ខេត្តបន្ទាមានជ័យ ៖ បន្ទាប់ពីស្ត្រីម្នាក់ត្រូវបានគេ ប្រទះឃើញដេកស្លាប់នៅក្នុងបន្ទប់ផ្ទះសំណាក់យីហោ «ម៉ារីមានជ័យ» កម្លាំងអាវុធហត្ថខេត្តបានធ្វើការស្រាវជ្រាវរហូតឃាត់ខ្លួនស្ត្រីម្នាក់កាលពីថ្ងៃទី១៨ ខែមករា ឆ្នាំ២០១៧ នៅភូមិគោកស្វាយ ឃុំភូមិថ្មី ស្រុកថ្មពួក ខេត្តបន្ទាយមានជ័យ ពីបទផ្សំគំនិតក្នុងអំពើឃាតកម្ម សម្លាប់ប្លន់យកទ្រព្យសម្បត្តិ ។
សូមបញ្ជាក់ថា ស្ត្រីម្នាក់ឈ្មោះ ប៊ុន សូរៀត ហៅ ប៉ក់ អាយុ៤០ឆ្នាំ ជាស្ត្រីមេម៉ាយកូនមួយ មុខរបរលក់ចាប់ហួយ និងជាគ្រូទាយសន្លឹកបៀ រស់នៅភូមិកន្ទួត សង្កាត់កំពង់ស្វាយ ក្រុងសិរីសោភ័ណ ត្រូវបានគេប្រទះឃើញដេកស្លាប់នៅក្នុងបន្ទប់ផ្ទះសំណាក់យីហោ «ម៉ារីមានជ័យ» ដែលមានទីតាំងនៅភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ បង្កឲ្យមានការភ្ញាក់ផ្អើល កាលពីវេលាម៉ោងប្រហែល១២ថ្ងៃត្រង់ ថ្ងៃទី១៤ ខែមករា ឆ្នាំ២០១៧ ។
លោកវរសេនីយ៍ឯក ស ប៊ុនសឿង មេបញ្ជាការងកងរាជអាវុធហត្ថខេត្តបន្ទាយមានជ័យ បានឲ្យដឹងថា បន្ទាប់ពីពិនិត្យ និងធ្វើកោសល្យវិច្ច័យ សពស្ត្រីរងគ្រោះរួច សមត្ថកិច្ចបានធ្វើការសន្និដ្ឋានថា ជាអំពើឃាតកម្មសម្លាប់ ប្លន់យកទ្រព្យសម្បត្តិ ។
លោកមេបញ្ជាការរង បន្តថា បន្ទាប់ពីសន្និដ្ឋានថា ជាករណីឃាតកម្ម សមត្ថកិច្ចបានដុតដៃដុតជើងធ្វើការស្រាវជ្រាវរហូតធ្វើការឃាត់ខ្លួនស្ត្រីម្នាក់ពីបទផ្សំគំនិតក្នុងអំពើឃាតកម្មសម្លាប់ប្លន់ យកទ្រព្យសម្បត្តិ ។ លោកបន្តថា ស្ត្រីសង្ស័យឈ្មោះ សឿយ ណាត អាយុ៤៥ឆ្នាំ រស់នៅភូមិគោកស្វាយ ឃុំភូមិថ្មី ស្រុកថ្មពួក ខេត្តបន្ទាយមានជ័យ ចំណែកប្តីជាឃាតករឈ្មោះ សែន សុខន អាយុ៤១ឆ្នាំ បានរត់គេចខ្លួនបាត់ ។
លោកវរសេនីយ៍ឯក ស ប៊ុនសឿង ឲ្យដឹងទៀតថា ក្រោយពេលស្រាវជ្រាវ និងចាប់ខ្លួនស្ត្រីសង្ស័យ សមត្ថកិច្ចរកឃើញវត្ថុតាងដែលជាទ្រព្យសម្បត្តិរបស់ជនរងគ្រោះ រួមមាន ១-ខ្សែកប្លាទីន ក្បាច់ច្រវាក់ឆាប១ខ្សែ ទម្ងន់៤ជី២ហ៊ុន, ២-ខ្សែកប្លាទីន ក្បាច់ព្រលឹតកាច់១ខ្សែ ទម្ងន់៤ជី៩ហ៊ុន៨លី, ៣-ខ្សែដៃក្បាច់ផ្កាបីកង់១ខ្សែ ទំងន់២ជី៩ហ៊ុន៨លី, ៤-ចិញ្ចៀនប្លាទីន ក្បាច់អង្គារដី១វង់ ទម្ងន់២ជី៤ហ៊ុន៨លី, ៥-មាសដុំទម្ងន់៣ជី, ៦-កងដៃប្លាទីន១០កង ទម្ងន់៦ជី៦លី, ៧-ខ្សែដៃប្លាទីន ក្បាច់អង្គាដី១ខ្សែ ទម្ងន់២ជី៦ហ៊ុន៣លី, ៨-ខ្សែកប្លាទីនក្បាច់ថ្នាំងអំពៅ១ខ្សែ ទម្ងន់២ជី១ហ៊ុន៥លី, ៩-ខ្សែកប្លាទីនក្បាច់សក់ក្រង១ខ្សែ ទម្ងន់៤ជី៨លី ។ ចំណែកម៉ូតូ១គ្រឿង និងទ្រព្យសម្បត្តិមួយចំនួនទៀត ត្រូវបានជនសង្ស័ជាឃាតករដៃដល់ឈ្មោះ សែន សុខន យកគេចខ្លួនបាត់ ។
ក្រោយពេលចាប់ខ្លួន ស្ត្រីសង្ស័យសារភាពប្រាប់ កម្លាំងអាវុធហត្ថឲ្យដឹងថា ទ្រព្យសម្បត្តិទាំងនេះ គឺប្តីរបស់ខ្លួនបានយកមកឲ្យ តែគាត់មិនដឹងបានមកពីណា ។ យោងតាមចម្លើយសារភាព និងវត្ថុតាងដែលបានប្រទះឃើញ ស្ត្រីសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅ សាលាដំបូងខេត្តបន្ទាយមានជ័យ ដើម្បីចាត់ការបន្តតាមនីតិវិធីច្បាប់ ហើយក៏កំពុងដុតដៃដុតជើង ធ្វើការស្រាវជ្រាវតាម ចាប់ខ្លួនជនដៃដល់ជាឃាតករដែលកំពុងរត់គេចខ្លួនផងដែរ ។
លោកមេបញ្ជាការង កងរាជអាវុធហត្ថ ខេត្តបន្ទាយមានជ័យបញ្ជាក់ថា ទ្រព្យសម្បត្តិរបស់ស្ត្រីរងគ្រោះដែលកម្លាំង កងរាជអាវុធហត្ថខេត្តសហការ ជាមួយកម្លាំងកងរាជអាវុធស្រុកថ្មពួក ត្រូវបានប្រគល់ទៅឲ្យ កូនប្រុសស្ត្រីរងគ្រោះឈ្មោះ សិទ្ធ សៀវលីស៊ីង អាយុ១២ឆ្នាំ និងឈ្មោះ ប៊ុន លី ភេទប្រុស អាយុ៥០ឆ្នាំ ជាគ្រូបង្រៀននៅអនុវិទ្យាល័យភ្នៀត រស់នៅភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ កាលពីព្រឹកថ្ងៃទី១៩ ខែមករា ឆ្នាំ២០១៧ រួចរាល់អស់ហើយ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
