រាជធានីភ្នំពេញ ៖ តារាសម្តែងពេជ្រ អាវីហ្សា បានចេញទៅប្រទេសថៃ ដើម្បីពិនិត្យមើលខ្ទង់ច្រមុះរបស់នាងដែលរបួសដោយអតីតសង្សារវាយនោះ ។
កញ្ញាពេជ្រ អាវីហ្សា បានវិលមកពីជួបពិគ្រោះពិភាក្សាជាមួយអ្នកជំនាញកែសម្រស់នៅប្រទេសថៃកាលពីពេល ថ្មីៗកន្លងមក ។ តារាស្រីដែលធ្លាប់រងកណ្តាប់ដៃអតីតសង្សាររូបនេះបញ្ជាក់ថាច្រមុះរបស់នាងមិនមានអ្វីគួរព្រួយបារម្ភទេក្រោយពីពិនិត្យយ៉ាងដិតដល់រួចមក ។
អាវីហ្សា បានចេញដំណើរទៅប្រទេសថៃកាលពីថ្ងៃទី១១ ខែមករា ២០១៧ ដើម្បីជួបជាមួយអ្នកជំនាញផ្នែកកែសម្រស់ឱ្យត្រួតពិនិត្យខ្ទង់ច្រមុះដែលធ្វើទុក្ខក្រោយពីរងកណ្តាប់ដៃរបស់អតីតគូស្នេហ៍ ។ ក្រោយជួបជាមួយអ្នកជំនាញផ្នែកកែសម្រស់ ពិសេសត្រួតពិនិត្យខ្ទង់ច្រមុះរួចមក ក្រុមវេជ្ជបណ្ឌិតប្រទេសថៃលើកឡើងថាមិនមានអ្វីដែលប៉ះពាល់ធ្ងន់រហូតដល់ដកខ្ទង់ច្រមុះសិប្បនិមិត្ត ចេញទេ ។
ពេជ្រ អាវីហ្សាបញ្ជាក់ថា«ក្រោយការពិនិត្យ យ៉ាងយកចិត្តទុកដាក់មក គឺមិនមានសញ្ញាមានបញ្ហាដែលគួរឱ្យព្រួយបារម្ភឡើយ ។ ច្រមុះរបស់ខ្ញុំនឹងវិលមកកាន់ភាពប្រក្រតីឡើងវិញ ក្រោយពីទទួលយកថ្នាំបំបាត់ការឈឺចាប់ និងផ្សះរបួសដែលតម្រូវឱ្យនាងខ្ញុំលេបប្រមាណត្រឹម១០ថ្ងៃប៉ុណ្ណោះ ។ ពេលនេះការឈឺចុកចាប់នៅត្រង់មុខរបួសហាក់ធូរស្រាលច្រើនជាងមុន» ។
ទាក់ទិននឹងស្ថានភាពរស់នៅកញ្ញាពេជ្រ អាវីហ្សា ថាមិនមានការព្រួយបារម្ភអ្វីទេព្រោះតែនាង និងអតីតសង្សារបានបញ្ចប់ការទាក់ទងគ្នាទាំងស្រុងហើយ ។ មុនទៅប្រទេសថៃ នាងបានទៅបំភ្លឺជុំវិញករណីប្រើប្រាស់ហិង្សាធ្ងន់លើនាងពីអតីតសង្សាររូបនោះ ។ នាងនៅតែរក្សាជំហរមិនប្តឹងអតីតសង្សារទេ ព្រោះនាងចង់អហោសិកម្មឱ្យគេគ្រប់យ៉ាង ដែលធ្លាប់មានជាមួយគ្នាឱ្យចប់ទាំងអស់ កុំឱ្យមានកម្មពៀរជាមួយគ្នាតទៅទៀត ។ នាងក៏មិនចង់ទទួលបានសំណងអ្វីពីអតីតគូស្នេហ៍ទេ ក្រៅតែពីចង់បញ្ចប់បញ្ហា ដោយសន្តិវិធី ។
ពេជ្រ អាវីហ្សា ត្រូវអតីតគូស្នេហ៍របស់ខ្លួនវាយឱ្យរបួសធ្ងន់កាលពីថ្ងៃទី១៣ វិច្ឆិកា ២០១៦នៅខេត្តព្រះសីហនុ ។ សាលាដំបូងខេត្តបានចេញដីកាសម្រេចឃុំខ្លួនលោកគៀង ហេង ជាអតីតសង្សារនាងពេជ្រ អាវីហ្សា ដាក់ពន្ធនាគារជាបណ្តោះអាសន្ន ។
តារាសម្តែងពេជ្រ អាវីហ្សា ប្រាថ្នាថាប្រសិនបើមានគូស្នេហ៍ថ្មីទៀត សូមព្រះប្រទានបុរសចិត្តល្អ ចិត្តស្មោះប្រកបដោយធម៌ ចេះអធ្យាស្រ័យគ្នាទៅវិញទៅមក ៕
ប្រភព៖ កោះសន្តិភាព
កំណត់ហេតុខ្មែរឡូត៖
ភ្នំពេញ៖ តារាសម្តែងស្រីមុខដូចកូនកាត់សាច់ស ពេជ្រ អាវីហ្សា បានចំណាយពេលទៅប្រទេសថៃ ដើម្បីកែបន្ថែមនូវទម្រង់ច្រមុះ និងកន្លែងណាខ្វះខាតរបស់ខ្លួន ក្រៅពីនេះនាងទៅទិញសម្ភារៈ ប្រើប្រាស់ម៉ាកល្បីៗមួយចំនួន ផងដែរ។
ក្នុងអារម្មណ៍ស្រស់ថ្លា រាងសប្បាយចិត្តបន្តិច កញ្ញា ពេជ្រ អាវីហ្សា បានថ្លែងថា "ទោះជាមានស្រស់ស្អាត ដូចធម្មតាវិញដែរ។ ប៉ុន្តែយ៉ាងណា នៅតែមានបំណង ចង់ទៅកែសម្ជស្សបន្ថែមទៀត នៅប្រទេសថៃ ។ ខ្ញុំទើបនិងចាកចេញទៅ កាលពីព្រឹកថ្ងៃទី១១មករា" ។
កញ្ញាសាច់ខ្ចីមុខខ្ជូត ពេជ្រ អាវីហ្សា បានចំណាយពេលទៅប្រទេសថៃ ដើម្បីកែបន្ថែមនូវទម្រង់ច្រមុះរបស់ខ្លួន។ ក្រៅពីនេះនាងទៅទិញសម្ភារៈ ប្រើប្រាស់ម៉ាកល្បីៗ មួយចំនួនផងង។ ការទៅលើកនេះ ពេជ្រ អាវីហ្សា មិនបានបញ្ជាក់ថា ទៅរយៈពេលប៉ុន្មានថ្ងៃឡើយ។ ទោះបីជាមានសម្រស់ស្រស់ស្អាត និងមានសម្បុរស្បែកសខ្ចី ក៏ពិតមែន តែ ពេជ្រ អាវីហ្សា នៅតែមិនអស់ចិត្ត និងមានបំណងចង់កែកុន ចំណុចខ្វះខាត នៃរូបសម្រស់របស់ខ្លួន។
រយៈពេលប្រមាណកន្លះខែ ក្រោយជួបរឿងរ៉ាវខាងលើរួចមក ពេជ្រ អាវីហ្សា បញ្ជាក់ថា "នាងបានធូរស្រាលបន្តិច ទាំងអារម្មណ៍ផ្លូវកាយ និងចិត្ដ សុខ និងទុក្ខ ដើរទន្ទឹមគ្នាទេបង ព្រោះនៅមិនទាន់ជាស្រួលបួល មុខរបួសផ្លូវចិត្ត ក៏មិនទាន់ប្រសើរដែរ ទើបតែបាន ៥០ភាគរយហ្នឹងបង។ ប៉ុន្តែចេះតែខំធ្វើចិត្តឲ្យសប្បាយ និងទទួលការងារដូចមុន វាបានជួយកាត់ស្រ្តេសដែរ ម្យ៉ាងអផ្សុក មិនចង់សម្រាកនៅផ្ទះឡើយ"។
តារាសម្ដែងសាច់សខ្ចី ពេជ្រ អាវីហ្សា ធ្លាប់ប្រាប់ថា "រឿងស្នេហាសុំសម្រាក លែងចង់មានសង្សារទៀតហើយ ត្បិតអី កន្លងមកជួបតែរឿងមិនសមប្រកប។ ខ្ញុំមានអារម្មណ៍ថា ស្អប់មនុស្សប្រុសណាស់បង លែងចង់បានសង្សារហើយ ប៉ុន្តែបើមានគេចូលសួរជាគូអនាគត អាចនឹងពិចារណាបានបង។ ចង់ទុកពេលវេលា សម្រាប់ខ្លួនឯង ឲ្យបានច្រើន ក៏ដូចជា គិតគូរឿងការងារសិល្បៈ ធ្វើយ៉ាងណាឲ្យកាន់តែរលូនជាងមុន"។
សូមជម្រាបថា នៅលើដងខ្លួន របស់ ពេជ្រ អាវីហ្សា មានស្នាមសាក់ រហូតដល់ទៅ៣ក្លែងឯណោះ ២កន្លែងទៀត មាននៅជើងខាងស្ដាំ ដោយនាងសាក់ឈ្មោះខ្លួនឯង និងមួយកន្លែងទៀត នៅករដៃស្ដាំ សាក់ជារូប ជីងចក់។ តារាស្រីរូបនេះ មិនទាន់មានគម្រោង សាក់លើដងខ្លួនបន្តទៀតឡើយ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]