សមត្ថកិច្ច សាកសួរអ្នកលក់បាយ២នាក់ ពាក់ព័ន្ធនឹងករណី សិស្ស និងពលរដ្ឋ ជិត២០០នាក់ ពុលអាហារ នៅស្រុកក្រវាញ

(ពោធិ៍សាត់)៖ រយៈពេល២ថ្ងៃមកនេះ សមត្ថកិច្ចខេត្តពោធិ៍សាត់ បានចុះស្រាវជ្រាវជាបន្តបន្ទាប់ ពាក់ព័ន្ធនឹងករណីពុលអាហារ នៅឃុំសំរោង ស្រុកក្រវាញ ខេត្តពោធិ៍សាត់ ដែលបណ្តាលឱ្យប្រជាពលរដ្ឋ និងសិស្សានុសិស្ស ១៩៧នាក់ ដែលចូលរួមសន្និបាតនៅឃុំសំរោង រងការក្អួតចង្អោរ ចុកពោះ និងរាគរូស រហូតដល់បញ្ជូនទៅមន្ទីរពេទ្យ។

ជុំវិញករណីនេះ សមត្ថកិច្ចចម្រុះ ដោយមានចូលរួមពីអភិបាលរងខេត្តពោធិ៍សាត់ម្នាក់ផង បានចុះសាកសួរស្រ្តី២នាក់ ដែលជាអ្នកលក់បាយសាច់ជ្រូក ផ្គត់ផ្គង់ឱ្យសន្និបាតខាងលើនេះ។ អ្នកលក់បាយទាំង២រូបនោះ នៅស្រុកសំរោង ក្នុងនោះមានឈ្មោះ អៀម មុំ ដែលបានផ្គត់ផ្គង់បាយសាច់ជ្រូក៤០០ប្រអប់ដល់សន្និបាតខាងលើ និងម្នាក់ទៀត ឈ្មោះ ជា អៀមនី ភេទស្រី ជាអ្នកផ្គត់ផ្គង់បាយប្រអប់៤០០ប្រអប់ដូចគ្នាដល់អង្គសន្និបាតដែរ។ នេះបើតាមកំណត់ហេតុរបស់សមត្ថកិច្ច ផ្ញើជូនទៅលោកអភិបាលខេត្ត កាលពីម្សិលមិញ។

បន្ទាប់ពីស្រាវជ្រាវ និងសួរព័ត៌មានពីអ្នកលក់បាយទាំង២នាក់ខាងលើហើយ សមត្ថកិច្ច បានដកហូតវត្ថុតាងមួយចំនួន សម្រាប់ការប្រើប្រាស់ក្នុងការធ្វើបាយប្រអប់នោះ យកទៅពិនិត្យបន្ត ដើម្បីរកប្រភពឱ្យកាន់តែច្បាស់ ពាក់ព័ន្ធនឹងករណីពុលទ្រង់ទ្រាយធំនេះ។

សូមបញ្ជាក់ថា កាលពីថ្ងៃទី១៣ ខែមករា ឆ្នាំ២០១៦ កន្លងទៅ មានករណីប្រជាពលរដ្ឋ និងសិស្សានុសិស្សប្រមាណ១៩៧នាក់ ស្ថិតនៅក្នុងសាលាបឋមសិក្សាបទរំដួល ឃុំផ្ទះរុង ស្រុកភ្នំក្រវាញ ខេត្តពោធិ៍សាត់ បានក្អួតចង្អោរ វិលមុខ ចុកពោះ ជាបន្តបន្ទាប់ ក្រោយពេលទទួលទានបាយកញ្ចប់ ដែលអង្គសន្និបាតឃុំសំរោង បានរៀបចំដល់ពួកគេ។ ករណីនេះ ទាំងប្រជាពលរដ្ឋ និងសមត្ថកិច្ច មានការសង្ស័យថាបណ្តាលមកពីពុលបាយប្រអប់តែម្តង។ ប៉ុន្តែទោះជាយ៉ាងណាករណីនេះ មិនបានបណ្តាលឱ្យមានពលរដ្ឋ ឬសិស្សានុសិស្សណាម្នាក់ស្លាប់បាត់បង់ជីវិតនោះទេ៕

ប្រភព៖ Fresh News

គួររំលឹកព័ត៌មាននឹងករណីនេះផងដែរថា៖ ប្រជាពលរដ្ឋ និងសិស្សានុសិស្សជិត៣០០នាក់ សង្ស័យពុលបាយដែលមន្ត្រីចែកឲ្យនៅស្រុកភ្នំក្រវាញ ខេត្តពោធិ៍សាត់

សេចក្តីរាយការណ៍ពីខេត្តពោធិ៍សាត់ បានឲ្យដឹងនៅមុននេះបន្តិចថា មានករណីប្រជាពលរដ្ឋ និងសិស្សានុសិស្សប្រមាណជិត៣០០នាក់ ស្ថិតនៅក្នុងសាលាបឋមសិក្សាបទរំដួល ឃុំផ្ទះរុង ស្រុកភ្នំក្រវាញ ខេត្តពោធិ៍សាត់ សង្ស័យថាបានពុលបាយ នេះបើយោងតាមប្រធានមន្ទីរអប់រំ ខេត្តពោធិ៍សាត់ ថ្លែងប្រាប់អង្គភាព Fresh News នៅយប់ថ្ងៃទី១៣ ខែមករា កន្លងទៅនេះ។

ករណីពុលនេះ ត្រូវបានលោកអភិបាលខេត្ត ម៉ៅ ធនិន ចុះជួយអន្តរាគមន៍ សង្គ្រោះភ្លាមៗផងដែរ ដោយមានប្រជាពលរដ្ឋប្រមាន៧០នាក់ ហើយបានដឹកបញ្ជូនមកមន្ទីរពេទ្យបង្អែកខេត្តពោធិ៍សាត់។

យោងតាមព័ត៌បឋមបានឲ្យថា ករណីសង្ស័យពុលបាយនេះ ដោយតែបងប្អូនប្រជាពលរដ្ឋ និងសិស្សានុសិស្សខាងលើ បានទទួលទាននូវបាយដែលក្រុមការងារ សន្និបាតរបស់ឃុំសំរោង យកទៅចែកជូនដល់ក្មេងៗសិស្សសាលាបឋមសិក្សាបទរំដួល ហើយបាយនៅក៏ត្រូវចែកបន្តដល់ ប្រជាពលរដ្ឋនៅជិតៗនោះផងដែរ៕