ថន លក្ខិណា ជួបនឹងតារាសម្តែងថៃ នាងខាត់ទ្រីយ៉ាដោយចៃដន្យ នៅព្រលានយន្តហោះអន្តរជាតិភ្នំពេញ!

ភ្នំពេញ៖ កាលពីព្រឹកមិញ កញ្ញា ថន លក្ខិណា តារាសម្តែងស្រី និងជាពិធីការិនីវ័យក្មេងរូបស្អាត ចៃដន្យក៏បានជួបតារាសម្តែង នាងខាត់ទ្រីយ៉ា (Katreeya) ដែលជាតារាសម្ដែង តារាម៉ូដែល និងជាតារាចម្រៀងរបស់ថៃ នៅព្រលានយន្តហោះអន្តរជាតិភ្នំពេញ។

ដោយ កញ្ញា ថន លក្ខិណា នៅថ្ងៃនេះផងដែរ នាងមានដំណើរចាកចេញពីមាតុភូមិ ដើម្បីទៅកម្សាន្តនៅប្រទេសថៃ ជាមួយនឹងក្រុមគ្រួសារ។ 

នៅក្នុងជំនួបដោយមិនបានត្រៀមទុកនេះ កញ្ញា ថន លក្ខិណា ពិធីការិនីសម្បូរវោហារស័ព្ទ ក៏បានប្រាប់ឱ្យដឹងនៅលើបណ្តាញសង្គមហ្វេសប៊ុករបស់នាងផ្ទាល់យ៉ាងដូច្នេះថា៖ « Good morning បានជួប idol ទៀតហើយ see you soon Thailand»។

គួរឱ្យដឹងដែរថា នាងខាត់ទ្រីយ៉ា គឺជាកូនកាត់ថៃ-អង់គ្លេសមួយរួប ដែលមានភាពល្បីល្បាញខាងផ្នែកសម្ដែង ដើរបង្ហាញម៉ូត និងច្រៀងចម្រៀង កាលពី១០ឆ្នាំមុន ហើយក៏មានអ្នកគាំទ្រជាច្រើននាក់ រួមទាំងអ្នកគាំទ្រនៅកម្ពុជាយើងទៀតផង។

គិតមកដល់បច្ចុប្បន្ននេះនាង ខាត់ទ្រីយ៉ា មានវ័យ៤០ឆ្នាំហើយ ប៉ុន្តែសម្រស់នាងក៏នៅតែស្រស់ស្អាតដែរ ហើយតារារូបនេះក៏តែងតែឧស្សាហ៍ឡើងចុះ ធ្វើដំណើរមកលេងប្រទេសកម្ពុជា ជាញឹកញាប់ ក៏ដូចជាច្រៀងឱ្យស្ថានីយទូរទស្សន៍ PNN ផងដែរ៕

• ថន លក្ខិណា
• ទីកន្លែង
• មិត្ត