ភរិយាអ្នកគ្រប់គ្រងទូទៅ ផលិតកម្មថោន លោក អ៊ា វឌ្ឍនា ប្រកាសថាស្វាមីមិនទាន់ស្លាប់ ដូចគេផ្អើលនោះទេ

បារាំង៖ ក្រោយពីមហាជននាំគ្នាភ្ញាក់ផ្អើល ដែលថាអ្នកគ្រប់គ្រងទូទៅ នៅក្នុងផលិតកម្មថោន លោក អ៊ា វឌ្ឍនា  បានស្លាប់នោះ គឺកាលពីមួយម៉ោងមុននេះ ភរិយារបស់លោក បញ្ជាក់ថា លោក អ៊ា វឌ្ឍនា  មិនទាន់ស្លាប់ទេ។

ក្នុងនោះ អ្នកស្រី បានសរសេរសារដ៏ខ្លីមួយថា "អរគុណចំពោះទឹកចិត្តអ្នកទាំងអស់គ្នា នាងខ្ញុំជាភរិយារបស់លោក សូមបញ្ជាក់ថា គាត់មិនទាន់ចាកចេញពីពួកយើងទេ អរគុណ"។

ចំពោះសារដ៏ខ្លីមួយនេះ អ្នកស្រី មិនបានប្រើពាក្យ បែបខឹងច្រឡោត ទៅលើព័ត៌មានដែលថា ស្វាមីអ្នកស្រី បានស្លាប់នោះទេ គឺអ្នកស្រី គ្រាន់តែធ្វើការបញ្ជាក់ទៅកាន់មហាជន ឲ្យបានច្បាស់ប៉ុណ្ណោះ ថាលោកអ៊ា វឌ្ឍនា  នៅមានជីវិតនៅឡើយ។

យ៉ាងណាមិញ បើក្រឡេកមើល ផេកហ្វេសប៊ុកផ្លូវការ របស់ផលិតកម្មថោន ក៏បានធ្វើការលុបចោល នូវរូបថត និងសារដែលថា លោកអ៊ា វឌ្ឍនា  បានស្លាប់ផងដែរ៕ 

កំណត់ហេតុខ្មែរឡូត៖

ទាក់ទងនឹងអ្នកគ្រប់គ្រងទូទៅនៅក្នុងផលិតកម្មថោន អ៊ា វឌ្ឍនានេះដែរ កាលពីព្រឹកមិញត្រូវ ផេកហ្វេសប៊ុក របស់ផលិតកម្មថោន បង្ហោះថារូបលោក បានស្លាប់។

លោក អ៊ា វឌ្ឍនា អ្នកគ្រប់គ្រងទូទៅនៅក្នុងផលិតកម្មថោន បានស្លាប់បាត់បង់ជីវិតហើយ ដោយសារជម្ងឺ។

លោក អ៊ា វឌ្ឍនា បានលាចាកលោកទៅ នៅក្នុងមន្ទីរពេទ្យនៅឯប្រទេសបារាំង ក្រោយពេលដែលបញ្ជូនទៅធ្វើការព្យាបាលជម្ងឺ បានរយៈពេលតែប៉ុន្មានថ្ងៃប៉ុណ្ណោះ។

នេះតាមការឱ្យដឹងពីផេកហ្វេសប៊ុក របស់ផលិតកម្មថោនផ្ទាល់បានឱ្យដឹងយ៉ាងដូច្នេះថា៖ «ថ្ងៃនេះជាថ្ងៃដ៏ក្រៀមក្រំ របស់បុគ្គលិកគ្រប់ជាន់ថ្នាក់របស់ក្រុមហ៊ុនថោន ដោយលោក អ៊ា វឌ្ឍនា ជាអ្នកគ្រប់គ្រងទូទៅរបស់ផលិតកម្មថោន បានទទួលមរណភាព ដោយជម្ងឺនៅប្រទេសបារំាង ក្រោយពេលបញ្ចូនទៅព្យាបាលបានប៉ុន្មានថ្ងៃ សូមវិញ្ញាណក្ខន្ធបងបានទៅដល់ឋានសុគតិភព»។

ក្រោយដំណឹងនេះបានផ្សព្វផ្សាយចេញទៅ ក៏មានការចូលរួមរំលែកមរណទុក្ខយ៉ាងច្រើនពីសំណាក់អ្នកលេងបណ្តាញសង្គមនៅក្នុងស្រុក និងសូមជូនពរទៅដល់វិញ្ញាណក្ខន្ធលោក អ៊ា វឌ្ឍនា ឱ្យបានទៅកាន់សុគតិភព កុំឱ្យអាយុខ្លីដូចជាតិនេះទៀត។

ពេលនេះក្រុមគ្រួសារសាច់ញាតិទាំងអស់កំពុងរៀបចុះចាត់ចែងធ្វើបុណ្យសពជូនលោក អ៊ា វឌ្ឍនា ទៅតាមប្រពៃណីនៅឯប្រទេសបារាំង៕

• ជីវិត