ខ្លោចចិត្តណាស់! មួយសប្តាហ៍មុនធ្លាក់យន្តហោះ កីឡាករប្រេស៊ីលម្នាក់ ទទួលដំណឹងថាខ្លួន ជិតក្លាយជាឪពុកគេ (មានវីដេអូ)

កូឡំប៊ី៖ សារព័ត៌មាន CNN បានចុះផ្សាយកាលពីថ្ងៃទី៣០ ខែវិច្ឆិកា ឆ្នាំ២០១៦ ថា រយៈពេលមួយសប្តាហ៍ មុនហេតុការណ៍ធ្លាក់យន្តហោះនៅកូឡំប៊ីបានកើតឡើង មានកីឡាករម្នាក់បានទទួលដំណឹងពីប្រពន្ធរបស់ខ្លួនថា ជិតក្លាយជាឪពុកគេហើយ ហើយរូបគេស្ថិតនៅក្នុងចំណោម ក្រុមកីឡាករដែលស្លាប់សឹងមួយយន្តហោះនោះ។

ប្រភពព័ត៌មានបានឲ្យដឹងថា ក្នុងហេតុការណ៍ធ្លាក់យន្តហោះ នៅប្រទេសកូឡំប៊ី ដែលមានកីឡាករមកពីក្រុម Chapecoense បានស្លាប់នោះ មានកីឡាករម្នាក់ ឈ្មោះTiago Da Rocha Vieira ទើបបានទទួលដំណឹង កាលពីសប្តាហ៍មុន ពីភរិយារបស់ខ្លួនថា នាងកំពុងមានផ្ទៃពោះកូនដំបូង ធ្វើឱ្យកីឡាកររូបនេះត្រេកអរជាខ្លាំង ។

តាមរយៈវីដេអូមួយដែលបានបង្ហោះកាលពីសប្តាហ៍មុន នៅលើបណ្តាញសង្គម បានបង្ហាញឲ្យឃើញ កីឡាករបាល់ទាត់ប្រេស៊ីល Tiago Da Rocha Vieira កំពុងអង្គុយលេងទូរស័ព្ទ ស្រាប់តែមិត្តរួមក្រុមរបស់ខ្លួនយកកាដូមកឱ្យដោយប្រាប់ថា នាង Graziele ជាភរិយាផ្ញើមកឱ្យ។

ភ្លាមៗបន្ទាប់ពី Tiago Da Rocha Vieira បានបើកមើលសំបុត្រតូចមួយនៅក្នុងកាដូនោះ រួមទាំងឃើញមានស្បែកជើងកូនក្មេង Tiago ក៏ភ្ញាក់ផ្អើលជាខ្លាំង ដោយបានដឹងថាខ្លួនជិតក្លាយជាឪពុកគេហើយ ដោយនោះជាផ្ទៃពោះលើកដំបូង ហើយកូនក្នុងផ្ទៃរបស់ Graziele ជាកូនប្រុស ថែមទៀតផង។

តាមរយៈវីដេអូនោះ បានបង្ហាញទៀតថា Tiago បានស្រែកហ៊ោដោយក្តីរីករាយ ហើយលោតហ៊ោជាមួយមិត្តភក្តិកីឡាកររួមក្រុមរបស់ខ្លួននៅទីនោះ។ ប៉ុន្តែក្តីរំភើបរីករាយទាំងនោះ បានរលាយអស់គ្មានសល់ ត្រឹមមួយប៉ព្រិចភ្នែក ដោយសាររូបគេបានបាត់បង់ជីវិត ទាំងមិនទាន់បានឃើញមុខកូនផង ដែលជារឿងដ៏ខ្លោចចិត្តបំផុត។

គួររំឮកថា កាលពីថ្ងៃទី២៩ ខែវិច្ឆិកា ឆ្នាំ២០១៦ យន្តហោះដឹងអ្នកដំណើរមួយគ្រឿង ដែលមានអ្នកដំណើរសរុបចំនួន ៧៧នាក់ ដោយក្នុងនោះភាគច្រើនជាសមាជិកក្រុមបាល់ទាត់ នៃក្លិបរបស់ប្រេស៊ីល Chapecoense បានធ្លាក់នៅក្នុងប្រទេសកូឡំប៊ី បណ្តាលឲ្យមនុស្ស ចំនួន៧២នាក់ស្លាប់ និង៥នាក់នៅរស់ កំពុងស្ថិតក្នុងស្ថានភាពសង្គ្រោះបន្ទាន់៕ 

• វីដេអូ