តាចេក មានបំណងប្រាថ្នា ចង់ជួបកំពូលតារាចម្រៀង ព្រាប សុវត្ថិ ពេជ្រ សោភា និងដេវីត! (មានវីដេអូ)

ខេត្តកណ្តាល៖ មួយរយៈពេលថ្មីៗនេះ ក្រោយពីបានដឹងដំណឹងពីទុក្ខលំបាក របស់តារាកំប្លែងជើងចាស់ តាចេក ដែលក្រុមគ្រួសាររបស់លោកកំពុងតែជួបបញ្ហាសេដ្ឋកិច្ច យ៉ាងធ្ងន់ធ្ងរ ទាំងដែលលោកក៏មានវ័យចំណាស់ សឹងតែមិនអាចទ្រាំទ្ររួច ថែមទាំងលោកជាជំហរនៃគ្រួសារ ទទួលខុសត្រូវលើបន្ទុកដ៏ធ្ងន់នេះទៀតនោះ  បានធ្វើឲ្យ តារាចម្រៀងប្រុស សាន ផានិត មិនអាចឈរមើលបាន ដោយលោកបានយកមូលនិធិផ្ទាល់ខ្លួន ព្រមទាំង ប្រាក់បរិច្ចាគ របស់លោក ឧកញ៉ា ឌួង ឆាយ ទៅជូនផ្ទាល់ នៅកន្លែងលក់ទឹកសុទ្ធ របស់លោកតា ចេកតាមដងផ្លូវ ដល់ស្រុកកណ្តាលស្ទឹង នៅខេត្ត កណ្តាល តែម្តង។

ដោយឡែក កាលពីម្សិលមិញនេះផងដែរ លោក សាន ផានិត ក៏បានពាំនាំយកមូលនិធិ សប្បុរសធម៌បន្ថែមទៀតមកជូន តាចេក ម្តងទៀត ព្រមទាំងបានបង្ហោះវីដអូមួយ ដើម្បីចែកជូនប្រិយមិត្តទស្សនាផងដែរ។

ដោយក្នុងនោះផងដែរ នាយចេក ក៏មានសំណូមពរមួយថា លោកតាពិតជាចង់ជួបវត្តមាន កំពូលតារាចម្រៀង ព្រាប សុវត្ថិ អ្នកនាង ពេជ្រ សោភា និង លោក G-devith មកលេងគាត់ខ្លាំងណាស់ ដោយលោកតា ធ្លាប់មានអនុស្សាវរីយ៍ កំសត់កម្រពេលទៅថត វីដេអូបទចម្រៀងជាមួយគ្នាយ៉ាងច្រើន ដោយពេលនេះ បើសិនជាអាចលោកតា ពិតជាចង់ឃើញវត្តមាន តារាទាំង៣រូបនេះ មកលេងលោកតា នៅកន្លែងដែលលោកតា លក់ទឹកសុទ្ធនេះខ្លាំងណាស់។

គួរឲ្យដឹងដែរថា  កាលពីប៉ុន្មានរយៈមុន ក៏មានវត្តមាន តារាមួយចំនួន ដូចជា កញ្ញា ទេព បូព្រឹក្ស និង អ្នកនាង ខៀវ សុខារ៉ាវី ក៏ធ្លាប់បានមកលេងលោកតា នៅឯកន្លែងលោកតាលក់ទឹកសុទ្ធផងដែរ៕

ទស្សនាវីដេអូ ខាងក្រោម៖

កំណត់ហេតុខ្មែរឡូត៖ 

ដោយឡែក គួររំលឹក ពីព័ត៌មានគួរឲ្យចាប់អារម្មណ៍ផ្សេងមួយទៀត ៖ នេះហើយជីវិត​ពិត ​របស់​តារា​កំប្លែង​នាយ ចេក ដែល​ធ្លាប់​ធ្វើ​ឲ្យ​មហាជន​ផ្ទុះ​សំណើច​លើ​ឆាក​តន្ត្រី

ទស្សនិកជនធ្លាប់តែ បានឃើញការសម្តែងនិយាយកំប្លុកកំប្លែង សើចក្អាកក្អាយ ពីនាយ ចេក ដែលជា តារា កំប្លែងល្បីឈ្មោះមួយដួង ប្រចាំក្រុមនាយ កុយ យ៉ាងសប្បាយរីករាយ ជាពិសេស ថ្ងៃចុងសប្ដាហ៍ នៅលើ កញ្ចក់ ទូរទស្សន៍ ប៉ុន្តែទស្សនិកជន មិនបានដឹងទេថា ជីវិតឯកជន នៅពីក្រោយការកំប្លែង របស់លោកមាន ជីវិត កម្សត់កម្រ រស់នៅពិបាកតោកយ៉ាក កម្រិតណាឡើយ ។

កាលពីឆ្នាំ២០១៥កន្លងទៅ តារាចម្រៀងប្រចាំផលិតកម្ម ហង្ស មាស អ្នកនាង ពេជ្រ សោភា ដែលបានដឹង ពីប្រវត្តិកម្សត់ របស់តារាកំប្លែងរូបនេះ បានអំពាវនាវ សប្បុរសជន មេត្តា ជួយឧបត្ថម្ភ តារារូបនេះ តាមសន្ដានចិត្ត ដើម្បីឲ្យគាត់បានរស់នៅសុខស្រួលផងចុះ ។

ជារៀងរាល់សប្តាហ៍ទស្សនិកជន តែងតែបានឃើញវត្តមាន តារាកំប្លែងនាយ ចេក បង្ហាញខ្លួន នៅស្ថានីយ ទូរទស្សន៍ មួយចំនួន ដៃកាន់ក្បាលមេក្រូ ខំប្រឹងរកពាក្យពេចន៍ និយាយកំប្លុកកំបែ្លង ធ្វើឲ្យ អ្នកទស្សនាផ្ទុះសំណើច សប្បាយ រីករាយ ពេលចុងសប្តាហ៍ ប៉ុន្តែនៅក្រោយ ភាពសប្បាយរីករាយនោះ ទស្សនិកជន មិនបានដឹងឡើយថា អ្នកសិល្បៈ រូបនេះមានជីវិតរស់នៅ ពិបាកយ៉ាងណា ។ ក្នុងជីវភាពរសនៅប្រចាំថ្ងៃ ក្រៅពីការសម្តែង តារាកំប្លែង រូបនេះ និងភរិយា តែងតែអូសរទេះ មានដូចជា ភេសជ្ជៈ និងសម្ភារកំប៉ិកកំប៉ុក មួយចំនួនយកទៅលក់ នៅមុខ រោងចម្រមួយកន្លែង ស្ថិតនៅម្តុំ ផ្លូវជាតិលេខ២ ក្បែររង្វង់មូលគួរស្រូវ ប្រមាណ១០០ម៉ែត្រ ដើម្បីស្វែងរក ប្រាក់ ចំណូល បន្ថែម បន្តិចបន្តួច មកដោះស្រាយ ជីវភាពរស់នៅប្រចាំថ្ងៃ។

បើតាមតារាចម្រៀងថ្គាមខ្លា អ្នកនាង ពេជ្រ សោភា បានសរសេរបង្ហោះ នៅលើបណ្តាញទំនាក់ទំនង សង្គម Facebook ផ្ទាល់ខ្លួនរបស់នាងថា «នេះជាជីវិតពិតរបស់គាត់ ខ្ញុំតែងតែព្យាយាមជួយគាត់ ដោយរើសគាត់មក ជាតួសម្តែង ក្នុងបទចម្រៀង របស់ខ្ញុំ ដែលមានឈុតឆាកកំប្លែង ដូចជា បទ "ម៉ាក់ដឹងម៉ាក់វ៉ៃ" បទ "ប៉ាដឹងប៉ាវ៉ៃ" បទ "កាហ្វេ១៥០០"និង បទ "No Money No Honey" ជាដើម ខ្ញុំព្យាយាមតាម ដែលអាចជួយបាន»។

នៅក្នុងសារនោះ នាងបានសរសេរបែបអំពាវនាវ ទៀតថា «សូមបងប្អូនជួយគាត់ផង ជួយគាត់ ឲ្យរស់នៅរួច ផុត ពីការលំបាក គាត់តស៊ូណាស់ ខ្មែរចេះជួយខ្មែរ ហើយម្យ៉ាងទៀត ខ្ញុំក៏ធ្លាប់ក្រ ខ្ញុំយល់អារម្មណ៍នេះ ហេតុនេះ ខ្ញុំ ព្យាយាមជួយគាត់ ហើយដូច្នេះ បងប្អូនសប្បុរសជន សុំមេត្តាជួយគាត់ផងចុះ»។

សូមបញ្ជាក់ថា តារាកំប្លែងនាយចេក បានហក់ចូលកំប្លែងក្នុងក្រុមនាង កុយ ជាច្រើនឆ្នាំមកហើយ ក្នុងនោះក្រៅពី កំប្លែងតាមឆាកតន្រ្តី នាយចេក ក៏មានទទួលកាត់សក់ ក្នុងពិធីមង្គលការ ដើម្បីបានកម្រៃខ្លះផ្គត់ផ្គង់គ្រួសារ ប៉ុន្តែ រដូវវស្សាចូលដល់ ធ្វើឲ្យ ចំណូល ពីការកាត់សក់តាម រោងការត្រូវខ្សត់ខ្សោយ ដូច្នេះនាយចេក និងប្រពន្ធ ក៏ សម្រេច ចិត្តអូសរទេះ ដាក់លក់ភេសជ្ជៈបន្តិចបន្ទួច គ្រាន់ដោះស្រាយមួយគ្រាៗ ៕

• ព្រាប សុវត្ថិ
• ពេជ្រ សោភា
• សាន ផានិត
• ងួន ចាន់ដេវីត
• នាយ ចេក
• គ្រួសារ
• វីដេអូ