រាជធានីភ្នំពេញ ៖ កញ្ញាស៊ីន យូប៊ីន តាំងពីល្បីឈ្មោះមកមានអ្នកស្រឡាញ់ច្រើន រហូតមានមន្ត្រីមួយចំនួនសុំស្នេហ៍នាងធ្វើជានារីកំណាន់ចិត្តបែបលួចលាក់ផង ។
កញ្ញាស៊ីន យូប៊ីន កាលពីពេល ថ្មីៗកន្លងមក ឲ្យដឹងថាឆ្នាំនេះនាងទទួលការងារសម្តែង ប្រមាណជា៥ទៅ៦រឿង ក្នុងតំណែងជាតួឯកស្រី ។ ចាត់ទុកថាជាសំណាងរបស់នាងដែលគេមើលឃើញ និងឲ្យតម្លៃនាងឱ្យបានចេញ ថតកុនបន្តពីមួយរឿងទៅមួយរឿង ។ នាងហាក់ជោគជ័យច្រើន លើអាជីពសម្តែងសូម្បីតែមិត្តភក្តិ បងប្អូន និងផលិតករក៏មិននឹកថា នាងអាចរំលេចស្នាដៃ សម្តែងបានយ៉ាងគាប់ប្រសើរដែរ ។
យូប៊ីន ចេះសម្តែងស្ទើរតែ គ្រប់ទម្រង់ដោយសារតែ នាងស្រឡាញ់ពេញចិត្ត ហើយតែងតែខិតខំមើលរៀមច្បង ស្តាប់បង្គាប់អ្នកដឹកនាំរឿង ព្រមទាំងមើលវីដេអូសម្តែងរបស់តារាបរទេស ។ មើលគេហើយ យូប៊ីន យកស្ទីលតាមមួយចំនួន ។ ដូច្នេះហើយទើបនាងមានទេពកោសល្យថ្មី ប្លែក ពិសេសការលេងអារម្មណ៍ ទឹកមុខរាល់ពេលបញ្ចូលតួ ម្តងៗ។
ទោះជាយ៉ាងណាក្តី យូ ប៊ីន មិនចាត់ទុកថាការសម្តែង របស់នាងល្អប្រសើរសមល្មមតាមការចង់បានទេ ពោលត្រូវអភិវឌ្ឍន៍ថែមទៀត ។
តារាស្រស់សាច់ស យូ ប៊ីន ឱ្យដឹងថា អ្វីដែលប្លែកគឺនាងទទួលបានឱកាសសម្តែងចាប់គូជាមួយលោកខាត់ វៃហាំង បន្តពីមួយរឿងទៅមួយរឿង ។ ដូច្នេះហើយលេចឮព័ត៌មានថាពួកនាងប្រហែលជា ស្រឡាញ់គ្នាក្រៅឆាក ។ យូ ប៊ីន ថ្លែងអំណរគុណដល់ទស្សនិកជន ដែលឲ្យតម្លៃនិងចូលចិត្ត ការសម្តែងរបស់នាង និងលោកខាត់ វៃហាំង ដោយចាត់ទុកជាដៃគូសមគ្នា ប៉ុន្តែនាងអត់ដែលគិតពី រឿងស្នេហាទេ ។
«យ៉ាងណាក្តីបើថ្ងៃក្រោយវិញ នាងខ្ញុំអត់ដឹងបែបណានោះទេ គ្រាន់តែនាងខ្ញុំស្គាល់លោកខាត់ វៃហាំង ពេលនេះដឹងថាគាត់ជាបុរសល្អ ស្រឡាញ់ការងារ ចេះអត់ធ្មត់ហើយរូបរាងក៏ស្រស់សង្ហា រៀនសូត្របានល្អដូចគេឯងទៀត និយាយរួមល្មមអាចឲ្យមនុស្សស្រីអាចពិចារណា ចំពោះគុណសម្បត្តិគាត់បាន» ។
បន្ថែមពីបញ្ហានេះ នាងខ្ញុំសុំបង្ហើបឲ្យដឹងថា តាំងពីមានភាពលេចធ្លោ ជាមួយសិល្បៈមក បញ្ហាស្នេហាហាក់មាន សភាពទាក់ទាញជាងគេ មានមនុស្សតាមស្រឡាញ់ សូម្បីតែមន្ត្រីមួយចំនួន ក៏មានចិត្តមកលើនាងខ្ញុំ សុំស្នេហាធ្វើជាគូ បណ្តូលចិត្តជាច្រើន ឲ្យនាងខ្ញុំរស់នៅស្រណុកចិត្ត ។
យ៉ាងណានាងខ្ញុំមិនអាចទទួលយក បាននោះទេ ព្រោះអ្នកដែលស្រឡាញ់នាងខ្ញុំ និងចូលចិត្តនាងខ្ញុំខ្លះមិនហ៊ាន ចេញមុខទេ ខុសពីបុរសចិត្តស្មោះ មួយចំនួនគេស្រឡាញ់មនុស្សស្រីមានតែសួរនាំ នៅនឹងមុខហើយចូល ដល់ចាស់ទុំ ដើម្បីសម្រេចការប្រាថ្នា ។
ពេលនេះស្នេហានាងខ្ញុំ សុំមិនទទួលយក អ្នកណាទាំងអស់ គ្មានត្រូវការអ្នកចិញ្ចឹមនោះទេព្រោះរាល់ថ្ងៃ នាងខ្ញុំមានសមត្ថភាព អាចរស់ដោយខ្លួនឯងបាន មានការងារធ្វើបន្តបន្ទាប់ សូម្បីតែការយកលុយពីអ្នកផ្ទះ ឬឪពុកម្តាយក៏នាងខ្ញុំមិនដែលយកពីគាត់យូរឆ្នាំហើយ ។
មានតែខំធ្វើការ ហើយយកប្រាក់ជួយអ្នកផ្ទះវិញ មិនចាំបាច់អីត្រូវមានអ្នកចិញ្ចឹម ឬធ្វើជាស្រីកំណាន់ចិត្តជាមួយអ្នក មានឥទ្ឋិពលលើអំណាច ទឹកប្រាក់នោះឡើយ ។ នាងខ្ញុំសុំបិទបេះដូងមួយរយៈធំសិន មានតែទទួលយកការងារសិល្បៈ ដែលមានសន្ទុះរីកចម្រើននេះជាបន្តទៀត ឲ្យកាន់តែល្បីឈ្មោះ ជាងគិតរឿងស្នេហា» ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]