(ឧត្តរមានជ័យ)៖ បុរសម្នាក់មានប្រពន្ធ និងកូន២នាក់ បានសម្រេចចិត្តធ្វើអត្តឃាតសម្លាប់ខ្លួនឯង ដោយចង-កនៅក្នុងផ្ទះ ដោយមិនបានដឹងអំពីមូលហេតុច្បាស់លាស់ និងមិនបានបង្សល់ទុកអ្វី សូម្បីពាក់បណ្តាំចុងក្រោយ។ ហេតុការណ៍នេះបង្កឲ្យភ្ញាក់ផ្អើលទាំងព្រឹកថ្ងៃទី២២ ខែមករា ឆ្នាំ២០១៧ នៅចំណុចភូមិថ្គូវ ឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យ។
សមត្ថកិច្ចបានឲ្យដឹងថា ជនរងគ្រោះឈ្មោះ ភាព វិត អាយុ៣២ឆ្នាំ រស់នៅភូមិ ឃុំ កើតហេតុ មានប្រពន្ធ ឈ្មោះ ងួន ណយ អាយុ៣៦ឆ្នាំ មានកូន២នាក់រស់នៅជាមួយគ្នា។
តាមការបំភ្លឺពីប្រពន្ធ ជនរងគ្រោះបានទៅជួយបំរើភ្ញៀវក្នុងកម្មវិធីការអ្នកជិតខាង រហូតដល់យប់ថ្ងៃទី២១ ខែមករា ម្សិលមិញ ទើបត្រលប់មកវិញតែខ្លួនមិនដឹងថាប្ដី ចង-កសម្លាប់ខ្លួនឯងឡើយ លុះពេលព្រឹកកើតហេតុ ទើបដឹងថាប្ដីបានចងកសម្លាប់ខ្លួនបាត់ទៅហើយ។
ក្រោយពីសមត្ថកិច្ចធ្វើកោលស្យវិច័យ បានសន្និដ្ឋានថា សពរងគ្រោះពិតជាបានធ្វើអត្តឃាតសម្លាប់ខ្លួនឯងពិតប្រាកដមែន ហើយគ្មានស្នាកស្នាមអ្វីពាក់ព័ន្ធករណីឃាតកម្មដែរ។ បច្ចុប្បន្ននេះ សមត្ថកិច្ចបានប្រគល់សាកសពជូនគ្រួសារសព ដើម្បីយកទៅធ្វើបុណ្យតាមប្រពៃណី ៕
ប្រភព៖ Fresh News
ព័ត៌មានស្រដៀងគ្នានេះដែរ ករណីមួយផ្សេងទៀត៖ សល់៣ខែទៀតចូលរោង តូចចិត្តម្តាយស្តីបន្ទោសដាច់ចិត្តចងកសម្លាប់ខ្លួន
បុរសម្នាក់បានចងកសម្លាប់ខ្លួន នឹងច្រវាក់ក្នុងបន្ទប់ជួល រហូតដល់ហើមស្អុយ ទើបប្រជាពលរដ្ឋប្រទះឃើញ និងបង្កឲ្យមានការភ្ញាក់ផ្អើលកាលពីវេលាម៉ោង១១ និង៣០នាទីព្រឹក ថ្ងៃទី១៨ ខែមករា ឆ្នាំ២០១៧ កន្លងទៅ នៅក្នុងបន្ទប់ជួលលេខ៩ ជាន់ទី១ ផ្ទះលេខ១៣៤អា ផ្លូវបេតុង ភូមិឡកំបោ សង្កាត់ស្វាយប៉ាក ខណ្ឌឬស្សីកែវ។
បុរសដែលធ្វើអត្តឃាតឈ្មោះ ផា សូលីដា អាយុ២៨ឆ្នាំ មុខរបរ បុគ្គលិកក្រុមហ៊ុនតេលា ផ្នែកតេលាហ្គាស ស្នាក់នៅកន្លែងកើតហេតុខាងលើ និងមានទីលំនៅភូមិព្រែកព្នៅ សង្កាត់ព្រែកព្នៅ ខណ្ឌព្រែកព្នៅ។
តាមប្រភពព័ត៌មានឲ្យដឹងថា បុរសដែលគិតខ្លីមានគូដណ្តឹងឈ្មោះ យន់ ដាលីន ហៅយឿន អាយុ២៧ឆ្នាំ ស្នាក់នៅបន្ទប់ជួលជាមួយគ្នា ហើយគ្រោងចូលរោងការនៅខែមេសាខាងមុខនេះ គឺសល់តែ៣ខែទៀតទេ បែរជាចងសម្លាប់ខ្លួនទៅវិញ។ ទាក់ទិនការធ្វើអត្តឃាតនេះ ត្រូវបានក្រុមគ្រួសារឲ្យដឹងថា ដោយសារតែតូចចិត្តខ្លួនឯង ដែលសុំប្រាក់ទៅលោះទូរស័ព្ទ ម្តាយមិនឲ្យ ហើយម្តាយបានស្តីបន្ទោស ក៏បានចងកសម្លាប់ខ្លួនតែម្តង។ នៅថ្ងៃទី១៥ ខែមករា ឆ្នាំ២០១៧ វេលាម៉ោង៧យប់ បុរសរូបនោះបានទៅសុំលុយម្តាយបង្កើតនៅស្រុក ដើម្បីយកទៅលោះទូរស័ព្ទ ដែលខ្លួនបានដាក់បញ្ចាំ ហើយម្តាយមិនមាន ថែមទាំងស្តីបន្ទោសឱ្យបន្តិបន្តួច។
បន្ទាប់ពីទៅយកប្រាក់ ម្តាយមិនឲ្យក៏ត្រលប់មកផ្ទះជួលវិញ ហើយបានយកច្រវាក់ដែកប្រវែង២ម៉ែត្រដាក់ចូលក្នុងហោប៉ោខោ រត់ចេញពីផ្ទះ ប្រាប់គូដណ្តឹងថា ទៅមើលក្មួយនៅពេទ្យក៏បានបាត់ដំណឹងរហូត ស្រាប់តែនៅវេលាម៉ោង ប្រមាណ១១ព្រឹក មានអ្នកជួលផ្ទះក្បែរគ្នាធុំក្លិន ក៏បាននាំគ្នាដើររកឃើញ សពបុរសនោះហើមស្អុយ ចងកសម្លាប់ខ្លួននៅបន្ទប់ទំនេរជាន់ទី១។
បន្ទាប់ពីភ្ញាក់ផ្អើល នគរបាលបានចុះពិនិត្យសពបញ្ជាក់ថា បុរសនោះចងកសម្លាប់ខ្លួនឯង ហើយនៅក្នុងកាបូប និងក្នុងបន្ទប់ក៏មានសម្ភារ សម្រាប់ប្រើប្រាស់គ្រឿងញៀនផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]