(ភ្នំពេញ)៖ សាលាដំបូងរាជធានីភ្នំពេញ នៅព្រឹកថ្ងៃទី២០ ខែមករា ឆ្នាំ២០១៧នេះ បានបន្តសវនាការសំណុំរឿងបាញ់សម្លាប់ឧកញ៉ាអ៊ឹង ម៉េងជឺ ដែលជាករណីកក្រើកនៅក្នុងរាជធានីភ្នំពេញ កាលពីឆ្នាំ២០១៤ ប៉ុន្តែសវនាការនេះ គ្មានវត្តមានលោក ថោង សារ៉ាត់ ដែលជាមេខ្លោងនោះទេ ពោល មានតែក្រុមអង្គរក្ស៤នាក់ប៉ុណ្ណោះ ដែលត្រូវបញ្ជូនមកឲ្យអង្គុយស្ដាប់ចម្លើយសាក្សីនៅក្នុងសវនាការ។
មន្ត្រីតុលាការបានបញ្ជាក់ថា សវនាការនេះដឹកនាំដោយលោក តុប ឈុនហេង អនុប្រធានសាលាដំបូងរាជធានីភ្នំពេញ និងលោក តុប ឈុនឡុង ជាតំណាងអយ្យការ។
បើតាមមន្រ្តីតុលាការ សវនាការនេះ ផ្ដោតសំខាន់លើការសាកសួរយកចម្លើយពីសាក្សីដែលជាប្រពន្ធរបស់កងអង្គរក្ស លោក ថោង សារ៉ាត់ ប៉ុណ្ណោះ។ ចំពោះក្រុមអង្គរក្សដែលជាប់ចោទទាំង៤នាក់ បានផ្ដល់ចម្លើយនៅក្នុងសវនាការរួចហើយ លើកលែងតែ លោក ថោង សារ៉ាត់ ម្នាក់ប៉ុណ្ណោះ ដែលមិនទាន់ផ្ដល់ចម្លើយនៅចំពោះមុខក្នុងសវនាការ។
មានសាក្សីជាង៦០នាក់ដែលត្រូវផ្ដល់ចម្លើយក្នុងតុលាការនៅក្នុងសំណុំរឿងឃាតកម្មនេះ ក្នុងនោះមានសាក្សីខ្លះជាឧកញ៉ា មេធាវី សមត្ថកិច្ច ប្រជាពលរដ្ឋ និងប្រពន្ធរបស់ លោក ថោង សារ៉ាត់ ជាដើម ដែលសាក្សីខ្លះជាសាក្សីដោះបន្ទុក ហើយសាក្សីខ្លះជាសាក្សីដាក់បន្ទុក។
លោកទួត លុច ជាមេធាវីការពារក្ដីលោក ថោង សារ៉ាត់បានបញ្ជាក់ថា លោក ថោង សារ៉ាត់ ឡើងសម្ពាធឈាមខ្ពស់ មិនអាចផ្ដល់ចម្លើយក្នុងសវនាការបានទេ។
លោក ថោង សារ៉ាត់ ត្រូវបានតុលាការចោទប្រកាន់ពីបទផ្ដើមគំនិតក្នុងអំពើឃាតកម្មគិតទុកជាមុន តាមមាត្រា២០០ និង ២៨ នៃក្រមព្រហ្មទណ្ឌ ប្រព្រឹត្រកាលពីថ្ងៃទី២២ ខែវិច្ឆិកា ឆ្នាំ២០១៤ នៅក្នុងសង្កាត់ទួលស្វាយព្រៃ ខណ្ឌចំការមន ។ បទល្មើសនេះកំណត់ការផ្តន្ទាទោសដាក់ពន្ធនាគារអស់មួយជីវិត ៕
ប្រភព៖ Fresh News
ដោយឡែករំលឹកព័ត៌មានមួយផ្សេងទៀត៖ នគរបាលខណ្ឌឫស្សីកែវនាំគ្នាទៅព័ទ្ធផ្ទះ ចាប់បានម្នាក់ រត់រួចម្នាក់
នគរបាលខណ្ឌឫស្សីកែវ ដឹកនាំដោយលោក ទៀង ចាន់សា អធិការខណ្ឌ កាលពីវេលាម៉ោង៨ និង៤០នាទីយប់ ថ្ងៃទី១៩ ខែមករា ឆ្នាំ២០១៧ បាននាំគ្នាទៅឡោមព័ទ្ធផ្ទះមួយកន្លែង នៅតាមបណ្តោយផ្លូវលេខ១០៣១ ស្ថិតក្នុងភូមិ១ សង្កាត់ច្រាំងចំរះ១ ខណ្ឌឫស្សីកែវ ដោយឃាត់ខ្លួនបានជនសង្ស័យម្នាក់ កាំភ្លើងខ្លីម៉ាកកា៥៩ មួយដើម និងម៉ូតូគ្រឿង ។
ជនសង្ស័យដែលត្រូវឃាត់ខ្លួនបានឈ្មោះ អាហ្វីន ភេទប្រុស អាយុ២៨ឆ្នាំ ស្នាក់នៅផ្ទះកើតហេតុ ចំណែកបក្សពួកដែលរត់គេចខ្លួនបាត់នៅមិនទាន់ស្គាល់អត្តសញ្ញាណនៅឡើយទេ ។
លោក ទៀង ចាន់សា អធិការខណ្ឌឫស្សីកែវ បានឲ្យដឹងថា ខណៈពេលកម្លាំងកំពុងល្បាតនៅក្នុងមូលដ្ឋាននៅម្តុំជិតកន្លែងកើតហេតុ ស្រាប់តែលេចមុខជនសង្ស័យ២នាក់ជិះម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៧ ពាក់ស្លាកលេខ ភ្នំពេញ1GE-1709 ប្រដាប់ដោយកាំភ្លើងខ្លី១ដើម ម៉ាកកា៥៩ ពណ៌ទឹកប្រាក់ ច្រកថង់ពណ៌សព្យួរនៅដៃចង្កូតម៉ូតូ ពេលនោះគ្រាន់តែឃើញសមត្ថកិច្ចភ្លាមជនសង្ស័យភ័យស្លន់ស្លោបានបើកម៉ូតូទៅបុកម៉ូតូសមត្ថកិច្ចបណ្តាលឲ្យដួលហើយជនសង្ស័យម្នាក់បានរត់ចូលក្នុងផ្ទះជីដូនរបស់គេនៅក្បែរកន្លែងកើតហេតុ ចំណែកជនសង្ស័យម្នាក់ទៀតរត់គេចខ្លួនបាត់ស្រមោល ។
លោកអធិការខណ្ឌឫស្សីកែវ ឲ្យដឹងទៀតថា បន្ទាប់ពីជនសង្ស័យម្នាក់រត់ចូលក្នុងផ្ទះជីដូនរបស់គេនៅក្បែរកន្លែងកើតហេតុ សមត្ថកិច្ចបានឡោមព័ទ្ធចាប់ជនសង្ស័យ ពេលនោះជនសង្ស័យ ហក់ចុះពីលើដំបូលផ្ទះជីដូន ឆ្លងទៅដំបូលផ្ទះមួយទៀត ទើបសមត្ថកិច្ចបង្ខំចិត្តផ្ទុះអាវុធចំនួន២គ្រាប់ បណ្តាលឲ្យត្រូវជនសង្ស័យរបួសជើងម្ខាង ។
ក្រោយពេលកើតហេតុ ជនសង្ស័យត្រូវសមត្ថកិច្ច បញ្ជូនទៅអធិការដ្ឋាននគរបាលខណ្ឌឫស្សីកែវ ដើម្បីធ្វើការសាកសួរ និងកសាងសំណុំរឿងបញ្ចូនទៅតុលាការចាត់ការបន្តតាមនីតិវិធី ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]