រាជធានីភ្នំពេញ ៖ ជនសង្ស័យ៣នាក់ជិះម៉ូតូ១គ្រឿងបានធ្វើសកម្មភាពឆ្កឹះសោទ្វាររថយន្ត និងវាយកញ្ចក់យកកាបូបពីក្នុងរថយន្តរួចជិះគេចខ្លួនបាត់ស្រមោល បង្កឲ្យមានការភ្ញាក់ផ្អើលកាលពីវេលាម៉ោង៣ និង១៥នាទីទៀបភ្លឺថ្ងៃទី៨ ខែមករា ឆ្នាំ២០១៧ នៅចំណុចមុខផ្ទះយីហោ ដីហ្វូនខាផេត លក់កំរាលព្រំគ្រប់ប្រភេទ ផ្លូលេខ២៧១ សង្កាត់ទឹកល្អក់ទី៣ ខណ្ឌទួលគោក ។
រថយន្តដែលក្រុមជនសង្ស័យឆ្កឹះសោ និងវាយកញ្ចក់យកកាបូបនោះម៉ាកហាយលែនឌ័រ ពណ៌ស ពាក់ស្លាកលេខភ្នំពេញ 2V-3960 ជនរងគ្រោះជាម្ចាស់រថយន្តឈ្មោះ ពៅ សម្បត្តិ ភេទប្រុស អាយុ២៦ឆ្នាំ មុខរបរបើកបររថយន្ត មានទីលំនៅភូមិលូ សង្កាត់ស្វាយប៉ាក ខណ្ឌឯស្សីកែវ ចំណែកសម្ភារៈដែលបាត់បង់នៅក្នុងកាបូបនោះមាន អាយផេត(Ipad)១គ្រឿង ទូរស័ព្ទអាយហ្វូនស៊ិចផ្លើស(Iphone 6 plus) ១គ្រឿង កាតបើកបរ១សន្លឹក អត្តសញ្ញាណប័ណ្ណ១សន្លឹក និងឯកសារមួយចំនួនទៀត ។ រីឯមិត្តភក្តិប្រុសស្រី៣នាក់ទៀតមិនត្រូវបានស្គាល់ឈ្មោះទេ ជិះរថយន្ត១គ្រឿងម៉ាកកាមរីបាឡែន ពណ៌ស ពាក់ស្លាកលេខ 2AK-7811 ។ ចំណែកជនសង្ស័យមានគ្នា៣នាក់ ជិះម៉ូតូ១គ្រឿង ម៉ាកស៊ុយសាគីស្មាស់ មិនចាំពណ៌ មិនចាំស្លាកលេខ ។
ប្រភពព័ត៌មានពីជនរងគ្រោះបានឱ្យដឹងថា មុនពេលកើតហេតុ រូបគេ និងមិត្តភក្តិមានគ្នា៤នាក់ ជិះរថយន្ត២គ្រឿង មកឈប់ចតនៅមុខផ្ទះកើតហេតុ ហើយបាននាំគ្នាទៅអង្គុយផឹកស៊ីនៅតាមចិញ្ចើមផ្លូវចម្ងាយពីកន្លែងចតរថយន្តប្រមាណជា១០ម៉ែត្រដោយទុកកាបូបនៅក្នុងរថយន្តម៉ាកហាយឡែនឌ័រ ហើយបានចាក់សោត្រឹមត្រូវ ។
បន្ទាប់ពីផឹកស៊ីចប់ ជនរងគ្រោះបានដើរទៅយកកាបូបលុយនៅក្នុងរថយន្ត ស្រាប់តែឃើញជនសង្ស័យមាន៣នាក់កំពុងតែឆ្កិះសោទ្វាររថយន្ត និងវាយកញ្ចក់យកកាបូបស្ពាយពីក្នុងរថយន្តជិះម៉ូតូ១គ្រឿងរត់គេចខ្លួនបាត់បន្សល់ទុកទូរស័ព្ទអិនចុចពិល១គ្រឿងនៅនឹងកន្លែងកើតហេតុ ។
ក្រោយពេលកើតហេតុជនរងគ្រោះបានរត់ទៅសមត្ថកិច្ចប៉ុស្តិ៍នគរបាលរដ្ឋបាលទឹកល្អក់ទី៣ដើម្បីឱ្យជួយអន្តរាគមន៍ ៕
ប្រភព៖ កោះសន្តិភាព
ដោយឡែកព័ត៌មានគួរឲ្យចាប់អារម្មណ៍មួយផ្សេងទៀត៖ ហួសចិត្ត! និស្សិតប្រុសថ្នាក់អនុបណ្ឌិត គ្រាន់តែពិភាក្សាតទល់មតិមិនឈ្នះ គុំតាមហក់វាយមិត្តស្រីរួមថ្នាក់ ដួលនៅនឹងដី....
ចិន៖ សារព័ត៌មានសៀងហៃ បានចុះផ្សាយនាព្រឹកថ្ងៃសៅរ៍ ទី៧ ខែធ្នូ ឆ្នាំ២០១៧ នេះថា និស្សិតប្រុសសិក្សាថ្នាក់អនុបណ្ឌិតម្នាក់ បានជះកំហឹងចងជាគំនុំ តាមវាយធ្វើបាបមិត្តស្រីរួមថ្នាក់ របស់ខ្លួនម្នាក់យ៉ាងដំណំ ដោយសារតែហេតុផល រឿងជជែកពិភាក្សាតស៊ូមតិ ។
បើតាមប្រភព បានឲ្យដឹងថា និស្សិតប្រុសសិក្សាថ្នាក់អនុបណ្ឌិត មិនបង្ហាញអត្តសញ្ញាណខាងលើនេះ សិក្សានៅសាកលវិទ្យាល័យ Shanghai University of Sport ដែលមានទីតាំងស្ថិតនៅក្នុងស្រុក Yangpu ទីក្រុងសៀងហៃ ប្រទេសចិន ត្រូវបានដឹងថា វាយធ្វើបាបមិត្តស្រីរួមថ្នាក់ម្នាក់ នៅបរិវេណខាងក្រៅសាលា ដោយរូបគេបានព្យាយាម ដើរចូលកៀកនារីរងគ្រោះ ដើម្បីវាយធ្វើបាប បន្ទាប់ពីនិស្សិតប្រុសរូបនេះ ខឹងនឹងនារីរងគ្រោះ រឿងសួរដេញដោលតស៊ូមតិ ឬហៅថា «Debate» ចំពោះទស្សនៈដែលនិស្សិតប្រុសជាជនដៃដល់នេះបានលើកឡើង ជាហេតុធ្វើឲ្យរូបគេខ្មាសមិត្តរួមថ្នាក់ជាច្រើន។
ផ្ទុយទៅវិញ ដោយមិនចង់ចំណាយពេល ឈ្លោះគ្នាតាមរយៈពាក្យសម្តី និស្សិតប្រុសរូបនេះ ជ្រើសរើសយកហិង្សាវាយទាត់ធាក់ ទៅលើនារីរងគ្រោះតែម្តង។
ជាក់ស្តែង តាមរយៈវីដេអូឃ្លីប ដែលទើបតែត្រូវបានបែកធ្លាយ បង្ហោះចែកចាយនៅលើ ប្រព័ន្ធផ្សព្វផ្សាយសង្គមចិន កាលពីម្សិលមិញនេះ (ថ្ងៃសុក្រ ទី៦ ខែធ្នូ ឆ្នាំ២០១៧) ដែលត្រូវបានថតជាប់ដោយកាម៉េរាសុវត្ថិភាព គេឃើញយ៉ាងច្បាស់ថា ជនដៃដល់ខាងលើនេះ បានប្រើកម្លាំងដៃ ទះក្បាលនារីរងគ្រោះផ្នែកខាងក្រោយ រហូតដួលទៅនឹងដី ខ្ទាតទៅផ្នែកម្ខាងទៀតផងដែរ។ ក្រោយមកគេឃើញទៀតថា ជនដៃដល់ថែមទាំងបាន លើកជើងលោតធាក់នារីរងគ្រោះ យ៉ាងដំណំថែមទៀតផង។
ជាមួយគ្នានេះដែរ បើតាមការឆ្លើយតបពីខាងសាកលវិទ្យាល័យ ដោយភ្ជាប់មកនូវសេចក្តីថ្លែងការណ៍មួយ បានឲ្យដឹងថា ក្រោយពេលកើតហេតុ នារីរងគ្រោះក៏ត្រូវបានដឹកបញ្ជូនទៅមន្ទីរពេទ្យ ដើម្បីធ្វើការពិនិត្យផងដែរ។ ប៉ុន្តែពុំរកឃើញថា ទទួលរងរបួសធ្ងន់ធ្ងរ ពីការវាយប្រហារពីសំណាក់ជនដៃដល់ឡើយ។
ប្រភពដដែលបានដឹងទៀតដែរថា ក្រោយមកជនដៃដល់ ដែលជានិស្សិតប្រុសថ្នាក់អនុបណ្ឌិតនោះ ក៏បានចូលខ្លួនទៅសួរសុខទុក្ខ នារីគ្រោះដល់មន្ទីរពេទ្យ ដើម្បីធ្វើការសុំទោសនាងផងដែរ។
សាកលវិទ្យាល័យ បានបន្ថែមទៀតដែរថា ទោះបីជាយ៉ាងណាក្តី រឿងក្តីមួយនេះក៏នឹងត្រូវដោះស្រាយ ទៅតាមបទបញ្ញត្តិរបស់សាលាផងដែរ បន្ទាប់ពីធ្វើការស៊ើបអង្កេត រួចរាល់លើករណីនេះ។
គួរឲ្យដឹងដែរថា បន្ទាប់ពីវីដេអូឃ្លីបមួយនេះ ត្រូវបានបែកធ្លាយមក អ្នកនិយមលេងបណ្តាញសង្គមជាច្រើន ជះកំហឹងរិះគន់ ចំពោះទង្វើអសីលធម៌ របស់និស្សិតប្រុសថ្នាក់អនុបណ្ឌិតនេះ យ៉ាងខ្លាំងៗផងដែរ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]