ខេត្តបាត់ដំបង ៖ សេចក្ដីរាយការណ៍ឱ្យដឹងបន្តទៀត ពាក់ព័ន្ធករណីឃាតកម្មលើស្ត្រីវ័យក្មេងម្នាក់ស្ថិតនៅស្រុកឯកភ្នំ ដែលគេសង្ស័យថា ជនដៃដល់គឺបុរសជាប្ដីរបស់នាងតែម្តង ប៉ុន្តែជននេះមិនបានសារភាពទេ បន្ទាប់ពីត្រូវឃាត់ខ្លួនភ្លាមៗនោះ ។
ទីបំផុត នៅព្រឹកថ្ងៃទី១៦ មករា នេះ ជនសង្ស័យបានឆ្លើយសារភាពប្រាប់សមត្ថកិច្ចហើយថា «ខ្លួនពិតជាបានរឹត.កសម្លាប់ប្រពន្ធមែន» ដោយសារនាងមានប្រុសថ្មី ដែលខ្លួនបានតាមទាន់នៅយប់កើតហេតុនោះ ។
ជនសង្ស័យខាងលើ ឈ្មោះជូន ពៅ អាយុ២២ឆ្នាំ ត្រូវបានសមត្ថកិច្ចឃាត់ខ្លួនបន្ទាប់ពីសង្ស័យជំហានដំបូងថា បានរឹត.កសម្លាប់ប្រពន្ធរបស់ខ្លួនកាលពីវេលារំលងអធ្រាត្រ ឈានចូលថ្ងៃទី១៥ មករា ស្ថិតនៅលើផ្ទះក្នុងភូមិព្រែកទាល់ ឃុំកោះជីវាំង ស្រុកឯកភ្នំ។ ប៉ុន្តែជននេះ មិនបានសារភាពទេ បើទោះជាសមត្ថកិច្ចរកឃើញវត្ថុតាងមួយចំនួន មានជាប់ពាក់ព័ន្ធនឹងខ្លួនក្ដី លុះបញ្ជូនមកដល់ស្នងការខេត្ត ពេលនេះឆ្លើយទទួលស្គាល់កំហុសហើយ ។
បើតាមលោកសេង លុច នាយរងការិយាល័យ ព្រហ្មទណ្ឌកំរិតធ្ងន់បានឱ្យដឹងថា ជនដៃដល់ឈ្មោះជូន ពៅ នេះ បានសារភាពថា ខ្លួនបានប្រើខ្សែនីឡុងរឹត.កសម្លាប់ប្រពន្ធ ដោយសារតែតាមទាន់ប្រពន្ធផ្ទាល់ភ្នែក លួចមានសហាយ ។ ជននេះនិយាយទៀតថា មុនពេលកើតហេតុ បន្តិចពេលខ្លួនដើរចូលក្នុងផ្ទះ ស្រាប់តែឃើញបុរសម្នាក់ដើរចេញពីបន្ទប់ប្រពន្ធខ្លួនទាំងយប់ លុះខ្លួនសួរនាំប្រពន្ធបែរជាឆ្លើយថា មិនដឹង ប៉ុន្តែប្រពន្ធខ្លួនបានព្រលយពាក្យថា «មកពីបងឯងដើរចោលខ្ញុំច្រើនខែពេកធ្វើអី?» ។
លោកសេង លុច បានស្រង់ចម្លើយជនដៃដល់ទៀតថា ដោយសារតែខឹងប្រពន្ធលួចទាក់ទងប្រុសថ្មី និងតាមទាន់ផ្ទាល់ភ្នែកបែបនេះហើយ ទើបនៅពេលប្រពន្ធដេកលក់ ខ្លួនយកខ្សែរនីឡុងរឹត.កសម្លាប់ប្រពន្ធតែម្ដងទៅ ។
ប៉ុន្តែលោកសេង លុច បានបញ្ជាក់ដែរថា បើតាមក្រុមគ្រួសារស្ត្រីរងគ្រោះបានប្រាប់ថា ប្ដី-ប្រពន្ធនេះបានឈ្លោះប្រកែកលេងលះគ្នា រហូត ខាងប្ដីដើរចេញពីផ្ទះ និងចោលប្រពន្ធច្រើនខែហើយ តែការលែងលះនេះ មិនបានឆ្លងកាត់ផ្លូវតុលាការទេ ។ លុះប្ដីត្រឡប់មកផ្ទះវិញ ក៏មានរឿងបែបនេះតែម្ដង ។
ពេលនេះ សមត្ថកិច្ចកំពុងរៀបចំ សំណុំរឿងបញ្ជូនជនសង្ស័យទៅកាន់តុលាការហើយ ។
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកព័ត៌ពាក់ព័ន្ធខាងលើនេះដែរថានៅទីបំផុត ! សមត្ថកិច្ចសម្រេចឃុំខ្លួនប្តីហើយ
ខេត្តបាត់ដំបង ៖ បុរសម្នាក់ដែលបានរាយការណ៍ ប្រាប់សមត្ថកិច្ចថា ប្រពន្ធវ័យក្មេងរបស់ខ្លួនបានស្លាប់ ខណៈកំពុងដេកជាមួយខ្លួន នៅក្នុងផ្ទះនោះ រហូតដល់ពេលនេះសមត្ថកិច្ចបានសម្រេចឃុំខ្លួន បណ្ដោះអាសន្នដើម្បីកសាងសំណុំរឿងបញ្ជូនទៅតុលាការដោយ ។
សូមបញ្ជាក់ថា នារីវ័យក្មេងម្នាក់បានដេកស្លាប់ ខណៈកំពុងដេកក្នុងផ្ទះជាមួយប្តី ហើយត្រូវបានប្តីដឹងថា ស្លាប់ពេលដាស់ប្រពន្ធ កាលពីវេលាម៉ោង២រំលងអាធ្រាត្រឈានចូលថ្ងៃទី១៥ ខែមករា ឆ្នាំ២០១៧ នៅភូមិព្រែកទាល់ ឃុំកោះជីវាំង ស្រុកឯកភ្នំ ប៉ុន្តែនៅលើសាកសព នារីវ័យក្មេងរងគ្រោះ សមត្ថកិច្ចពិនិត្យឃើញមានស្នាមជាំ ដូចស្នាមរឹត.កសម្លាប់ ដូច្នេះហើយទើបកម្លាំង នគរបាលស្រុកឯកភ្នំ សម្រេចហៅបុរសជាប្ដីទៅសួរនាំអំពីរឿងនេះ ពាក់ព័ន្ធនឹងស្នាមដូចរឹត.កសម្លាប់ ។
សមត្ថកិច្ចបានឲ្យដឹងថា ជនសង្ស័យជាប្តីឈ្មោះ ជូន ពៅ អាយុ២២ឆ្នាំ រីឯនារីវ័យក្មេងរងគ្រោះជាប្រពន្ធឈ្មោះសុខ គឹមជូ អាយុ១៨ឆ្នាំ រស់នៅក្នុងភូមិឃុំកើតហេតុខាងលើ ។
បន្ទាប់ពីហៅទៅធ្វើការសាកសួរ ជនសង្ស័យឈ្មោះ ជូន ពៅ មិនបានសារភាពថា ខ្លួនជាអ្នកសម្លាប់ប្រពន្ធនោះទេ បើទោះជានៅយប់កើតហេតុខ្លួនបានដេកនៅក្បែរប្រពន្ធក្ដី ជននេះបានឆ្លើយ ប្រាប់សមត្ថកិច្ចថា ពេលខ្លួនដាស់ប្រពន្ធពីដំណេក គឺនាងបានស្លាប់បាត់ទៅហើយ ហើយខ្លួនសង្ស័យថា នាងស្លាប់ដោយសារជំងឺគាំងបេះដូង ។
លោក សន លុច នាយរងការិយាល័យ ព្រហ្មទណ្ឌកម្រិតធ្ងន់ បានឲ្យដឹងថា ទោះបីជាជននេះបានព្យាយាម បដិសេធយ៉ាងណាក្តី ប៉ុន្តែវត្ថុតាងមួយចំនួនដែលសមត្ថកិច្ចរកឃើញ ហើយសង្ស័យថា ឈ្មោះ ជូន ពៅ គឺជាជនសង្ស័យសម្លាប់ប្រពន្ធរបស់ខ្លួន ។
លោក សន លុច បានបញ្ជាក់ថា មន្ត្រីជំនាញបានប្រទះឃើញ ខ្សែនីឡុងមួយខ្សែនៅកន្លែងកើតហេតុ ដែលស៊ីសង្វាក់គ្នា ទៅនឹងស្លាកស្នាមនៅលើ.កសាកសព ដូច្នេះគេសង្ស័យថាជាខ្សែដែលជននេះ ប្រើសម្រាប់រឹត.ក សម្លាប់ប្រពន្ធរបស់ខ្លួនតែម្ដង ។ ហើយជននេះក៏ធ្លាប់មាន ប្រវត្តិជាប់គុកម្ដងហើយពីបទ «ប្លន់» ។
ទោះជាយ៉ាងណាលោកថា លោកស្នងការនគរបាល ខេត្តបានបញ្ជាឲ្យបញ្ជូនជនសង្ស័យរូបនេះទៅកាន់ស្នងការដ្ឋាននគរបាលខេត្ត ហើយដើម្បីឃុំខ្លួនបណ្ដោះអសន្ន និងសួរនាំបន្តមុនពេលឈាន ដល់ការកសាងសំណុំរឿង បញ្ជូនទៅតុលាការ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]