(មណ្ឌលគិរី)៖ ជនជាតិវៀតណាម៦២នាក់ ដែលលួចចូលមកធ្វើការនៅការដ្ឋានរ៉ែមាស ស្ថិតក្នុងនៅឃុំចុងផ្លាស់ ស្រុកកែវសីមា ខេត្តមណ្ឌលគិរី ខុសច្បាប់ ពោលមិនមានលិខិតឆ្លងដែនត្រឹមត្រូវនោះ ត្រូវបានលោក តែ គឹមសាន ប្រធានសហគមន៍សិប្បកររ៉ែមាស ឃុំចុងផ្លាស់ លួចនាំទៅកាន់ប្រទេសវៀតណាមវិញ នៅយប់ថ្ងៃទី១៨ ខែមករា ឆ្នាំ២០១៧ តែត្រូវសមត្ថកិច្ចចម្រុះឃាត់បានវិញ ត្រង់ចំណុចអង់តែន០១២ទឹកខួប ឃុំស្រែខ្ទុម ស្រុកកែវសីមា។
សមត្ថកិច្ចបានឲ្យដឹងថា ជនជាតិវៀតណាជាច្រើននាក់ខាងលើ បានទៅធ្វើការនៅការដ្ឋានរ៉ែមាស នៅចំណុចឃុំចុងផ្លាស់ ប៉ុន្តែការឃាត់ខ្លួនជនជាតិវៀតណាមជាច្រើននាក់ខាងលើនោះ ត្រូវបានគេដោះលែងវិញអស់ហើយនៅព្រឹកថ្ងៃទី១៩ ខែមករា ឆ្នាំ២០១៧នេះ។
ប្រភពព័ត៌មានផ្សេងទៀត បានឲ្យដឹងថា ការលួចនាំជនជាតិវៀតណាមជាច្រើននាក់ទាំងយប់ ក្នុងបំណងចេញទៅប្រទេសវៀតណាម ដោយលោក តែ គឹមសាន ប្រធានសហគមន៍សិប្បកររ៉ែមាស ឃុំចុងផ្លាស់ ទំនងមានលក្ខខណ្ឌពិសេសអ្វីមួយហើយ បានជាលោក តែ គឹមសាន ធ្វើបានយ៉ាងងាយស្រួលបែបនេះ។
យ៉ាងណាមិញ ប្រជាពលរដ្ឋបានសំណូមពរ ឲ្យអាជ្ញាធរខេត្ត និងមន្ទីជំនាញ បង្កើតគណៈកម្មការខេត្ត ធ្វើការចុះស្រាវជ្រាវនៅទីតាំងសហគមន៍សិប្បកររ៉ែមាស នៅឃុំចុងផ្លាស់ ស្រុកកែវសីមា ខេត្តមណ្ឌលគិរីផង ព្រោះសហគមន៍សិប្បកររ៉ែមាស នៅទីតាំងនោះ បើទោះបីថាមានច្បាប់អនុញ្ញាតក៏ពិតមែន ប៉ុន្ដែត្រូវមហាជនកំពុងដាក់ការសង្ស័យថា ធ្វើអាជីវកម្មរ៉ែមាស ផ្ទុយទៅច្បាប់អនុញ្ញាត ហើយដូចជាសមត្ថកិច្ចមន្រ្តីជំនាញខាងមន្ទីររ៉ែ អាចមានការឃុបឃិតគ្នា ជាមួយសហគមន៍បានជា បណ្តែតបណ្តោយឲ្យមានជនជាតិបរទេស ចូលមកធ្វើការនៅទីនោះយ៉ាងគគ្រឹកគគ្រេង ដោយខួងរណ្តៅ ឬប្រើប្រាស់រំសេវជាតិផ្ទុះ មានជំរៅជ្រៅរាប់រយម៉ែត្រ លើសពីច្បាប់កំណត់។
ទាក់ទងករណីលួចនាំជនជាតិវៀតណាមទាំងយប់ បម្រុងឆ្លងទៅកាន់ប្រទេសវៀតណាមវិញ តែត្រូវសមត្ថកិច្ចឃាត់ខ្លួន បានមួយពព្រិចភ្នែករួចដោះលែងវិញនោះ គេឃើញ លោក តែ គឹមសាន ប្រធានសហគមន៍សិប្បកររ៉ែមាស ជាបើករថយន្ដ នាំផ្លូវក្រុមវៀតណាមទាំងនោះ។ ប៉ុន្ដែលោក តែ គឹមសាន បានឲ្យដឹង នៅព្រឹកថ្ងៃទី១៩ ខែមករានេះថា លោក មិនបានដឹងអីទេ គ្រាន់តែជាអ្នកជួយរកឡាន ឲ្យជិះ និងជូនពួកគេទៅតែប៉ុណ្ណោះ។
ពាក់ព័ន្ធបញ្ហានេះ លោក ទៀង សៅរ័ត្ន ស្នងការរង ទទួលបន្ទុកជនអន្តោប្រវេសន៍ បានបញ្ជាក់ថា ជនជាតិវៀតណាមទាំង៦២នាក់ខាង លើត្រូវបាន បញ្ជូនមកដល់ច្រកទ្វាទ្វរភាគីឡាប៉ាខេ ក្នុងស្រុកកែវសីមា ហើយខាងជំនាញកំពុងបំពេញនិតិវិធី នឹងធ្វើការបណ្ដេញចេញពីទឹកដីកម្ពុជា បន្ទាប់ពីពួកគាត់ចូលមកខុសច្បាប់ ហើយតាមច្បាប់ពួកគេ ត្រូវមានទោសជាប់ពន្ធធានាគាចាប់ពី៣ ទៅ៦ខែ តែដោយយោងតាមកិច្ចសហប្រត្តិបត្តិការរវាងប្រទេសនឹងប្រទេសនោះ ពេលនេះ លោកបានបញ្ជូនជនវៀតណាមទាំង៦២នាក់ ទៅឲ្យខាងភាគីប្រទេសវៀមណាម ធ្វើការអប់រំដោយមានការរាយការណ៍ទៅ អគ្គនាយកដ្ឋានអន្តោប្រវេសន៍ ព្រមទាំងស្ថាប័នអយ្យការផងដែរ៕
ប្រភព៖ Fresh News
ដោយឡែក រំលឹកព័ត៌មានចាស់លើកមុនផងដែរថា៖ បណ្តេញជនជាតិវៀតណាម៦នាក់ទៅប្រទេសកំណើតវិញ
ជនជាតិវៀតណាម៦នាក់ (ស្រី២នាក់) ត្រូវបានកម្លាំនគរបាលអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ ធ្វើការបណ្តេញចេញតាមច្រកទ្វារអន្តរជាតិក្អមសំណរ ដែលធ្វើឡើងក្រោម អធិបតីភាពរបស់លោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តន៍នីតិវិធី ក្រោយពីបានរកឃើញពួកគេបានលួចចូលមកស្នាក់នៅ និងបំពេញការងារ ជាជាងសំណង់ដោយខុសច្បាប់នោះ ។
ការបណ្តេញចេញនេះ ធ្វើឡើងកាលពីវេលាម៉ោង១០ និង១៥នាទីព្រឹក ថ្ងៃទី១៣ ខែមករា ឆ្នាំ២០១៧ កន្លងទៅ នៅអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ ដែលមានទីតាំងទល់មុខអាកាសយានដ្ឋានអន្តរជាតិភ្នំពេញ ។
លោកឧត្តមសេនីយ៍ទោ អ៊ុក ហៃសីឡា ជាប្រធាននាយកដ្ឋានស៊ើបអង្កេត និងអនុវត្តនីតិវិធី ដោយយោងទៅតាមបទបញ្ជា យ៉ាងមុតមាំរបស់លោកនាយឧត្តមសេនីយ៍ សុខ ផល អគ្គនាយក នៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ ដើម្បីធ្វើយ៉ាងណាឲ្យកម្លាំងរបស់លោកពង្រឹង ច្បាប់អន្តោប្រវេសន៍នៅក្នុងព្រះរាជណាចក្រកម្ពុជាឲ្យមានប្រសិទ្ធភាពខ្ពស់នោះ កម្លាំងនគរបាល នៃនាយកដ្ឋានស៊ើបអង្កេត និងអនុវត្តនីតិវិធីរបស់លោកតែងតែ បានចុះអនុវត្តន៍ និងចុះធ្វើប្រតិបត្តិការត្រួតពិនិត្យរាល់ការស្នាក់នៅ និងបំពេញការងាររបស់ ជនបរទេសគ្រប់សញ្ជាតិ និងគ្រប់ទីកន្លែងទាំងអស់នៅទូទាំងបណ្តាខេត្ត និងក្រុងទាំង២៥ នៅក្នុងព្រះរាជាណាចក្រកម្ពុជា ។
លោកឧត្តមសេនីយ៍ទោ បានប្រាប់បន្តទៀតថា ជាក់ស្តែងក្នុងថ្ងៃនេះដែរកម្លាំងនគរបាល នៃនាយយកដ្ឋានស៊ើបអង្កេត និងអនុវត្តន៍នីតិវិធីបានធ្វើការបណ្តេញចេញទៅវិញនូវជនអន្តោប្រវេសន៍ ខុសច្បាប់ដែលជាជនជាតិវៀតណាមចំនួន៦នាក់ (ស្រី២នាក់) ទៅតាមច្រកទ្វារអន្តរជាតិក្អមសំណរ ។
ក្រុមជនជាតិវៀតណាម ដែលត្រូវធ្វើការបណ្តេញចេញ ទៅកាន់ស្រុកកំណើតវិញទាំង៦នាក់នេះ គឺបានធ្វើឡើងក្រោយពីកម្លាំង របស់លោកបានរកឃើញថា ពួកគេកំពុងតែលួចស្នាក់នៅ និងបំពេញការងារដោយខុសច្បាប់ នៅក្នុងរាជធានីភ្នំពេញចំនួន៥នាក់ និងខេត្តសៀមរាបម្នាក់នាពេលកន្លងមកនេះ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]