ពិតជាមិននឹកស្មានសោះ! កំពុងតែរាំសុខៗ ស្រាប់តែគាំងបេះដូងស្លាប់ នៅលើឆាក អ្នកទស្សនាទះដៃស្រែកហ៊ោកញ្ជេ្រវ ព្រោះស្មានថាជាការសម្តែង (មានវីដេអូ)

រុស្សី៖ ទីភ្នាក់ងារសារព័ត៌មានដេលីម៉ែល បានចុះផ្សាយកាលពីថ្ងៃទី០៥ ធ្នូ ២០១៦ ម្សិលមិញនេះថា បុរសអ្នករាំដ៏មានប្រជាប្រិយភាពម្នាក់ បានបាត់បង់ស្មាតី ដួលស្លាប់នៅលើឆាកភ្លាមៗកំឡុងពេលសម្តែង តែត្រូវទស្សនិកជន ដែលកំពុងទស្សនាផ្ទាល់នាំគ្នាស្រែកហ៊ោកញ្ជ្រៀវ ទះដៃសាទរព្រោះស្មានថា គ្រាន់តែជាឈុតឆាកសម្តែង។

ជនរងគ្រោះត្រូវគេស្គាល់ឈ្មោះថា R. Khunsainov មានវ័យ៤៨ឆ្នាំ ត្រូវបានគេអញ្ជើញឲ្យមកសម្តែង ក្នុងកម្មវិធីប្រគំតន្រ្តីនៃទិវាបុណ្យមាតា ឬ​ «Mother’s Day» ក្នុងទីក្រុង Urus-Martan ប្រទេសរុស្សី។

វីដេអូឃ្លីបថតជាប់ដោយទូរស័ព្ទដៃស្មាតហ្វូន របស់អ្នកចូលរួមទស្សនាម្នាក់ ក្នុងចំណោមអ្នកចូលរួមទស្សនាជាច្រើននាក់ទៀត បានបង្ហាញឲ្យឃើញយ៉ាងច្បាស់ ពីទិដ្ឋភាពរបស់លោក Khunsainov បានដួលអស់មួយទំហឹងនៅលើឆាក ក្នុងកំឡុងពេលសម្តែងក្បាច់របាំប្រពៃណី Lezgainka ។

ចំណែកតារាចម្រៀងស្រីនាង Akhmatova នៅតែបន្តការច្រៀងបណ្តើរ និងរាំបណ្តើរនៅក្បែរលោក Khusainov រួចថែមទាំងនិយាយបែបលេងសើចទៀតថា «អូ! គាត់ដួលហើយតើ!» នោះដោយសារតែនាង ស្មានថាជាការសម្តែង បែបលេងសើចរបស់លោក Khusainov។ រីឯអ្នកទស្សនាវិញ គេអាចលឺសូរសម្លេងសើច ហ៊ោកញ្ជ្រៀវ និងទះដៃអបអរសាទរ ចំពោះការសម្តែងរបស់ពួកគេទាំងពីរផងដែរ ដោយមិននឹកស្មានថា វាជាការពិតឡើយ។

បន្ទាប់ពីដឹងថា អ្វីៗហាក់បីដូចជាមិនប្រក្រតី ភ្លាមៗនោះសមាជិកនៃតួសម្តែងជាច្រើននាក់ទៀត បាននាំគ្នារត់ចូលមកពិនិត្យមើលលោក Khusainov ។ ក្រោយមកជំនួយការវេជ្ជបណ្ឌិត បានមកដល់កន្លែងកើតហេតុ ប៉ុន្តែជាអកុសលលោក Khusainov ដែលជាគ្រូបង្រៀនក្មេងៗផ្នែកសិល្បៈរបាំ និងជាអ្នករាំដ៏មានប្រជាប្រិយភាពរូបនេះ បានស្លាប់បាត់បង់ជីវិតបាត់ទៅហើយ។ ពួកគេនិយាយថា លោក Khusainov ធ្លាប់មានប្រវត្តិជំងឺបេះដូង ហើយការស្លាប់នេះ អាចបណ្តាលមកពីរាំហត់ ធ្វើឲ្យចង្វាក់បេះដូងលោតញាប់ខ្លាំង ខុសពីប្រក្រតី ដែលបណ្តាលឲ្យគាំងបេះដូងស្លាប់តែម្តង៕

ប្រភព៖ បរទេស

• វីដេអូ