ខេត្តរតនគិរី ៖ មានករណីគ្រោះថ្នាក់ចរាចរណ៍មួយ កើតឡើងដោយសារតែអ្នកបើករថយន្តមិនប្រយ័ត្ន ដល់ចំណុចផ្លូវកោង បួងចង្កូតជ្រុលហោះធ្លាក់ ជ្រោះរបួសធ្ងន់-ស្រាល៥នាក់។
ហេតុការណ៍នេះ កើតឡើងនៅ វេលាម៉ោង១០ និង០០នាទីព្រឹក ថ្ងៃទី១៧ ខែមករានេះ ត្រង់ចំណុចចុះចំណោតភ្នំកូនមុំ (ផ្លូវកែង)ស្ថិតក្នុងភូមិ៤ ឃុំត្រពាំងក្រហម ស្រុកកូនមុំ ខេត្តរតនគិរី។ ភ្លាមៗនោះដែរនគរបាលមូលដ្ឋាន ចុះកន្លែងកើតហេតុជួយអន្តរាគមន៍ដឹកជនរងគ្រោះ ទៅសង្គ្រោះនៅមន្ទីរពេទ្យ បង្អែកខេត្តរតនគិរី។
បើតាមអ្នកដំណើរម្នាក់ ប្រាប់ឲ្យដឹងថាពួកគាត់ បានឃើញរថយន្តមួយគ្រឿងធ្វើដំណើរលើផ្លូវជាតិលេខ៧៨ មានទិសដៅពីកើតទៅលិច ពោលគឺចេញពីទីរួមក្រុងបានលុងក្នុងល្បឿនលឿន ខណៈមកដល់ចំណុចកើតហេតុ ខាងលើស្ថានភាពផ្លូវកោងហើយចុះចំណោតភ្នំបានជែង ជាមួយរថយន្តសាំយ៉ុង មួយគ្រឿងផ្សេងទៀត ស្រាប់តែមានរថយន្តធុនធំបើកបញ្ច្រាសទិសគ្នា ក៏ស្រឡាំងកាំងបួងចង្កូតជ្រុល ហោះធ្លាក់ជ្រោះតែម្តង។
នគរបាលមូលដ្ឋាន ប្រាប់ឲ្យដឹងថារថយន្ត គ្រោះថ្នាក់ចរាចរណ៍នេះម៉ាក មីតស៊ុយប៊ីស៊ី ព៌ណទឹកប្រាក់ ពាក់ស្លាកលេខ ភ្នំពេញ 2AB-3410 អ្នកបើកឈ្មោះ ពិសុទ្ធ ភេទប្រុស អាយុ៣៥ឆ្នាំ ជនជាតិខ្មែរ(របួសស្រាល),ទី២-ឈ្មោះ ហូ ប៉ោឈុនភេទប្រុស អាយុ៥០ឆ្នាំ ជនជាតិចិន(របួសធ្ងន់) ទី៣-ឈ្មោះ វ៉ា អ៊ី ភេទប្រុស អាយុ២៩ឆ្នាំ ជនជាតិចិន(របួសស្រាល) ទី៤-ឈ្មោះ ចាង ខៃអ៊ីង ភេទប្រុស អាយុ៤៩ឆ្នាំ(របួសធ្ងន់) និងទី៥-ឈ្មោះ កាវ ធីលាងភេទប្រុស អាយុ៥០ឆ្នាំ ជនជាតិចិន(របួសធ្ងន់) អ្នកទាំង៥នាក់ នេះមានទីលំនៅក្រុងភ្នំពេញ មានមុខរបរជាអ្នកវិនិយោគគិន។
បច្ចុប្បន្នរថយន្ត គ្រោះថ្នាក់ចរាចរណ៍ខាងលើ ត្រូវបាននគរបាលនាំយកទៅរក្សាទុកនៅអធិការដ្ឋានស្រុកកូនមុំ៕
ប្រភព៖ កោះសន្តិភាព
ដោយឡែកក្រឡេកទៅមើល ព័ត៌មានចាប់អារម្មណ៍មួយផ្សេងទៀត៖
កញ្ញា ឌុច លីដា តាំងពីចេះថតកុន មិនដែលជួប ផលិតកម្មប្តូរតួរអង្គ!
ភ្នំពេញ៖ តារាសម្តែងស្រអែមស្រស់ កញ្ញា ឌុច លីដា សម្តែងអារម្មណ៍មិនល្អថា តាំងពីចេះថតកុន តាមផលិតកម្មជាច្រើនមក មានតែផលិតកម្ម បដិហាភាពយន្ត ដែលមានបញ្ហាជាមួយនឹងគ្នា ក្នុងពេលថត ហើយក៏បានប្តូរតួរសម្តែងថ្មី ។ សម្រាប់កញ្ញាមិនបានបារម្ភ ចំពោះការប៉ះពាល់ទីផ្សារ សម្រាប់អាជីពសម្តែងនោះទេ ព្រោះអ្នកដែលធ្លាប់ធ្វើការជាមួយគាត់នឹង យល់ច្បាស់ថាចរិតធ្វើការ ឬរបៀបធ្វើការបែបណា។
ចំពោះរឿងរ៉ាវ ដែលមិនធ្លាប់ជួបពីមុនមក កញ្ញា ឌុច លីដា បកស្រាយថា "ត្រង់ចំណុចរឿងរ៉ាវនេះ នាងខ្ញុំសុំជម្រះឲ្យអស់ចម្ងល់ ហើយនេះជាលើកទី១ហើយ ដែលនាងខ្ញុំ ប៉ះរឿងរ៉ាវជម្លោះ ខ្លះៗជាមួយផលិតកម្ម ។ តាំងពីនាងខ្ញុំចេះថតកុន តាមផលិតកម្មមក មានតែផលិតកម្ម មួយនេះទេ ដែលនាងខ្ញុំ មានបញ្ហាជាមួយ ។ ការកើតរឿងនេះឡើង ទី១មកពីផលិតករ ឬផលិតកម្ម និយាយអត់ច្បាស់ ពេលចុះកុងត្រា និយាយផ្សេង ពេលថតនិយាយផ្សឹង នេះជាបញ្ហាទី១" ។
តារាសម្តែងស្រអែម ស្រស់រូបនេះបន្តថា "បញ្ហាមួយទៀត នៅពេលនាងខ្ញុំព្រមព្រៀង ថតជាមួយគាត់ នាងខ្ញុំស្រាប់តែមានជំងឺ ហើយនាងខ្ញុំ ពិតជាឈឺមែន ហើយត្រង់ចំណុចនេះ ឲ្យនាងខ្ញុំបកស្រាយ បែបណាបើមនុស្សឈឺពិត និងឲ្យនាងខ្ញុំព្យាយាម ទៅថតរបៀបណា។ ប៉ុន្តែចំណុចសំខាន់ គាត់មិនបានមើលកំហុស ខ្លួនគាត់នោះទេ និយាយមិនច្បាស់លាស់ ជាមួយជំនួយការរបស់គាត់ ។ នៅពេលដែលខាងគាត់ សម្រេចផ្លាស់ប្តូរតួនាងខ្ញុំ ពាក់កណ្តាលទី ហើយដាក់អ្នកផ្សេង និយាយរួមគឺនេះ ជាលើកទី១បំផុត ដែលនាងខ្ញុំបានជួប មនុស្សដែលនិយាយការងារ ក្រឡិចក្រឡុចបែបនេះ និងជាលើកទី១ ដែលនាងខ្ញុំឈឺចំពេលសម្តែងរឿង នោះពិតជាចៃដន្យមែន" ។
សម្រាប់នាងខ្ញុំ មិនបារម្ភចំពោះការប៉ះពាល់ ទីផ្សារសម្រាប់អាជីព សម្តែងនោះទេ ព្រោះអ្នកដែលធ្លាប់ធ្វើការ ជាមួយនាងខ្ញុំក៏ដូចជាមួយ បណ្តាផលិតកម្មជាច្រើនទៀត គាត់នឹងយល់ច្បាស់ ថាចរិតធ្វើការ ឬរបៀបធ្វើការ របស់នាងខ្ញុំបែបណា បើមិនដូចនេះនាងខ្ញុំ គ្មានការងារធ្វើលើវិស័យកុននេះ បានយូរនោះឡើយ ។ នាងខ្ញុំជាមនុស្ស ទទួលខុសត្រូវការងារដូចគេឯង មិនអាចឱ្យសម្តីគាត់ ឬក្រុមការងារគាត់ មួយក្រុមនិយាយអ្វីលើនាងខ្ញុំ បាននោះទេ ព្រោះអ្នកធ្លាប់ធ្វើការ ជាមួយនាងខ្ញុំគាត់ស្គាល់ចរិតលក្ខណៈ របស់នាងខ្ញុំរួចហើយ ។
សូមជម្រាបថា កញ្ញាឌុច លីដា តារាសម្តែងខ្មៅស្រអែម បានបង្កភាពភ្ញាក់ផ្អើលមួយ ដល់ទស្សនិកជនក្នុងឈុត ស្លៀកសំលៀកបំពាក់ស ថែមទាំងកោរសក់ទៀតផង បើតាមការប៉ាន់ស្មាន គឺជាឈុតថតរឿងតែប៉ុណ្ណោះ ។ កញ្ញា ឌុច លីដា អំឡុងឆ្នាំ២០១៦ ជាតារាស្រីមួយដួង ដែលទទួលបានការងារសម្តែង ឱ្យផលិតកម្មនានាច្រើន ។ សម្រាប់ឆ្នាំ២០១៧នេះ លីដា មានស្នាដៃភាពយន្តបីរឿង កំពុងត្រៀមចាក់បញ្ចាំង និងពីររឿងទៀតកំពុងសម្តែង៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]