ភ្នំពេញៈ ក្រោយចំណាយពេលគ្មានទ្រនំជ្រកអស់មួយរយៈធំបន្ទាប់ពីដើរចេញពី ផលិតកម្មប៊ិកមែន(Big Man) តារាចម្រៀងជើងខ្លាំងអំឡុងឆ្នាំ២០០០ អ្នកនាង យក់ ឋិតរដ្ឋា កំពុងកក់ក្តៅក្នុងចិត្តហើយនៅពេលដែលនាងត្រូវបានផលិតកម្មរស្មី ហង្សមាស ដែលជាផលិតកម្មចម្រៀងដ៏ធំនៅស្រុកខ្មែរជ្រើសរើសនាងឲ្យចូលច្រៀង ជាផ្លូវការនោះ។
បន្ទាប់ពីគ្មានដំណោះស្រាយពីផលិតកម្មប៊ិកមែន តារាចម្រៀងដែលល្បីខ្លាំងតាមរយៈបទ «ស្រឡាញ់គ្នាឲ្យស្លាប់ចុះ» អ្នកនាង យក់ ឋិតរដ្ឋា ក៏បានដើរចេញផលិតកម្មនោះ តែនាងមិនបានបន្តចូលច្រៀងឲ្យផលិតកម្មថ្មីណាមួយឡើយ។ ទើបតែពេលនេះ ដែលព័ត៌មានច្បាស់ការបានលេចឡើងគួរឲ្យភ្ញាក់ផ្អើល គឺតារាចម្រៀងកូនមួយអ្នកនាង យក់ ឋិតរដ្ឋា ត្រូវបានជ្រើសឲ្យចូលច្រៀងនៅផលិតកម្មរស្មីហង្សមាស ដែលតារាគ្រប់ដួងតែងនិយាយថា ហង្សមាសជាផលិតកម្មយក្សនៅស្រុកខ្មែរ។
លោក ឃុំ ប៉ុណ្ណាដែត អតីតតារាចម្រៀងល្បីម្នាក់ដែលត្រូវជាស្វាមីអ្នកនាង យក់ ឋិតរដ្ឋា បានឲ្យដឹងថា យក់ ឋិតរដ្ឋា កំពុងទទួលបានការងារថ្មីនៅរស្មីហង្សមាស ហើយនាងនឹងចេញនូវអាល់ប៊ុមបទចម្រៀងរបស់ខ្លួននៅពេលខាងមុខនេះ។ លោកបានបន្តថា តាមពិតទៅទំនាក់ទំនងរវាងភរិយារបស់លោក និងហង្សមាស បានចាប់ផ្តើមអស់រយៈពេលយូរគួរសមមកដែរហើយ មិនមែនទើបតែថ្មីៗនេះទេ។
លោក ឃុំ ប៉ុណ្ណាដែត បាននិយាយថា៖«ជាការពិតណាស់ រដ្ឋា គាត់បានចូលរស្មីហង្សមាស មែន គ្រាន់តែនៅពេលនេះ គាត់អត់ទាន់បានចេញបទចម្រៀងជាផ្លូវការ ប៉ុន្តែប្រហែលជាមិនយូរប៉ុន្មានទេ»។ លោកបានបន្តថា៖«តាមពិតគាត់ និងហង្សមាស បានទាក់ទងគ្នាយូរគួរសមមកហើយ»។
ធម្មតានៅពេលមានចំណូលសមាជិកថ្មី រស្មីហង្សមាសតែងតែលើកស្ទួយតារាចម្រៀងនោះឲ្យមានភាពលេចធ្លោ ជាមួយនឹងបទចម្រៀងមេថ្មីល្អៗ ហើយសម្រាប់អ្នកចម្រៀងជើងយូរ យក់ ឋិតរដ្ឋា វិញក៏គេសង្ឃឹមថា នេះជាឱកាសដែលនាងអាចក្រសោបយកភាពល្បីមកវិញដែរ ខណៈដែលតារារូបនេះក៏ធ្លាប់ល្បីល្បាញខ្លាំងដូចគ្នាជាមួយនឹងអ្នក ចម្រៀង ឱក សុគន្ធកញ្ញា កាលពីប៉ុន្មានឆ្នាំមុននោះ។
លោក ឃុំ ប៉ុណ្ណាដែត បានឲ្យដឹងថា លោកមិនបានដឹងច្បាស់ថា យក់ ឋិតរដ្ឋា បានទទួលការងារច្រើនប៉ុនណានោះទេ លោកគ្រាន់តែដឹងថា ភរិយារបស់លោកបានថតបទចម្រៀង និងខារ៉ាអូខេ បានមួយចំនួនហើយ ហើយលោកក៏មិនបានដឹងច្បាស់ថា អាល់ប៊ុមដំបូងគាត់នឹងចេញនៅពេលណាឲ្យប្រាកដនោះដែរ។
ស្វាមីតារារូបនេះនិយាយថា៖«ខ្ញុំបានដឹងថា គាត់បានទៅថតនៅហង្សមាសបានមួយចំនួនធំហើយ តែបើនិយាយថា ចេញពេលណាឲ្យប្រាកដនោះ ខ្ញុំមិនហ៊ានប្រាកដទេ ព្រោះខ្លាចអ្វីដែលយើងនិយាយទៅវាខុសពេលគ្នា»។
រីឯលោក អ៊ឹង សុងលាភ នាយកផលិតកម្មរស្មីហង្សមាសមិនអាចសុំបំភ្លឺបន្ថែមបានទេទាក់ទង នឹងការលេចវត្តមានអ្នកនាង យក់ ឋិតរដ្ឋា នៅហង្សមាស ដោយទូរស័ព្ទរបស់លោកគ្មានអ្នកលើក៕
ដកស្រង់ពីគេហទំព័រភ្នំពេញប៉ុស្តិ៍
សូមបងប្អូនជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។សូមអរគុណ ខ្មែរស្រលាញ់ខ្មែរ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]