ខេត្តពោធិ៍សាត់ ៖ ក្នុងពិធីមង្គលការមួយ ខណៈកំពុងនាំគ្នារាំលេងយ៉ាងសប្បាយរីករាកឡើងហុយដីទ្រលោម ស្រាប់តែយុវជន២ក្រុមបានរាំជាន់ជើងគ្នា ក៏កើតជម្លោះកាប់ចាក់គ្នាយ៉ាងសាហាវ បង្កឲ្យមានការភ្ញាក់ផ្អើលពេញរោងការកាលពីវេលាម៉ោង២ និង១៥នាទីរសៀល ថ្ងៃទី០៦ ខែមករា ឆ្នាំ២០១៧ នៅចំណុចអំពួច ស្ថិតក្នុងភូមិជ្រៃក្រឹម ឃុំផ្ទះរុង ស្រុកភ្នំក្រវាញ ខេត្តពោធិ៍សាត់ ។
សមត្ថកិច្ចបានឲ្យដឹងថា ជនរងគ្រោះដែលស្លាប់ឈ្មោះ ដៀប ឌឿន ភេទប្រុស អាយុ៣៣ឆ្នាំ រស់នៅភូមិព្រះចំបក់ ឃុំត្រពាំងជង ស្រុកបាកាន ត្រូវបានគូបក្ខដិបក្ខចាក់ត្រូវ១កាំបិតចំដើមដោះខាងឆ្វេង បណ្ដាលឲ្យស្លាប់នៅនឹងកន្លែងកើតហេតុ ។ ចំណែកជនដៃដល់ដែលត្រូវឃាត់ខ្លួនឈ្មោះ ក្រេង កុសល ភេទប្រុស អាយុ២៥ឆ្នាំ រស់នៅភូមិឃុំកើតហេតុខាងលើ របួសក្ដោងច្រមុះ ។
ទាក់ទិននឹងករណីនេះសមត្ថកិច្ចឲ្យដឹងថា នៅថ្ងៃកើតហេតុ នៅផ្ទះប្រជាពលរដ្ឋឈ្មោះ នាង វុធ អាយុ៤៥ឆ្នាំ ជាស្ត្រីម៉េម៉ាយបានរៀបអាពាហ៍ពិពាហ៍កូនដោយមានជប់លៀង និងដាក់ធុងបាស់រាំយ៉ាងគគ្រឹកគគ្រេង ។ ពេលដែលផឹកស្រាស្រវឹងសប្បាយហួសប្រមាណនោះ ជនរងគ្រោះ និងជនដៃដល់បានឡើងរាំជាមួយភ្ញៀវជាច្រើនទៀតហុយដីទ្រលោម ។ មួយសន្ទុះក្រោយមកស្រាប់តែមានការរាំជាន់ជើងគ្នា២-៣ដង រហូតទំនាស់ពាក្យសំដី និងដេញកាប់ចាក់គ្នាផ្អើលពេញរោងការតែម្តង ។ ភាគីទាំងសងខាងបានធ្វើសកម្មភាពកាប់ចាក់គ្នាទៅវិញទៅមករបួសរៀងខ្លួន ប៉ុន្តែភាគីម្ខាងចាក់នឹងកាំបិតមុតជ្រៅក៏បណ្ដាលឲ្យស្លាប់តែម្ដង ។
សមត្ថកិច្ចបញ្ជាក់ថា បក្ខពួកជនដៃដល់៣នាក់ទៀតដែលរត់គេចខ្លួន សមត្ថកិច្ចកំណត់មុខសញ្ញាបានអស់ហើយ កំពុងតាមចាប់ខ្លួន ដើម្បីយកមកផ្ដន្ទាទោសតាមច្បាប់ ។ ចំណែកជនសង្ស័យកំពុងសម្រាកព្យាបាលនៅមន្ទីរពេទ្យ ដោយមានសមត្ថកិច្ចយាមជាប់រហូត រីឯសាកសពជនរងគ្រោះត្រូវបានក្រុមគ្រួសារយកទៅធ្វើបុណ្យតាមប្រពៃណីនៅគេហដ្ឋាននៃសព ៕
ប្រភព៖ កោះសន្តិភាព
ដោយឡែកព័ត៌មានគួរឲ្យចាប់អារម្មណ៍មួយផ្សេងទៀត៖ ពិតជាកតញ្ញូណាស់! ព្រោះតែចង់ឲ្យម្តាយ បានចូលរួមកម្មវិធីមង្គលការ កូនស្រីសុខចិត្តរៀបការនៅមន្ទីរពេទ្យ
អាមេរិក៖ នារីគ្រប់រូបតែងតែស្រមៃដល់ថ្ងៃរៀបការដ៏អស្ចារ្យរបស់ខ្លួន ហើយវត្តមានរបស់អ្នកម្តាយនៅក្នុងថ្ងៃរៀបការ ក៏ជារឿងដ៏ពិសេសមួយដែរ។
អ្នកស្រី Cheryl Owens អាយុ ៥៥ឆ្នាំ ត្រូវបានគេរកឃើញថា គាត់បានកើតជម្ងឺមហារីកតម្រងនោមកាលពីខែតុលាកន្លងទៅនេះ។ ប៉ុន្តែគាត់មើលទៅដូចជានៅរឹងមាំដែរ ជាពិសេសនៅរយៈពេល១ខែចុងក្រោយ មុនពេលដែលកូនស្រីរបស់គាត់ដែលមានឈ្មោះថា Kristin Ownes ត្រូវរៀបការ។ ដូច្នេះ ក្រុមគ្រួសារទាំងមូលជឿជាក់ថា គាត់នឹងអាចចូលរួមក្នុងកម្មវិធីមង្គលការរបស់កូនស្រីរបស់គាត់បាន។
រឿងហេតុតែងតែប្រែប្រួលស្មានមិនត្រូវ ដោយស្ថានភាពរបស់អ្នកស្រី Cheryl បានធ្លាក់ចុះដុនដាបកាលពីថ្ងៃអាទិត្យមុននេះ។
ខណៈពេលដែលអ្នកស្រីត្រូវបានបញ្ជូនទៅកាន់មន្ទីរពេទ្យ គ្រូពេទ្យបានរកឃើញថា ជម្ងឺមហារីករបស់អ្នកស្រីកំពុងតែវិវឌ្ឍ ហើយត្រូវធ្វើការព្យាបាលឲ្យបានឆាប់បំផុត និងមិនអាចពន្យាពេលបានយូរទេ។
កូនក្រមុំ Kristin បានប្រាប់ទៅកាន់គ្រូពេទ្យថា “កម្មវិធីរៀបការរបស់នាងខ្ញុំនៅសល់តែប្រហែល១ខែទៀតប៉ុណ្ណោះ។ តើយើងអាចរៀបចំកម្មវិធីរៀបការនៅទីនេះបានទេ?” ។ បន្ទាប់មកគ្រូពេទ្យក៏បានតបមកវិញថា “ពិតណាស់! ពួកយើងមានទទួលរៀបចំកម្មវិធីអ៉ីចឹងដែរ” ។
ពិតជាពិសេសណាស់! បុគ្គលិកប្រចាំនៅក្នុងមន្ទីរពេទ្យបានរៀបចំកម្មវិធីមួយនេះដោយចំណាយពេលត្រឹមតែ ៦ម៉ោងប៉ុណ្ណោះ ដោយពួកគេបានទទួលខុសត្រូវរៀបចំចាត់ចែងកម្មវិធីនេះទាំងមូលតែម្តង ព្រមទាំងមានការចូលរួមពីសាច់ញាតិប្រមាណ៤០នាក់ និងមិត្តភក្តិជាច្រើនទៀតផងដែរ។
បន្ទាប់ពីនោះរួចមកខាងមន្ទីពេទ្យផ្ទាល់ ក៏បានបង្ហោះពាក្យដ៏រំភើបមួយចំនូនទៅលើគណនីសង្គម Facebook របស់ពួកគេផងដែរដោយបានសរសេរថា “នារាត្រីនេះ ពួកយើងពិតជាមានអារម្មណ៍ថារំភើប និងមានមោទនភាពខ្លាំងណាស់ ដែលក្រុមសង្គ្រោះបន្ទាន់ IU Health West Hospital បានរៀបចំកម្មវិធីដ៏អស្ចារ្យមួយនេះ” ។
ចំនែកឯកូនក្រមុំ Kristin វិញ បាននិយាយថា “ ម្តាយរបស់ខ្ញុំរំភើបចិត្តណាស់... វាប្រៀបដូចជាឱសថម្យ៉ាងដែលជួយព្យាបាលគាត់យ៉ាងអ៉ីចឹង។ នៅពេលដែលខ្ញុំបានឃើញចំនួនអ្នកចែករំលែករូបភាពនៅក្នុង Facebook ច្រើនបែបនេះ ខ្ញុំអាចដឹងបានថា គ្រប់គ្នាកំពុងតែគិតថា ម្តាយរបស់ខ្ញុំពិតជាអស្ចារ្យណាស់។ បុគ្គលិកនៅមន្ទីពេទ្យវិញ ក៏អស្ចារ្យដែរ។ ពួកគេបានរៀបចំកម្មវិធីមួយនេះបានយ៉ាងពិសេសបំផុត សម្រាប់ម្តាយរបស់ខ្ញុំ។ ខ្ញុំចង់និយាយថា វាពិតជាអស្ចារ្យណាស់” ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
