ្ពោះទៅប្រទេសជប៉ុន នាវេលាម៉ោង១០៖៥០នាទីយប់ថ្ងៃទី១២ ខែកុម្ភៈនេះហើយ ដើម្បីចូលរួមជាមួយក្លឹបថ្មីរបស់ខ្លួន Fujieda MYFC សមាជិកនៃលីគលំដាប់ទី៣ របស់ជប៉ុន ក្នុងលក្ខខណ្ឌខ្ចីជើងពេញមួយរដូវកាលថ្មី នាឆ្នាំ២០១៧នេះ។ នេះបើតាមការបញ្ជាក់របស់លោក បែ មករា អ្នកចាត់ការទូទៅរបស់ក្រុមបឹងកេតអង្គរ។

ទន្ទឹមនឹងការត្រៀមចាកចេញពីស្រុកកំណើត ទៅបន្ដអាជីពលើទឹកដីរីកចម្រើនផ្នែកកីឡាបាល់ទាត់នេះ ចាន់ វឌ្ឍនាកា បានបង្ហាញពីក្ដីសប្បាយរីករាយ និងឆន្ទៈខិតខំហ្វឹកហាត់ ដើម្បីដកស្រង់បទពិសោធន៍ និងបច្ចេកទេសថ្មីៗ សម្រាប់អភិវឌ្ឍន៍សមត្ថភាពរបស់ខ្លួនឲ្យរីកចម្រើន ឆ្ពោះទៅរកភាពជោគជ័យក្នុងអាជីពបាល់ទាត់មួយកម្រិតទៀត។ ពិសេសគឺការនាំយកនូវសមត្ថភាពត្រឡប់ មកជួយក្រុមជម្រើសជាតិកម្ពុជាវិញតែម្ដង។

គួរបញ្ជាក់ថា ខ្សែប្រយុទ្ធជា Idol របស់អ្នកគាំទ្រកម្ពុជារាប់ម៉ឺននាក់ ចាន់ វឌ្ឍនាកា គឺជាកីឡាករកម្ពុជាទី១ ត្រូវបានក្លឹបបាល់ទាត់ជប៉ុននាំយកទៅលេងឲ្យក្លឹបនៅទីនោះ បើទោះបីក្នុងលីគលំដាប់ទី៣ ក៏ដោយ។ វឌ្ឍនាកា ត្រូវបានក្លឹបបឹងកេត ផ្ទេរទៅលេងឲ្យក្លឹប Fujieda MYFC ក្នុងលក្ខខណ្ឌខ្ចីជើងមួយឆ្នាំ ប៉ុន្ដែតម្លៃខ្លួនក្នុងការផ្ទេរ និងប្រាក់ខែនោះ ពុំត្រូវបានភាគីទាំងសងខាងទម្លាយឲ្យដឹងនោះទេ៕

ប្រភព៖ Fresh News

ដោយឡែក រំលឹកព័ត៌មានចាស់លើកមុនផងដែរថា៖ ឯកអគ្គ​រាជ​ទូតជប៉ុន ស្នើ​ឲ្យ ចាន់ វឌ្ឍនាកា ខិត​ខំ​ប្រឹង​លេង និង​បញ្ចេញ​បច្ចេក​ទេស​ដែល​ខ្លួន​មាន ដើម្បី​ឲ្យ​ប្រជា​ជន​ជប៉ុន​បាន​ស្គាល់

(ភ្នំពេញ)៖ លោក Hidehisa HORINOUCHI ឯកអគ្គរាជទូតជប៉ុន ប្រចាំនៅកម្ពុជា បានធ្វើការស្នើសុំឲ្យកីឡាករល្បីលំដាប់កំពូលរបស់ព្រះរាជាណាចក្រកម្ពុជា ចាន់ វឌ្ឍនាកា ខិតខំប្រឹងប្រែងលេងឲ្យពីសមត្ថភាព ក៏ដូចជាបច្ចេកទេស ដែលខ្លួនធ្លាប់បានប្រើដើម្បីរកគ្រាប់នាពេលកន្លងមកឲ្យប្រជាជនជប៉ុនបានដឹង នៅក្នុងឱកាសកីឡាកររបស់ក្លឹបបឹងកេត អង្គររូបនេះ ទៅចូលរួមលេងក្នុងក្លឹប Fujieda MYFC សមាជិកលីគលំដាប់ទី៣ របស់ជប៉ុន។

ការស្នើសុំបែបនេះ ត្រូវបានធ្វើឡើងគ្រាដែលឯកអគ្គរាជទូតខាងលើនេះ បានអនុញ្ញាតឲ្យកីឡាករជំនាញជើងឆ្វេងចូល ជួបសំដែងការគួរសមនាព្រឹកថ្ងៃព្រហស្បតិ៍ ទី៩ ខែកុម្ភៈ ឆ្នាំ២០១៧ នេះ នៅការិយាល័យទូតជប៉ុនតែម្តង មុនពេល ចាន់ វឌ្ឍនាកា ឡើងយន្តទៅជប៉ុននៅថ្ងៃអាទិត្យ ទី១២ ខែកុម្ភៈចុងសប្តាហ៍នេះ។

លើសពីនេះទៀត ឯកអគ្គរាជទូតខាងលើនេះក៏បានសង្កត់ធ្ងន់ថា ការខំប្រឹងលេងឲ្យអស់ពីសមត្ថភាពក៏ដើម្បីបង្ហាញពី មោទនភាពរបស់កម្ពុជាផងដែរនៅលើទឹកដីនៃប្រទេសដែលរីកចំរើនខាងវិស័យបាល់ទាត់ប្រចាំទ្វីបអាស៊ីមួយនេះ ក្នុងនាមជាកីឡាករកម្ពុជាដំបូងដែលបានទៅលេងនៅទឹកដីនៃប្រទេសជប៉ុន។ លោកថា ចាន់ វឌ្ឍនាកា ត្រូវមានទំនាក់ ទំនងល្អជាមួយនឹងកីឡាករបរទេសដទៃទៀត និងសហការគ្នាដើម្បីទទួលជ័យជំនះនៅក្នុងការប្រកួតនីមួយៗផងដែរ។

ឯកអគ្គរាជទូត HORINOUCHI បានបញ្ជាក់ថា «វត្តមានរបស់ ចាន់ វឌ្ឍនាកា នៅទឹកដីជប៉ុនក្នុងរយៈពេល ១ឆ្នាំពេញ នេះ ក៏បានធ្វើឲ្យប្រជាជនយល់ដឹងពីភាពរីកចម្រើននៃវិស័យកីឡាបាល់ទាត់កម្ពុជា និងរឹតចំណងការទូតរវាងប្រទេស កម្ពុជា និងជប៉ុងផងដែរ»។

ទន្ទឹមគ្នានោះ កីឡាករដែលជំនាញស៊ុតជើងឆ្វេង ចាន់ វឌ្ឍនាកា ក៏បានធ្វើការសន្យាក្នុងការអភិវឌ្ឍសមត្ថភាពរបស់ខ្លួន ដើម្បីសម្រេចបំណងពីការលេងក្នុងលីគលំដាប់ទី២ ឬលីគកំពូលជប៉ុននាថ្ងៃអនាគត ដោយបានលើកឡើងថា «ការទៅលេងនៅទឹកដីថ្មីនៃប្រទេសជប៉ុន គឺពិតជាផលលំបាកខ្លះៗសម្រាប់ខ្ញុំ តែយ៉ាងក៏ដោយ ខ្ញុំត្រូវតែខិតខំប្រឹងលេង ដើម្បីក្លឹប និងក្រុមជម្រើសជាតិផងដែរ»។

សូមបញ្ជាក់ផងដែរ កាលពីរសៀលថ្ងៃទី១៣ ខែមករា ឆ្នាំ២០១៧ កន្លងទៅថ្មីៗនេះ ចាន់ វឌ្ឍនាកា ត្រូវបានក្លឹប Fujieda MYFC ចុះកិច្ចសន្យារយៈពេល ១ឆ្នាំពីក្លឹបបឹងកេតអង្គររបស់កម្ពុជា ក្នុងលក្ខខណ្ឌខ្ចីជើង ក្រោមតម្លៃខ្លួបបិទជាតិ តែយ៉ាងណាមិញបើតាមប្រភពជិតស្និទ្ធរបស់ វឌ្ឍនាកា បានទម្លាយថា បានប្រហែលខ្ទង់ ១ម៉ឺនដុល្លារក្នុង ១ខែ ព្រមទាំងរថយន្តសម្រាប់ប្រើប្រាស់ក្នុងប្រទេសជប៉ុន រួមទាំងខុនដូ ក៏ដូចជាអ្នកបកប្រែផ្ទាល់ខ្លួនផងដែរ៕