រាជធានីភ្នំពេញ ៖ ពិតជារឿងមួយដែលពិបាកនឹងថ្លែង ខណៈពីរនាក់ប្តីប្រពន្ធជិះម៉ូតូចេញពីធ្វើការត្រឡប់ទៅផ្ទះវិញ ដល់កន្លែងស្ងាត់ឈប់បត់ជើងតូច ស្រាប់តែលេចមុខក្រុមក្មេងស្ទាវមួយក្រុមទាញដំបងដេញវាយបង្កឲ្យមានការភ្ញាក់ផ្អើលកាលពីម៉ោង៦ និង៣០នាទីព្រលប់ ថ្ងៃទី០៣ ខែធ្នូ នៅចំណុចសំណង់បូរី គិតឈឿន ស្ថិតក្នុងភូមិដំណាក់ សង្កាត់ភ្នំពេញថ្មី ខណ្ឌសែនសុខ ។
ប្រភពបានឲ្យដឹងថា ជនរងគ្រោះជាប្តីមានឈ្មោះ ជួន វាសនា អាយុ២៦ឆ្នាំ មុខរបរលាងម៉ូតូ ចំណែកប្រពន្ធមានឈ្មោះ ម៉ាន់ អៃសាក់ អាយុ២៥ឆ្នាំ ស្នាក់នៅភូមិធ្លក សង្កាត់គោករកា ខណ្ឌព្រែកព្នៅ ។
ប្រភពពីជនរងគ្រោះទាំងពីរនាក់ប្តីប្រពន្ធបានឲ្យដឹងថា មុនកើតហេតុ ខណៈពួកគាត់ជិះម៉ូតូម៉ាក Honda Dream សង់ប៉ិច ពាក់ស្លាកលេខ ភ្នំពេញ 1BM-0986 ឌុបគ្នាចេញពីកន្លែងលាងម៉ូតូគោលបំណងត្រឡប់ទៅផ្ទះវិញ លុះមកដល់ចំណុចខាងលើឈឺបត់ជើងតូចក៏បានឈប់ម៉ូតូចុះទៅរកកន្លែងបត់ជើង ភ្លាមៗនោះស្រាប់តែមានក្រុមក្មេងស្ទាវមួយក្រុមជាកម្មករសំណង់កាន់ដំបងគ្រប់ដៃសំដៅមករកពួកគេ ឃើញបែបនោះក៏នាំគ្នាឡើងជិះម៉ូតូទៅប្តឹងសមត្ថកិច្ចក្រាំងធ្នង់ជួយអន្តរាគមន៍ ។
ក្រោយពីទទួលបានបណ្តឹងភ្លាម នគរបាលប៉ុស្តិ៍ក្រាំងធ្នង់សហការជាមួយកម្លាំងប្រជាការពារសង្កាត់ក្រាំងធ្នង់មិនបង្អង់យូរបានចុះទៅដល់កន្លែងកើតហេតុ ហើយធ្វើការឃាត់ខ្លួនក្រុមក្មេងទំនើងបាន៦នាក់ យកមកធ្វើការសាកសួរនៅប៉ុស្តិ៍ ។
តាមចម្លើយសារភាពរបស់ក្រុមក្មេងស្ទាវទាំង៦នាក់បានឲ្យដឹងថា មូលហេតុដែលពួកគេកាន់ដំបងគ្រប់ដៃដើរសំដៅទៅទីតាំងនោះ ព្រោះមុនពេលកើតហេតុបន្តិចមានបុរស២នាក់ដេញប្អូនស្រីគាត់ពីក្រោយបម្រុងចាប់រំលោភ ឮបែបនេះក្រុមកម្មករសំណង់ក៏នាំគ្នាកាន់ដំបងមកទីតាំងខាងលើក្នុងគោលបំណងស្វែងរកបុរស២នាក់នោះ ស្រាប់តែមកជួប២នាក់ប្តីប្រពន្ធនេះទៅវិញ ។
សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនមកសួរនាំទាំង៦នាក់មាន ១-ឈ្មោះ សំ ផល្លា ភេទប្រុស អាយុ២៧ឆ្នាំ, ២-ឈ្មោះ ផាន់ វុទ្ធី ភេទប្រុស អាយុ២៣ឆ្នាំ, ៣-ឈ្មោះ ស៊ុន រី ភេទប្រុស អាយុ៣១ឆ្នាំ, ៤-ឈ្មោះ លឹង ហៀប ភេទប្រុស អាយុ១៨ឆ្នាំ, ៥-ឈ្មោះ អ៊ាន ប្រុស ភេទប្រុស អាយុ២០ឆ្នាំ និង ៦-ឈ្មោះ កូវ ឌី ភេទប្រុស អាយុ១៩ឆ្នាំ ។ ជនសង្ស័យទាំង៦នាក់ស្នាក់នៅ ចំណុចសំណង់បូរី គិតឈឿន សង្កាត់ភ្នំពេញថ្មី ខណ្ឌសែនសុខ និងមានមុខរបរកម្មករសំណង់ដូចគ្នា ។
បច្ចុប្បន្ន ជនទាំង៦នាក់ក្រោយពីធ្វើការសាកសួរនៅប៉ុស្តិ៍នគរបាលរដ្ឋបាលក្រាំងធ្នង់ចប់ ក៏បញ្ជូននិងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌសែនសុខ ៕
ប្រភព៖ កោះសន្តិភាព
កំណត់ហេតុខ្មែរឡូត៖
ដោយឡែក ករណីមួយផ្សេងទៀត កាលពីលើកមុន បុរសម្នាក់ចេញពីលក់ផ្លែឈើនៅផ្សារនាគមាសមកដល់មុខបន្ទប់ជួល ចុះទៅចាក់សោទ្វារបងផ្ទះ ស្រាប់តែត្រូវជនសង្ស័យភ្ជង់ប្លន់យកម៉ូតូទៅបាត់ បង្កឲ្យមានការភ្ញាក់ផ្អើលកាលពីវេលាម៉ោង៩ និង៤០នាទីយប់ ថ្ងៃទី២៦ ខែវិច្ឆិកា ឆ្នាំ២០១៦ កន្លងទៅ នៅក្បែរផ្ទះសំណាក់ភូមិឫស្សី ស្ថិតក្នុងភូមិឫស្សី សង្កាត់ស្ទឹងមានជ័យ ខណ្ឌមានជ័យ ។
ជនរងគ្រោះឈ្មោះ នាង ឌឿន ភេទប្រុស អាយុ២៨ឆ្នាំ មុខអ្នកលក់ផ្លែឈើ ស្នាក់នៅបន្ទប់ជួលកន្លែងកើតហេតុ មានស្រុកកំណើតនៅភូមិអំពិល ឃុំស្លា ស្រុកសំរោង ខេត្តតាកែវ ។
ជនរងគ្រោះបានប្រាប់ឲ្យដឹងថា មុនពេលកើតហេតុគាត់ជិះម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៧ ពាក់ស្លាកលេខ ភ្នំពេញ 1GD-3453 ដែលទើបតែទិញបាន១ខែមិនទាន់បានកាតគ្រីផង ចេញពីផ្សារនាគមាសគោលបំណងទៅបន្ទប់ជួលវិញ ពេលមកដល់ផ្លូវបេតុងមុខបន្ទប់ជួល គាត់មិនបានពន្លត់ម៉ូតូទេ ហើយបានចុះពីលើម៉ូតូយកកូនសោចាក់សោទ្វាររបងដើម្បីចូលបន្ទប់ជួល ស្រាប់តែក្រុមចោរ៣នាក់ជិះម៉ូតូម៉ាកស្កុបពី ពណ៌ស មិនចាំស្លាកលេខ បានលោតពីលើម៉ូតូចុះមកជិះម៉ូតូរបស់គាត់ ចំណែកម្នាក់ទៀតដកកាំភ្លើងខ្លីភ្ជង់គាត់មិនឲ្យស្រែក និងគំរាមយកកាបូបលុយ តែគាត់មិនព្រមឲ្យទេ ដោយបានបើកទ្វាររបងរត់ចូលផ្ទះ ទើបជនសង្ស័យជិះម៉ូតូចេញទៅបាត់ ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
