ខេត្តកណ្ដាល ៖ បុរស២នាក់ខណៈជិះម៉ូតូបញ្ច្រាសចេញពីក្រោមស្ពានស្រាប់តែប៉ះគ្នាជាមួយរថយន្តក្រឡុកស៊ីម៉ង់ត៍បណ្ដាលឲ្យម៉ូតូដួលខ្ទាតបុរសជិះខាងក្រោយចូលក្រោមកង់រថយន្តកិនខ្ទេចក្បាលស្លាប់យ៉ាងអាណោចអាធ័ម ។ គ្រោះថ្នាក់ចរាចរណ៍ដ៏រន្ធត់នេះកើតឡើងកាលពីវេលាម៉ោង៣ និង១០នាទីរសៀល ថ្ងៃទី៣ ខែធ្នូ ឆ្នាំ២០១៦ ចំណុចគល់ស្ពានព្រែកសំរោងខាងលិច ផ្លូវលេខ១១៥ ស្ថិតក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ ។
នគរបាលចរាចរណ៍ក្រុងតាខ្មៅបានឱ្យដឹងថា ជនរងគ្រោះដែលបានស្លាប់ឈ្មោះ ប៊ិន ចាន់សម្បត្តិ ភេទប្រុស អាយុ២០ឆ្នាំ មានទីលំនៅក្នុងភូមិកោះក្របី សង្កាត់ព្រែកថ្មី ខណ្ឌច្បារអំពៅ ចំណែកអ្នកបើកបរម៉ូតូឈ្មោះ ហេង ម៉េង ភេទប្រុស អាយុ២១ឆ្នាំ មានទីលំនៅក្នុងភូមិកោះកែវ ឃុំកោះកែវ ស្រុកល្វាឯម ខេត្តកណ្តាល រងរបួសស្រាល ។
នគរបាលបានឱ្យដឹងបន្ថែមទៀតថា មុនពេលកើតហេតុ ម៉ូតូ១គ្រឿង ម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ 1DD-4318 ជិះគ្នា២នាក់ក្នុងទិសដៅពីកើតមកលិច ចេញបញ្ច្រាសពីក្រោមស្ពានផ្លូវខាងត្បូង បត់ស្តាំឡើងស្ពានបំណងឆ្លងទៅទិសខាងកើត ពេលនោះបានប៉ះគ្នាជាមួយរថយន្តក្រឡុកស៊ីម៉ង់ត៍១គ្រឿង ម៉ាកហ៊ីណូ ពណ៌លឿង ពាក់ផ្លាកលេខ ភ្នំពេញ 5A-1218 បើកបរក្នុងទិសដៅពីលិចទៅកើត បណ្តាលឲ្យម៉ូតូដួល ហើយអ្នកអង្គុយខាងក្រោយខ្ទាតចូលក្រោមរថយន្តកិនចំក្បាលបែកធ្លាយចេញខួរស្លាប់ភ្លាមៗ ចំណែកអ្នកបើកម៉ូតូរងរបួសស្រាល រីឯអ្នកបើកបររថយន្តបានរត់គេចខ្លួនបាត់ ។
ក្រោយពេលកើតហេតុ សពជនរងគ្រោះត្រូវបានរថយន្តសង្គ្រោះរបស់ស្នងការដ្ឋានដឹកយកទៅរក្សាទុកនៅមន្ទីរពេទ្យជ័យជំនះ រង់ចាំសាច់ញាតិមកទទួលយកទៅធ្វើបុណ្យតាមប្រពៃណី ឯអ្នកបើកបរម៉ូតូត្រូវបានឃាត់ខ្លួននៅអធិការដ្ឋាននគរបាល ព្រោះបើកបរបត់ខ្វះការប្រុងប្រយត្ន័ និងមិនគោរពស្លាកសញ្ញាចរាចរណ៍បណ្ដាលឱ្យគ្រោះថ្នាក់ចរាចរណ៍ដល់ស្លាប់មនុស្ស ៕
ប្រភព៖ កោះសន្តិភាព
កំណត់ហេតុខ្មែរឡូត៖
ស្រដៀងគ្នានេះដែរ ករណីមួយផ្សេងទៀត យុវជនម្នាក់ជិះម៉ូតូទាក់ដៃចង្កូតគ្នា ខ្ទាតចូលក្រោមកង់រថយន្តដឹកដី បណ្ដាលឲ្យកិនបែកក្បាលធ្លាយខួរស្លាប់ភ្លាមៗនៅនឹងកន្លែង។ គួររំលឹកផងដែរថា ហេតុការណ៍គ្រោះចរាចរណ៍មួយបានកើតឡើង ម៉ូតូមួយគ្រឿងទាក់ដៃចង្កូត ជាមួយម៉ូតូមួយគ្រឿងទៀត បណ្តាលឲ្យយុវជនម្នាក់ដួលខ្ទាតចូលក្រោម កង់រថយន្តដឹកដី កិនបែកក្បាលធ្លាយខួរស្លាប់ភ្លាមៗនៅនឹងកន្លែង ហេតុការណ៍ដ៏រន្ធត់នេះបានកើតឡើងនៅវេលាម៉ោង០៨៖៣២នាទីព្រឹកថ្ងៃទី១២ ខែវិច្ឆិកា ឆ្នាំ២០១៦ កន្លងទៅ ស្ថិតនៅលើផ្លូវជាតិលេខ៣ មុខក្លោងទ្វាវត្តជន្លង់ម្លូក្នុងភូមិទួលកី សង្កាត់ភ្លើងឆេះរទេះ ខណ្ឌពោធិ៍សែនជ័យ។
សមត្ថកិច្ចបានឱ្យដឹងថា ជនរងគ្រោះឈ្មោះ ថូ ស៊ាវឡុង អាយុ២០ឆ្នាំ ស្រុកកំណើតនៅភូមិព្រែកពោធិក្រោម ឃុំព្រែកពោធិ៍ ស្រុកស្រីសន្ធ ខេត្តកំពង់ចាម ជិះម៉ូតូម៉ាកវ៉េវ RSX ពណ៌ក្រហមលាយខ្មៅ ពាក់ស្លាកលេខភ្នំពេញ1GA.7362 បើកបរក្នុងទិសដៅពីជើងទៅត្បូង ចំណែកឯតៃកុងបើកបររថយន្តឈ្មោះ មាស បុរី អាយុ ២៣ឆ្នាំមុខរបរបើកឡាន រស់នៅភូមិពាមសង្កាត់ព្រៃស ខណ្ឌដង្កោ បើករថយន្តមួយគ្រឿងម៉ាកនីសាន់ពណ៌សពាក់ស្លាកលេខPP.0735 បើកបរស្រប់ទិសគ្នា។
ប្រភពពីកន្លែងកើតហេតុ បានឱ្យដឹងថា នៅមុនកើតហេតុគេឃើញម៉ូតូ២គ្រឿង បើកបរស្រប់ទិសគ្នា ខណៈមកដល់ចំណុចកើតហេតុ ស្រាប់តែទាក់ដៃចង្កូតគ្នា បណ្តាលឱ្យម៉ូតូជនរងគ្រោះខាងលើ ដួលចូលក្រោមកង់រថយន្ត ដឹកដីខាងលើកិនបែកក្បាលស្លាប់ភ្លាមៗនៅនិងកន្លែង ភ្លាមៗនោះម៉ូតូបង្កបានរត់គេចខ្លួនបាត់ស្រមោល រីឯរថយន្តបង្កនិងតៃកុងត្រូវបានសមត្ថកិច្ចឃាត់ជាប់ ដើម្បីរងចាំជំនាញចរាចរណ៍ជើងគោក រាជធានីភ្នំពេញ មកធ្វើការវាស់វេងដោះស្រាយតាមផ្លូវច្បាប់៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]