រាជធានីភ្នំពេញ ៖ កញ្ញាទេព កញ្ញា ដែលរៀបចំពិធីខួបកំណើត កាលពីរាត្រីថ្ងៃទី២ កុម្ភៈ ឆ្នាំ២០១៧នៅភោជនីយដ្ឋានវីហ្វ្រេនផ្សារដេប៉ូធ្វើឱ្យគេសង្ស័យថា នាងមានចំណងស្នេហ៍ជាមួយតារាសម្តែងលី ណូរ៉ា ដ្បិតលោកលី ណូរ៉ា ជាអ្នកចេញមុខហៅភ្ញៀវចូលតុខ្លាំងជាងសាមីខ្លួន ទៅទៀត ហើយថែមទាំងជូនកាដូចិញ្ចៀនមួយវង់ដល់នាងទៀតផង។
ទោះជាយ៉ាងណាក្តី ទាំងទេព កញ្ញា និងលោកលី ណូរ៉ា សុទ្ធតែច្រានចោលចំណងស្នេហ៍នេះ បើទោះជាស្និទ្ធស្នាលគ្នាប្លែកក៏ដោយ ហើយមិនខ្វល់គេជឿ ឬមិនជឿទេ ។ នៅពេលសួរនាំរឿងនេះកញ្ញាទេព កញ្ញាប្រាប់ថារវាងនាង និងលី ណូរ៉ាគឺជាមិត្តភក្តិអត់មានអីលើសពីនេះទេ។ បុរសក្នុងចិត្តរបស់នាងមិនមែនជាអ្នកសិល្បៈទេ ។
ដោយឡែកបើមើលទៅលោកលី ណូរ៉ា វិញនៅថ្ងៃខួបកំណើតនោះលោកខ្នះខ្នែងចេញមុខរៀបចំជាមួយសាមីខ្លួន ដោយមើលកន្លែងអង្គុយរបស់ភ្ញៀវ ព្រមទាំងចាត់ចែងការងារផ្សេងទៀត ។ ពិសេសជាងនេះទៅទៀត នៅពីមុខ អ្នកសារព័ត៌មាន លោកលី ណូរ៉ាបានជូនកាដូចិញ្ចៀនមួយវង់ដល់ទេព កញ្ញា ។ អត្ថន័យចិញ្ចៀននេះហាក់មិនមែនជាមិត្តភាពឡើយ ពោលគេដៅលើរឿងស្នេហា ។
លោកលី ណូរ៉ា បានឆ្លើយបែបស្ទាក់ស្ទើរថា លោកជូនកាដូចិញ្ចៀនមួយវង់ដល់កញ្ញាទេព កញ្ញាតែវាមានតម្លៃធម្មតាប៉ុណ្ណោះ ក្នុងន័យមិត្តភាពស្រឡាញ់រាប់អាន គ្មានគិតអ្វីផ្សេងទេ ។ ការប្រគល់ជូនកាដូនេះលោកសប្បាយចិត្ត ព្រោះមិននឹកស្មានថា ពេលប្រគល់ជូនទៅនាងពេញចិត្ត ហើយស្រឡាញ់ និងពោលពាក្យថា«ស្អាត»ទៀតផង ។លោកទិញកាដូឲ្យនេះថ្លៃ ឬថោកមិនសំខាន់ទេ តែនេះជាទឹកចិត្តស្រឡាញ់រាប់អានគ្នា ហើយអ្វីសំខាន់នាងចូលចិត្តម៉ូដបែបនោះ ។
«ខ្ញុំនៅមិនហ៊ានសារភាពស្នេហ៍នោះទេ ព្រោះនេះជាការស្ថិតនៅលើដួងចិត្តរបស់មនុស្ស ម្នាក់ៗ ឬសាមីខ្លួនប៉ុណ្ណោះ គ្រាន់តែថាពេលនេះយើងទាំងពីរនាក់ល្អល្អូកល្អិនជាមួយគ្នាដដែល» ។
នៅថ្ងៃខួបកំណើតនោះលោកលី ណូរ៉ា បញ្ជាក់ថា ពីដំបូងលោកគិតថាចូលរួមជាភ្ញៀវធម្មតាប៉ុណ្ណោះ ប៉ុន្តែដល់ពេលឃើញកម្មវិធីមនុស្សមកណែនរកកន្លែងអង្គុយគ្មាន ទើបលោករៀបចំចាត់ចែងជូននាង ។ លោកជួយមើលនេះមើលនោះជំនួសនាង ដោយមិនគិតនឿយហត់ទេ ព្រោះមិត្តភាពជារឿងសំខាន់ ។
តារាដែលចូលរួមកម្មវិធីខួបកំណើតរបស់កញ្ញាទេព កញ្ញា មាន ម៉ាដូណា, លោកអាន់ដា, លោកកែវ បូរ៉ា, លោកឆឹម សក្កដា, លោកយន សុភ័ក្រ, កញ្ញាមានីកា, កញ្ញាយេយេ, កញ្ញាទេព សម្ជស្ស, កញ្ញាជេស៊ីកា, កញ្ញាសុវណ្ណរ៉ាផា, លោកសុគន្ធ ដេវីត និងកញ្ញាតូច ស្រីពេជ្រជាដើម ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]