នីហ្សេរីយ៉ា៖ សារព័ត៌មាន CNN បានចុះផ្សាយកាលពីថ្ងៃទី២២ ខែវិច្ឆិកា ឆ្នាំ២០១៦ ថា កីឡាករបាល់ទាត់ ជនជាតិនីហ្សេរីយ៉ា មួយរូប បានជិះកង់ចម្ងាយជាង ១០០គីឡូម៉ែត្រ ដោយមានទូលបាល់នៅលើក្បាល ដើម្បីបំបែកកំណត់ត្រាពិភពលោក Guinness World Records ។
កីឡាកររូបនេះមានឈ្មោះថា Harrison Chinedu លោកបានជិះកង់សរុបចម្ងាយ ១០៣,៦គីឡូម៉ែត្រ ឆ្លងកាត់រដ្ឋ Lagos ប្រទេសនីហ្សេរីយ៉ា ដោយទប់លំនឹងមិនឲ្យធ្លាក់បាល់ពីលើក្បាលរបស់លោកនោះឡើយ។ លោក Chinedu អាចនឹងបំបែកកំណត់ត្រាពិភពលោក Guinness World Records សម្រាប់ការធ្វើដំណើរចម្ងាយឆ្ងាយ ដែលលឿនបំផុត ជាមួយបាល់ទាត់នៅលើក្បាល។
ប្រសិនបើលោកទទួលបានជោគជ័យ លោកមិនត្រឹមតែបាន បំបែកកំណត់ត្រាចាស់នោះទេ ប៉ុន្តែលោកថែមទាំងបានបង្កើត កំណត់ត្រាថ្មីមួយថែមទៀត។ វានឹងត្រូវចំណាយពេលប្រហែល ៩០ថ្ងៃ សម្រាប់ក្រុមការងារសៀវភៅកំណត់ត្រាពិភពលោក ក្នុងការផ្ទៀងផ្ទាត់ និងបញ្ជាក់ពីលទ្ធផល។
លោក Chinedu ដែលជាអ្នកលេងបាល់អាជីពនៅក្នុងប្រទេសកម្ពុជា រូបនេះ បានប្រាប់សារព័ត៌មាន CNN ថា លោកបានរកឃើញជំនាញទប់លំនឹងបាល់នេះ ក្នុងអំឡុងពេល ១០ឆ្នាំ នៃការងារជាកីឡាបាល់ទាត់អាជីពរបស់លោក។ លោកបន្តថា បន្ទាប់មកគាត់បានអានអំពីកំណត់ត្រាពិភពលោក ហើយក៏សម្រេចចិត្តធ្វើរឿង ដ៏អស្ចារ្យមួយនេះទៅ។
Chinedu បានថ្លែងបញ្ជាក់់ថា “ខ្ញុំធ្វើបែបនេះ ព្រោះថា ខ្ញុំចង់ចែករំលែកទេពកោសល្យដែលព្រះប្រទានឱ្យ របស់ខ្ញុំ ទៅកាន់ពិភពលោក និងលើកទឹកចិត្តទៅដល់យុវជន វ័យក្មេងជាច្រើនទៀត ឲ្យធ្វើអ្វីមួយដែលមិនដែលត្រូវបានធ្វើពីមុនមក”។
ប្រភពព័ត៌មានបានឲ្យដឹងទៀតថា បើតាមសម្តីរបស់ Chinedu ឧបសគ្គធំបំផុតនៅក្នុងការធ្វើដំណើរជិះកង់របស់គេ គឺនៅលើស្ពាន Eko bridge ដែលជាស្ពានមួយ ក្នុងចំណោមស្ពានទាំង៣ ដែលតភ្ជាប់ កោះ Lagos ទៅកាន់រដ្ឋ Lagos ឆ្លងកាត់ដៃសមុទ្រប្រវែង ៣,៤៣គីឡូម៉ែត្រ។
លោកបាននិយាយថា លោកមានការលំបាកខ្លាំង ក្នុងការទប់លំនឹងបាល់នៅលើក្បាលរបស់លោក ដោយសារតែនៅលើ ស្ពាននោះមានខ្យល់ខ្លាំង។ ហើយលោកក៏ទទួលបានជំនួយពីក្រុមប៉ូលិស និងមន្រ្តីគ្រប់គ្រងចរាចរក្នុងរដ្ឋ Lagos ផងដែរ ដើម្បីសម្រួលការធ្វើដំណើររបស់លោក។
គួរបញ្ជាក់ថា លោក Chinedu ក៏ធ្លាប់ជាប់ក្នុងសៀវភៅកំណត់ត្រាពិភពលោកម្តងរួចមកហើយដែរ កាលពីខែមីនា ឆ្នាំ២០១៦ ដោយបានដើរលើចម្ងាយសរុប ៤៨,០៨គីឡូម៉ែត្រ រយៈពេល៦ម៉ោង និង១៥នាទី ដោយទូលបាល់នៅលើក្បាល បំបែកកំណត់ត្រាចាស់ របស់ទាហានឥណ្ឌាឈ្មោះ Naib Singh ដែលបានដើរលើចម្ងាយសរុប ៤៥,៦៤គីឡូម៉ែត្រ កាលពីឆ្នាំ២០១៤៕
ប្រភព៖ CNN
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
