រាជធានីភ្នំពេញ ៖ យុវជន២នាក់ខណៈជិះម៉ូតូត្រឡប់ពីផឹកស៊ីវិញ ស្រាប់តែក្មេងទំនើង៣នាក់ជិះម៉ូតូដេញកាប់ដោយមិនដឹងមូលហេតុបណ្ដាលឲ្យរងរបួសធ្ងន់ម្នាក់ស្រាលម្នាក់ ។ ករណីនេះកើតឡើងកាលពីម៉ោង១១ និង៣០នាទីយប់ ថ្ងៃទី២១ ខែមករា ឆ្នាំ២០១៧ នៅចំណុចខាងត្បូងវត្តអង្គតាមិញ ផ្លូវបេតុង ភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ ។
ជនរងគ្រោះជាអ្នកបើកម៉ូតូដែលរបួសធ្ងន់ឈ្មោះ ឈឿន រ៉ាវុធ អាយុ២៧ឆ្នាំ មុខរបរកម្មកររោងចក្រ ស្នាក់នៅភូមិត្រពាំងរំចេក សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅភូមិប្រសិទ្ធ ឃុំពពេល ស្រុកត្រាំកក់ ខេត្តតាកែវ ចំណែកអ្នករួមដំណើររបួសស្រាលឈ្មោះ សឹង្ហ សុខ ភេទប្រុស អាយុ២១ឆ្នាំ មុខរបរកម្មកររោងចក្រ ស្នាក់នៅបន្ទប់ជួលភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតភូមិព្រៃជួល ឃុំពពេល ស្រុកត្រាំកក់ ខេត្តតាកែវ ។
ប្រភពពីជនរងគ្រោះបានប្រាប់ថា នៅមុនកើតហេតុពួកខ្លួនមានគ្នា៣នាក់បានទៅអង្គុយផឹកស៊ីនៅភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ ក្រោយពីផឹកហើយក៏បែកផ្លូវគ្នា ដោយខ្លួនមានគ្នា២នាក់ជិះម៉ូតូសង់កូរ៉េ ពណ៌ក្រហម ពាក់ស្លាកលេខ តាកែវ 1K-1170 ខណៈពេលចេញមកដល់ផ្លូវខាងលើ ស្រាប់តែមានជនបង្ក៣នាក់ជិះម៉ូតូ១គ្រឿង ម៉ាកហុងដាឌ្រីម ពណ៌ខ្មៅ ជិះតាមពីក្រោយដោយក្នុងដៃមានកាន់ដាវសាំម៉ូរ៉ៃ និងខ្សែក្រវាត់ ដេញវាយពួកគាត់ទាំង២នាក់ដោយមិនដឹងមូលហេតុ បណ្តាលឲ្យរងរបួសធ្ងន់ម្នាក់ និងស្រាលម្នាក់ ហើយក្រុមជនបង្កបានជិះម៉ូតូគេចខ្លួនអស់ ។
ប្រភពពីសមត្ថកិច្ចបានឲ្យដឹងថា ជនរងគ្រោះត្រូវបានក្រុមក្មេងទំនើងកាប់ត្រូវក្បាលផ្នែកខាងក្រោយ បណ្តាលឲ្យដាច់ឃើញលលាដ៍ក្បាល និងចាក់ចំពោះផ្នែកខាងឆ្វេងផងបណ្តាលឲ្យរងរបួសធ្ងន់ ចំណែកម្នាក់ទៀតរងរបួសស្រាលប៉ុណ្ណោះ ហើយបានទំនាក់ទំនងរថយន្តសង្គ្រោះមកដឹកទៅកាន់មន្ទីពេទ្យព្រះកុសុមៈភ្លាមៗ ។ ទាក់ទិនករណីខាងលើនេះ សមត្ថកិច្ចសង្ស័យថាជារឿងគំនុំ ៕
ប្រភព៖ កោះសន្តិភាព
ដោយឡែករំលឹកព័ត៌មានមួយផ្សេងទៀត៖ ខឹងខ្លាំងណាស់ ! បើកឡានបុកទម្លុះចូលក្នុងហាង
(រាជធានីភ្នំពេញ) ៖ បុរសជនជាតិចិន៣នាក់ បន្ទាប់ពីចូលទៅរករឿងម្ចាស់ភោជនីយដ្ឋានរួចតែមិនអស់ចិត្តបានបើកឡានបុកទម្លុះចូលក្នុងហាងបង្កឲ្យមានការភ្ញាក់ផ្អើលកាលពីវេលាម៉ោង១០ និង៣០នាទីយប់ ថ្ងៃទី២១ ខែមករា ឆ្នាំ២០១៧ នៅភោជនីដ្ឋានសាច់អាំងទ័ពអាកាសលេខ១ ផ្លូវលេខ២០៨ សង្កាត់បឹងរាំង ខណ្ឌដូនពេញ ។
បើតាមសំដីរបស់បុគ្គលិកស្រីម្នាក់សុំមិនបញ្ចេញឈ្មោះបានប្រាប់ឲ្យដឹងថា មុនពេលកើតហេតុមានជនជាតិចិនប្រុស៣នាក់ចូលមករករឿងថៅកែដែលជាចិនដូចគ្នា ដោយសារតែខឹងឈប់ជួលផ្ទះឲ្យជនជាតិចិនម្នាក់ក្នុងចំណោម៣នាក់នោះ ព្រោះជនជាតិចិនរូបនោះជួលផ្ទះស្នាក់នៅពីរបីខែមិនបានឲ្យលុយថ្លៃជួល ។ បុរសជាជនជាតិចិននោះខឹងបណ្តេញរូបគេចេញពីផ្ទះជួល ស្រាប់តែនៅយប់កើតហេតុបាននាំបក្សពួក២នាក់ទៀតជិះរថយន្ត ម៉ាកតូយ៉ូតាព្រូស ពណ៌ស្ករ ពាក់ស្លាកលេខ ភ្នំពេញ 2Y-7093 បានមកអុកឡុកក្នុងហាង ហើយបើករថយន្តបុកចូលក្នុងហាងធ្វើឲ្យខូចខាតសម្ភារក្នុងហាងអស់មួយចំនួន ភ្លាមៗនោះបុគ្គលិក និងថៅកែនាំគ្នាវាយបំបែកកញ្ចក់រថយន្តទាំងសងខាង ទើបអ្នកបើករថយន្តបង្កបានបើករថយន្តគេចចេញទៅដល់ផ្លូវលេខ២៣២ក៏ឈប់រថយន្តនៅកណ្ដាលផ្លូវមុខភោជនីដ្ឋានស្បូវមាស រួចបើកទ្វាររថយន្តរត់គេចខ្លួនបាត់អស់ ។
ក្រោយពេលកើតហេតុ សមត្ថកិច្ចចុះទៅដល់កន្លែងកើតហេតុបានសួរនាំ តែម្ចាស់ភោជនីយដ្ឋានប្រាប់ថា អត់ប្តឹងផ្តល់ទេ សុខចិត្តជួសជុលការខូចខាតដោយខ្លួនឯង សមត្ថកិច្ចក៏បានយករថយន្តបង្កហេតុទៅរក្សាទុកដើម្បីរង់ចាំម្ចាស់ចូលខ្លួនមកយករថយន្តវិញ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
