(កំពត)៖ កម្លាំងអន្ដរាគមន៍ពិសេស សហការជាមួយកម្លាំងអធិការដ្ឋាននគរបាលស្រុកកំពង់ត្រាច ក្រោយការណែនាំ និងបញ្ជាផ្ទាល់ពី លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្ត បានចាប់ខ្លួនមន្ដ្រីនគរបាលខេត្តកំពតម្នាក់ ដែលធ្វើសកម្មភាពចែកចាយគ្រឿងញៀន, លោកស្នងការ ប្រកាសកាត់ឈ្មោះចេញពីក្របខ័ណ្ឌ ហើយនឹងចាត់វិធានការតាមផ្លូវច្បាប់។
ប្រតិបត្តិការឃាត់ខ្លួននេះ ត្រូវបានធ្វើឡើងនៅរសៀលថ្ងៃទី១៧ ខែមករា ឆ្នាំ២០១៧នេះ នៅចំណុចភូមិថ្កូវ ឃុំឫស្សីស្រុកខាងលិច ស្រុកកំពង់ត្រាច។
មន្ដ្រីនគរបាលមូលដ្ឋានបានឲ្យដឹងថា ជនសង្ស័យជាមន្ដ្រីនគរបាលដែលចាប់ខ្លួននេះ ឈ្មោះ ទូច សុមុទ្ទ អាយុ៤៥ឆ្នាំ ជាមន្ត្រី នៃស្នងការដ្ឋាននគរបាលខេត្តកំពត ប្រចាំការនៅច្រកតន់ហន់ ដោយក្នុងក្រោយពេលឃាត់ខ្លួន កម្លាំងជំនាញដកហូតបានថ្នាំញៀនមួយចំនួនធំ។
ជាមួយនឹងការចាប់ខ្លួនមន្ដ្រីនគរបាល ដែលចែកចាយគ្រឿងញៀននេះ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្ត បានប្រកាសកាត់ឈ្មោះជនសង្ស័យ ចេញពីក្របខ័ណ្ឌមន្ដ្រីនគរបាលជាតិ ហើយនឹងចាត់វិធានការតាមផ្លូវច្បាប់យ៉ាងដាច់ណាត់។
បច្ចុប្បន្នជនសង្ស័យ ត្រូវបានកម្លាំងនគរបាលជំនាញ កសាងសំណុំដើម្បីបញ្ជូនទៅតុលាការ ចាត់ការតាមនីតិវិធី៕
ប្រភព៖ Fresh News
ដោយឡែក រំលឹកព័ត៌មានចាស់លើកមុនផងដែរថា៖ រយៈពេលកន្លះខែ យុទ្ធនាការប្រយុទ្ធប្រឆាំងគ្រឿងញៀន ខុសច្បាប់ទូទាំងប្រទេស បង្ក្រាបបានចំនួន៥០៦ករណី ឃាត់ខ្លួន១៣០៧នាក់
យុទ្ធនាការប្រយុទ្ធប្រឆាំង គ្រឿងញៀនខុសច្បាប់ទូទាំងប្រទេស សម្រាប់រយៈពេលកន្លះខែ ចាប់ថ្ងៃទី១ ដល់១៥ ខែមករា ឆ្នាំ២០១៧ បានបង្ហាញថា កម្លាំងសមត្ថកិច្ចបានបង្ក្រាប៖
* បទល្មើសគ្រឿងញៀនចំនួន ៥០៦ករណី
* ឃាត់ខ្លួនជនសង្ស័យចំនួន១,៣០៧នាក់
សូមបញ្ជាក់ថា ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានដាក់ចេញផែនការ ស្តីពីយុទ្ធនាការប្រយុទ្ធប្រឆាំង គ្រឿងញៀនខុសច្បាប់លើកទី១ រយៈពេល៦ខែ (ចាប់ពីថ្ងៃទី០១ ខែមករា ដល់ថ្ងៃទី៣០ ខែមិថុនា ឆ្នាំ២០១៧) ដើម្បីប្រយុទ្ធប្រឆាំងគ្រឿងញៀននៅកម្ពុជា ឲ្យកាន់តែខ្លាំងក្លា និងទទួលបានលទ្ធផលល្អឡើងថែមទៀត។
យុទ្ធនាការប្រយុទ្ធប្រឆាំងគ្រឿងញៀននេះ ដឹកនាំដោយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ជាប្រធាន និងឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំង គ្រឿងញៀនជាអនុប្រធាន៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]