ខេត្តព្រៃវែង ៖ បច្ចុប្បន្ននេះគេសង្កេតឃើញថា ប្រជាកសិករនៅតាមបណ្តាស្រុកមួយចំនួនក្នុងខេត្តព្រៃវែង ជាពិសេសអ្នកនៅជាប់នឹង ព្រំដែនវៀតណាម កំពុងតែនាំគ្នាប្រមូលលាមកគោ លក់ទៅឱ្យឈ្មួញវៀតណាមយ៉ាងគគ្រឹកគគ្រេងជារៀងរាល់ថ្ងៃ ដោយមានឈ្មួញខ្មែរដើរប្រមូលទិញដល់ផ្ទះតែម្តង គោ ក្របីជុះធ្លាក់ដល់់ដីមិនទាន់ទេ កើបហាលថ្ងៃភ្លាមទុកលក់ឱ្យយួន ។
ការផ្អើលលក់លាមកគោនេះ ត្រូវបានគេដឹងថាយ៉ាងហោចណាស់លាមកគោប្រមាណ៥តោន ក្នុងមួយថ្ងៃត្រូវបានលក់ឱ្យឈ្មួញវៀតណាម ។ ការលក់លាមកគោ ដែលជាប្រភពផ្តល់ជីដាក់ស្រែដោយមិនខ្វាយខ្វល់ពីសំណាក់កសិករខ្មែរនេះ កំពុងបង្ហាញនូវកម្រិតយល់ដឹងទាបណាស់ ។
ផ្ទុយទៅវិញពួកគាត់បែរជានាំគ្នាទិញជីគីមី ពីប្រទេសវៀតណាម យកមកដាក់ស្រែគ្រប់ៗគ្នា ទោះបីជាតម្លៃជីទាំងនោះថ្លៃប៉ុន្មានក៏ដោយ និងភ្លេចគិតថា លាមកគោដែលពួកគាត់នាំគ្នាកើបលក់ឱ្យគេនោះ គឺជាប្រភពជីធម្មជាតិដ៏សម្បូរបែប សំរាប់ដាក់ស្រែចំការរបស់ពួកគាត់នោះឡើយ ។
លោកយាយ ពោជ គន់ អាយុ៦៥ឆ្នាំ ជាប្រជាកសិករនៅភូមិជ្រៃថ្មី ឃុំកោះរកា ស្រុកពាមជរ ដែលកំពុងតែកាយហាលលាមកគោទុក សម្រាប់លក់ឱ្យឈ្មួញបានប្រាប់កោះសន្តិភាពថា លាមកគោដែលហាលស្ងួតហើយ គាត់លក់បានតម្លៃ៣០០០រៀលក្នុង១បាវ ។ គាត់ប្រាប់ថា មានច្រើនប៉ុណ្ណាក៏គេទិញដែរ ហើយអ្នកភូមិរបស់គាត់គ្រប់ៗគ្នា សុទ្ធតែបានលក់លាមកគោដូចជាគាត់ដែរ និងបានកម្រៃគ្រាន់ដោះស្រាយជីវភាពខ្លះៗ ។ ប៉ុន្តែនៅពេលសួរលោកយាយថា តើលោកយាយបានជីអ្វីដាក់ស្រែនោះបើលក់លាមកគោអស់ទៅហើយនោះ លោកយាយបានអះអាងថា គឺគាត់ទិញជីគីមីពីប្រទេសវៀតណាម មកប្រើវិញ ។ គាត់ចេះថ្នូរថាឥឡូវនេះពិបាកណាស់ ធ្វើស្រែមិនសូវចំណេញទេ ព្រោះតម្លៃស្រូវថោក ឯជីចេះតែឡើងថ្លៃ ។
បុរសឈ្មោះ អ៊ឹម សារឿន ជាឈ្មួញដើរប្រមូលទិញលាមកគោពីតាមខ្នងផ្ទះរបស់អ្នកស្រុក បានប្រាប់ឱ្យកោះសន្តិភាពដឹងថា ក្នុងលាមកគោ១បាវ គាត់ទិញពីអ្នកស្រុកតម្លៃ៣០០០រៀល ហើយដឹកយកទៅលក់ដល់ក្នុងដីវៀតណាមបានតម្លៃ៤៥០០រៀល ក្នុង១ថ្ងៃគាត់ដើរប្រមូលទិញលាមកគោបានជាមធ្យម១០០បាវ ហើយអ្នកដែលរកស៊ីដើរប្រមូលទិញលាមកគោដូចជាគាត់ នៅក្នុងឃុំកោះរការមានចំនួន៥ទៅ៦នាក់ ។ ដូច្នេះជាមធ្យមក្នុង១ថ្ងៃ ពួកគាត់បានទិញលាមកគោ យកទៅលក់ឱ្យឈ្មួញវៀតណាមបានចំនួនពី៥០០ទៅ៦០០បាវ ។
គាត់បានបញ្ជាក់ថា ធាតុពិតបើពួកគាត់ដើរប្រមូលទិញលាមកគោដល់ណា អ្នកស្រុកនៅទីនោះនឹងនាំគ្នាកើបលក់លាមកគោដល់ទីនោះ គឺលក់គ្រប់ៗគ្នា ប៉ុន្តែ បច្ចុប្បន្ននេះពួកគាត់ដើរប្រមូលទិញបានត្រឹមតែក្នុងឃុំកោះរកា១ប៉ុណ្ណោះ ។ ចំណែកឃុំផ្សេងៗទៀតពួកគាត់ទៅមិនដល់នោះទេ ព្រោះគ្មានកំលាំងគ្រប់គ្រាន់ ជាពិសេសគឺមធ្យោបាយដឹកជញ្ជូនតែម្តង ដោយពួកគាត់មានតែគោយន្តកែច្នៃប្រភេទតាឡេថងប៉ុណ្ណោះ ប៉ុន្តែបើមានរថយន្តធំៗក៏អាចប្រមូលទិញបានច្រើន ។
យោងតាមព័ត៌មាន ដែលទទួលបានពីមន្ត្រីមូលដ្ឋាន នៅតាមបណ្តាស្រុកមួយចំនួនបានឱ្យដឹងថា នៅក្នុងខេត្តព្រៃវែងមិនមែនមានតែឃុំកោះរកា ស្រុកពាមជរនេះ១ទេ ដែលអ្នកស្រុកផ្អើលនាំគ្នាលក់លាមកគោឱ្យវៀតណាមនោះ ចំណែកនៅស្រុកមួយចំនួនទៀត ដូចជាស្រុកព្រះស្តេច ស្រុកមេសាង ស្រុកកំពង់ត្របែក និងស្រុកកំចាយមារជាដើម ក៏មានអ្នកស្រុកនាំគ្នាកើបលាមកគោលក់ឱ្យវៀតណាមដែរ ។ តាមការសន្និដ្ឋានក្រៅផ្លូវការក្នុង១ថ្ងៃៗចំនួនលាមកគោ ដែលត្រូវបាននាំចេញទៅប្រទេសវៀតណាម គឺមិនក្រោម៥តោននោះទេ ប៉ុន្តែសកម្មភាពនេះគឺមិនសូវត្រូវបានគេចាប់អារម្មណ៌នោះទេ ដោយសារតែការនាំចេញនេះមានរូបភាពតូចៗ ហើយពេលខ្លះក៏មានការភាន់ច្រឡំជាមួយនឹងការនាំចេញស្រូវផងដែរ ព្រោះគេច្រកបាវដឹកដូចគ្នា ។
ទន្ទឹមនឹងការផ្អើលនាំគ្នាលក់លាមកគោទៅឱ្យប្រទេសវៀតណាមដ៏ច្រើនសន្ធឹកសន្ធាប់ និងជារៀងរាល់ថ្ងៃបែបនេះ ត្រូវបានក្រុមអ្នកវិភាគជាច្រើនសំដែងនូវការព្រួយបារម្មណ៌ជាខ្លាំង នៅពេលឃើញបងប្អូនកសិករខ្មែរ នាំគ្នាប្រមូលយកលាមកគោ ដែលជាប្រភពជីធម្មជាតិមានប្រយោជន៍បំផុត សំរាប់មុខរបរធ្វើស្រែរបស់ពួកគាត់ យកទៅដូរយកលុយកាក់បន្តិចបន្តួច រួចហើយ បែរជានាំគ្នាចំណាយលុយដ៏ច្រើនសន្ធឹកសន្ធាប់ទៅទិញជីគីមី ពីប្រទេសគេមកប្រើវិញ ទាំងដែលជីគីមីទាំងនោះបានបង្កនូវផលប៉ះពាល់ជាច្រើន ដល់សុខភាពរបស់ប្រជាជនខ្មែរយើង ។ ក្រុមអ្នកវិភាគទាំងនោះបានលើកឡើងថា បញ្ហានេះអាជ្ញាធរ និងមន្ត្រីជំនាញត្រូវតែយកចិត្តទុកដាក់ឱ្យបានខ្លាំង និងចាត់វិធានការទប់ស្កាត់តាមរយៈការអប់រំណែនាំឱ្យបានច្បាស់លាស់ ។ ពុំនោះទេផលវិបាកជាច្រើន នឹងកើតមានជាបន្តបន្ទាប់នៅពេលខាងមុខ ដែលធ្វើឱ្យប៉ះពាល់ដល់សេដ្ឋកិច្ចគ្រួសាររបស់ប្រជាពលរដ្ឋ ព្រមទាំងសេដ្ឋកិច្ចរបស់ជាតិផងដែរ ។
ចំពោះករណីនេះត្រូវបានលោក អ៊ុក សំណាងប្រធានមន្ទីរកសិកម្មខេត្តព្រៃវែងប្រាប់ឱ្យដឹងតាមទូរសព្ទ័ថាចំនួនប្រជាកសិករដែលនាំគ្នាលក់លាមកគោទៅឱ្យប្រទេសជិតខាងនោះ លោកទទួលស្គាល់ថា គឺពិតជាកើនឡើងកាន់តែច្រើនមែន ដោយសារតែលាមកគោវាមានតម្លៃថ្លៃ ហើយពួកគាត់អាចបានប្រាក់កម្រៃមកប្រើប្រាស់ភ្លាមៗតាមសេចក្តីត្រូវការ ។
លោក អ៊ុក សំណាង បានបញ្ជាក់ទៀតថាចំពោះករណីនេះខាងមន្ទីររបស់លោក បានត្រឹមតែធ្វើការណែនាំដល់ប្រជាពលរដ្ឋឱ្យយល់ដឹងអំពីអត្ថប្រយោជន៍របស់លាមកគោ និងអំពាវនាវឱ្យពួកគាត់ ឈប់លក់តទៅទៀតប៉ុណ្ណោះ ។ លោកថា ប៉ុន្តែលោកមិនមានវិធានការណាមួយ សំរាប់ទប់ស្កាត់ ឬហាមឃាត់ពួកគាត់មិនឱ្យលក់លាមកគោនោះទេ ព្រោះច្បាប់ពុំបានហាមឃាត់ ។
គួរបញ្ជាក់ផងដែរថា តាមការបកស្រាយរបស់អ្នកជំនាញផ្នែកកសិកម្ម លាមកគោគឺជាប្រភពជីដ៏មានប្រយោជន៍បំផុតសំរាប់មុខរបរធ្វើស្រែចំការ ព្រោះវាជួយធ្វើឱ្យដីធូរ មានជីវជាតិល្អ និងមិនប៉ះពាល់ដល់សុខភាពអ្នកប្រើ ព្រមទាំងអ្នកបរិភោគថែមទៀតផង ។ ដោយឡែកសំរាប់ជីគីមីវិញ ទោះបីវាមានគុណប្រយោជន៍ចំពោះមុខដែលធ្វើឱ្យដំណាំ ស្រែចំការ របស់ប្រជាកសិករលូតលាស់ និងផ្តល់ផ្លែផ្កាល្អបានភ្លាមៗក៏ពិតមែន ប៉ុន្តែជាមួយគ្នានោះវាក៏បាននាំមកជាមួយនូវផលប៉ះពាល់ជាច្រើនផងដែរ ដូចជាការធ្វើឱ្យដីកាន់តែរឹងហិលខ្សោះជីជាតិងាប់អស់ត្រី ក្តាម ខ្យង ជាមច្ឆជាតិបង្កើតមេរោគកាន់តែច្រើន ជាពិសេសគឺប៉ះពាល់ដល់សុខភាព ទាំងអ្នកប្រើនិងអ្នកបរិភោគថែមទៀតផង ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
