ខេត្តត្បូងឃ្មុំ ៖ ក្មេងស្ទាវ៧នាក់ ជិះម៉ូតូ៤គ្រឿង ដេញវាយគ្នាតាមផ្លូវត្រូវរថយន្តធុនធំ១គ្រឿងបុកបណ្ដាលស្លាប់ និងរបួសធ្ងន់-ស្រាលដេករដូករណែលពេញផ្លូវ ។ ហេតុការណ៍នេះកើងឡើង កាលពីវេលាម៉ោង១១ និង៣០នាទីយប់ ថ្ងៃទី១៦ ខែមករា ឆ្នាំ២០១៧ តាមបណ្ដោយផ្លូវជាតិលេខ៧ ចន្លោះបង្គោលគីឡូម៉ែត្រលេខ២១៣ឥ២១៤ ស្ថិតក្នុងភូមិដូងទី១ ឃុំត្រមូង ស្រុកមេមត់ ។
លោក ថាញ់ សុខវ៉ាត អធិការរងនគរបាលស្រុកមេមត់ ទទួលផែនសណ្តាប់ធ្នាប់ បានឲ្យដឹងថា មុនពេលកើតហេតុ ម៉ូតូរបស់ក្រុមយុវជន៤គ្រឿង ជិះប្រដេញវាយគ្នាតាមផ្លូវជាតិក្នុងទិសដៅពីកើតទៅលិច ខណៈជិះមកដល់ចំណុចកើតហេតុ ក៏ត្រូវរថយន្ត១គ្រឿងធុនធំមិនស្គាល់ម៉ាក១គ្រឿង បានបើកមកដល់ក៏បុកចំ ពីខាងក្រោយពេញទំហឹងគឺបុករះម៉ូតូទាំង៤គ្រឿង បណ្តាលឲ្យផ្លោងខ្ទាតចេញ ពីម៉ូតូស្លាប់ភ្លាមៗ២នាក់ និងរបួសធ្ងន់ស្រាល៥នាក់ រួចបន្ថែមល្បឿនបើកទៅមុខ រត់គេចខ្លួនបាត់តែម្តង ។
លោក ថាញ់ សុខវ៉ាត បន្តថា អ្នកជិះម៉ូតូម៉ាក MSX ពណ៌ខ្មៅមិនស្គាល់ឈ្មោះ និងអាស្រ័យដ្ឋាន ភេទប្រុស បានស្លាប់នៅនឹងកន្លែង ដោយឌុបមនុស្សម្នាក់មិនស្គាល់ឈ្មោះបានស្លាប់នៅមន្ទីរពេទ្យ បង្អែកស្រុកមេមត់, ម៉ូតូម៉ាកវ៉េវឆ្លាម ពណ៌ស្វាយ គ្មានស្លាកលេខ បើកបរដោយឈ្មោះ សេត ភេទប្រុស អាយុ១៩ឆ្នាំ នៅភូមិទី២ ឃុំត្រមូង ស្រុកមេមត់ បានស្លាប់ នៅនឹងកន្លែងកើតហេតុ, ម៉ូតូម៉ាក MSX គ្មានស្លាកលេខ បើកបរដោយឈ្មោះ វង់ សិលា ភេទប្រុស អាយុ២២ឆ្នាំ នៅភូមិចង្គុំកណ្តាល ឃុំទន្លូង ស្រុកមេមត់ បានរងរបួសធ្ងន់ ឌុបឈ្មោះ អឿន សុធា ភេទប្រុស អាយុ២៧ឆ្នាំ រស់នៅភូមិឃុំជាមួយគ្នារបួសស្រាល, ម៉ូតូម៉ាកហុងដាឌ្រីម សេ១២៥ ពណ៌ខ្មៅ បើកបរដោយឈ្មោះ ចាន់ អូន ភេទប្រុស អាយុ២៧ឆ្នាំ នៅភូមិអណ្តូងថ្មលើ ឃុំត្រមូង ស្រុកមេមត់ របួសធ្ងន់ ឌុបឈ្មោះ អ៊ន អន ភេទប្រុស អាយុ២៥ឆ្នាំ របួសស្រាល ។ អ្នករងគ្រោះទាំងអស់ត្រូវបានសាច់ញាតិ ដឹកតាមម៉ូតូយកមកសង្គ្រោះ នៅមន្ទីរពេទ្យបង្អែកខេត្តត្បូងឃ្មុំ ។
លោកអធិការ រងនគរបាលស្រុកមេមត់ បញ្ជាក់ថា មូលហេតុដែលបង្កឲ្យមានគ្រោថ្នាក់ខាងលើនេះ ដោយសារតែមានក្រុមក្មេងទំនើង ២ក្រុមបានជិះម៉ូតូដេញវាយគ្នាពេញតាមដងផ្លូវ ស្របពេលដែលរថយន្តធុន ធំមិនស្គាល់ម៉ាក បានប្រើប្រាស់ល្បឿនលឿនផងនោះ មកដល់បុកបណ្តាលឲ្យ ស្លាប់៣នាក់ និងរបួសធ្ងន់-ស្រាល៤នាក់ ម៉ូតូខូចខាតធ្ងន់ធ្ងរ៤គ្រឿង នាំមករក្សាទុកនៅអធិការដ្ឋាន នគរបាលស្រុកមេមត់ដើម្បីដោះស្រាយតាមច្បាប់ ៕
ប្រភព៖ កោះសន្តិភាព
ដោយឡែកទៅមើលព័ត៌មាន ចាប់អារម្មណ៍មួយផ្សេងទៀត៖
ស្ពានបណ្តែតទឹក បណ្តោះអាសន្ននៅប្រាសាទអង្គរវត្ត នឹងបង្ហាញរូបរាងនាពេលឆាប់ៗនេះហើយ!
(សៀមរាប)៖ ស្ពានបណ្តែតទឹកបណ្តោះអាសន្ន ធ្វើពីពោងជ័រ Polyethylene មានទីតាំងនៅក្នុងទឹកកសិន្ធុខាងត្បូង ស្ពានហាលប្រាសាទ អង្គរវត្ត នឹងដាក់ឲ្យដំណើរការ ប្រើប្រាស់មុនខែឧសភា ឆ្នាំ២០១៧នេះហើយ។
ស្ពាននេះសាងសង់ឡើង ដើម្បីបង្វែរចរាចរណ៍ និងរក្សាសុវត្ថិភាព ជូនភ្ញៀវទេសចរជាតិ-អន្តរជាតិ ពេលធ្វើដំណើរឆ្លងកាត់ទៅទស្សនា អង្គរវត្ត ខណៈស្ពានហាលអង្គរវត្ត ត្រូវបិទទាំងស្រុង ដើម្បីទុកលទ្ធភាពឲ្យក្រុមអ្នកជំនាញអាជ្ញាធរជាតិអប្សរា និងសាកលវិទ្យាល័យ សូហ្វីយ៉ា ធ្វើការជួសជុលក្នុងគោលបំណង អភិរក្សស្ពានបុរាណនេះឲ្យបានល្អប្រសើរ។
លោក ហេង គឹមឡេង ប្រធាននាយកដ្ឋានទ្រទ្រង់បច្ចេកទេស និងគម្រោងអន្តរវិស័យ នៃអាជ្ញាធរជាតិអប្សរា បានប្រាប់ថា លក្ខណៈ ពិសេសរបស់ស្ពានបណ្តែតទឹកបណ្តោះអាសន្ន គឺមានសុពលភាពប្រើការបានដល់ទៅ២០ឆ្នាំ មានកន្លែងឈរលេងចំនួន៦ សម្រាប់ភ្ញៀវ ទេសចរឈរ ស្រូបយកខ្យល់អាកាស និងថតរូបជាដើម។ ចំណែកផ្ទៃពោងជ័របណ្តែតទឹក សរុបគឺ១,៨៧៤ម៉ែត្រការេ (បណ្តោយ១៩៧ម៉ែត្រ គុណទទឹង១០ម៉ែត្រ) ដែលក្នុង១ម៉ែត្រការេ អាចទ្របន្ទុកបានចំនួន២៧២គីឡូក្រាម ហើយបើសន្មត់មនុស្សម្នាក់ មានទម្ងន់៨០គីឡូក្រាម ស្ពាននេះអាចទ្រមនុស្សសរុបចំនួន៦,៣៧១នាក់ ក្នុងពេលតែមួយ។ លោក ហេង គឹមឡេង បន្តទៀតថា ស្ពាននេះសិក្សាដោយអាជ្ញាធរ ជាតិអប្សរា ហើយទទួលខុសត្រូវសាងសង់ដោយក្រុមហ៊ុន កាំត្រង់ស៊ីប (KTS)។
លោក វង្ស ចាន់វិបុល ប្រធានការដ្ឋានសាងសង់ស្ពានបណ្តែតទឹក របស់ក្រុមហ៊ុន កាំត្រង់ស៊ីប បញ្ជាក់ថា សម្ភារៈនិងអ្នកជំនាញ បច្ចេកទេសក្នុងការធ្វើស្ពាន គឺយកពីប្រទេសកាណាដាទាំងអស់ ហើយលក្ខណៈពិសេសរបស់ពោងបណ្តែតទឹក គឺជាជ័រ ស្វិត ធន់ ហើយអាចទ្រទ្រង់នឹងអាកាសធាតុ បានយ៉ាងល្អបំផុត មិនមានប្រតិកម្មនឹងពន្លឺថ្ងៃ ភ្លៀង និងធ្វើឱ្យទឹកប្រែពណ៌ ឬបង្ករជាសារធាតុពុល ផ្សេងៗដល់ទឹកឡើយ។ លើសពីនោះទៅទៀត ពោងជ័រ Polyethylene មានលក្ខណៈគ្រើម ដែលមិនធ្វើឲ្យរអិល ហើយពោងនីមួយៗ មានខ្យល់នៅខាងក្នុង ពេលណាកម្តៅឡើងខ្លាំងធ្វើឲ្យឧស្ម័នក្នុងពោងសាយភាយមកក្រៅ ដែលអាចរក្សាទ្រង់ទ្រាយ និងសីតុណ្ហភាព ក្នុងពោងឲ្យនៅដដែល។
លោកបន្ថែមទៀតថា ក្នុងការតំឡើង និងតភ្ជាប់ពោងពីមួយទៅមួយដើម្បីធ្វើស្ពាន គឺអ្នកជំនាញនៃក្រុមហ៊ុនកាំត្រង់ស៊ីប និងអ្នកជំនាញ ផលិតស្ពាន មកពីប្រទេសកាណា បានយកចិត្តទុកដាក់យ៉ាងខ្លាំងបំផុតលើបច្ចេកទេស ដែលធានាបាននូវភាពមាំ សុវត្ថិភាពខ្ពស់ មិនអាចរបូតចេញពីគ្នាឡើយ។
សូមបញ្ជាក់ថា មកដល់ពេលនេះក្រុមការងារ បានតភ្ជាប់ពោងជ័របណ្តែតទឹក រួមនឹងដាក់បង្កាន់ដៃស្ពានរួចរាល់ហើយ នៅសល់តែការ ភ្ជាប់ជណ្តើរឈើមកស្ពានលើទឹកតែប៉ុណ្ណោះ ដែរក្រុមការងារទាំង២ កំពុងសិក្សាពីវិធីសាស្ត្របន្ថែមទៀត ក្នុងការទប់លំនឹងស្ពានកុំឲ្យ យោលយោគឬរេចុះឡើង ខណៈមានភ្ញៀវទេសចរឆ្លងកាត់ផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]