វិទ្យុ ABC ​សុំ​ទោស​ ព្រាប សុវត្ថិ ជាសាធារណៈ ​ក្រោយមេ​កើយ​​របស់ខ្លួន​​​​ដៀល​ថា ​«ស្រែ​ខ្លាំង​ណាស់» (មានវីដេអូ)

(ភ្នំពេញ)៖ មុននេះបន្តិចមានមហាជនជាច្រើន បានចាប់អារម្មណ៍ និងធ្វើការរិះគន់ជាថ្មី លើក្រុមការងារវិទ្យុ ABC ជាពិសេស គឺអាចារ្យ អេ ដែលបានបោះពាក្យសម្តី ហាក់មើលងាយកំពូលតារាចម្រៀងប្រុស ប្រចាំប្រទេសលោក ព្រាប សុវត្ថិ ថា «ជាមនុស្សស្រែៗខ្លាំងណាស់» ខណៈមានទស្សនិកជនជាច្រើន ក៏បានបង្ហាញអារម្មណ៍ មិនពេញចិត្តរហូតទាមទាឲ្យ ABC ចេញមុខសុំទោស តារាចម្រៀងលោក ព្រាប សុវត្ថិ ជាសាធារណៈ លើកំហុសឆ្គងរបស់ខ្លួន។

យ៉ាងណាមិញ បន្ទាប់ពីមានប្រតិកម្មរិះគន់ និងទាមទារឲ្យវិទ្យុ ABC ចេញមុខសុំទោស លោក ព្រាប សុវត្ថិ ពីសំណាក់មហាជនអ្នកគាំទ្ររួចមក នៅព្រឹកថ្ងៃទី២៦ ខែមករា ឆ្នាំ២០១៧នេះ គេក៏សង្កេតឃើញនៅលើ Page ហ្វេសប៊ុក ផ្លូវការ របស់វិទ្យុមួយនេះ បានបង្ហោះភ្ជាប់ជាមួយឃ្លីបវីដេអូថ្មីមួយទៀត ដោយបានសរសេរថា ឆ្លើយតប និងសុំទោសតារាចម្រៀងល្បីលំដាប់ប្រទេស លោក ព្រាប សុវត្ថិ។

សូមបញ្ជាក់ថា នៅក្នុងកម្មវិធីផ្សាយផ្ទាល់មួយ ដែលបានធ្វើឡើងកាលពីមួយថ្ងៃមុននេះ ប្រធានវិទ្យុ ABC គឺអាចារ្យ អេ បានលើកយករឿងរបស់តារាសម្តែង ប្រុស លោក ចន អេឡិចហ្សូរ៉ា ដែលបានបញ្ចេញទស្សនៈគាំទ្រ ការផលិតកម្មវិធីរបស់វិទ្យុមួយនេះ ដោយបានលើកឡើងថា ចន អេឡិចហ្សូរ៉ា មិនត្រឹមតែស្អាតរូបរាង ខាងក្រៅនោះទេ គឺបេះដូងខាងក្នុងក៏ស្អាតទៀត។ ដោយឡែក ព្រាប សុវត្ថិ ឯណោះវិញ គឺ «ស្រែខ្លាំងណាស់»។ ប៉ុន្តែក្រោយពីមានការរិះគន់ ពីទស្សនិកជនភ្លាមៗនេះដែរ ក្រុមការងាររបស់វិទ្យុ ABC ក៏បានចេញសុំទោសវិញ ផងដែរ។

ដូច្នេះដើម្បីបានដឹងកាន់តែច្បាស់ សូមបង្វែរអារម្មណ៍មហាជនស្តាប់ និងទស្សនាឃ្លីបវីដេអូ នៃការសុំទោស លោក ព្រាប សុវត្ថិ ពីសំណាក់បុគ្គលិកវិទ្យុ ABC ខាងក្រោមនេះ ទាំងអស់គ្នា៖

ប្រភព៖ Khmertalking

ដោយឡែក រំលឹកព័ត៌មានចាស់លើកមុនផងដែរថា៖ ចន អេឡិចហ្សូរ៉ា បញ្ចេញ​ទស្សនៈ​ អំពីទង្វើរបស់វិទ្យុ ABC

(ភ្នំពេញ)៖ ស្របពេលដែល រដ្ឋមន្រ្តីក្រសួងព័ត៌មាន លោក ខៀវ កាញារីទ្ធ បានចេញលិខិតស្នើឲ្យបញ្ឈប់ការចាក់ផ្សាយ កម្មវិធី «ABC3 ស្ព្រីង» នៅក្នុងស្ថានីយទូរទស្សន៍ប៉ុស្តិ៍លេខ៣ ដែលត្រុវបានទិញម៉ោងផ្សាយ ដោយវិទ្យុ ABC បន្ទាប់ពីមានការរិះគន់យ៉ាងកក្រើក ពេញបណ្ដាញសង្គមនោះ ស្រាប់តែនៅមុននេះ តារាសម្តែងប្រុស លោក ចន អេឡិចហ្សូរ៉ា បានបញ្ជេញអារម្មណ៍របស់ខ្លួនថា លោកនៅតែបន្តការគាំទ្រវិទ្យុ ABC ព្រោះកន្លងមកវិទ្យុមួយនេះ ធ្លាប់ជួយសាធារណជន បានច្រើនគួរសមមកហើយ។

ការលើកហេតុផលបែបនេះ ត្រូវបានលោក ចន អេឡិចហ្សូរ៉ា បាននិយាយថា «ត្រូវចាំថា បើធ្វើល្អត្រូវធ្វើរហូតដល់ស្លាប់ តែម្តងទៅ ហើយកុំឲ្យគេចាប់កំហុស ព្រោះថា បើទោះបីជាអ្នកធ្វើល្អយ៉ាងណាក៏ដោយ បើមានកំហុសតែម្តង គឺអ្នកជាមនុស្សអាក្រក់ និងត្រូវគេជាន់ពន្លិចជាមិនខាន នេះហើយសម័យ Facebook សម័យរិះគន់ ព្រោះគ្រប់គ្នាជារាជអាជ្ញា និងតុលាការកាត់ទោស ដោយពាក្យសំដី comment and share ហៃអើតាមគ្នា..!»។

តារាសម្តែងរូបសង្ហាលោក ចន អេឡិចហ្សូរ៉ា បានបន្ថែមទៀតថា «ABC ចង់ប្រាប់ថា ទង្វើដ៏ល្អរបស់អ្នក (ជួយក្មេងអនាថា អ្នកញៀនថ្នាំ ជនរងគ្រោះ ដោយសាការចាប់រំលោភ ស្រ្តីរកផ្លូវភេទ…) ។ទាំងនេះ នៅតែនៅក្នុងការចងចាំ របស់មនុស្សគ្រប់គ្នា ដែលបានជួប និងទទួលការស្រឡាញ់អំពីអ្នក ព្រមទាំងខ្ញុំម្នាក់ដែរ ដែលស្ញើចសរសើ នូវទង្វើដែលអ្នកបានធ្វើ ទាំងតែអ្នកហៃអើទាំងនោះ គ្មានធ្វើអ្វីសោះក្នុងពេលនោះ..!»៕  

• ព្រាប សុវត្ថិ