រាជធានីភ្នំពេញ ៖ យុវជនម្នាក់បានសម្រេចចិត្តលោតទឹកសម្លាប់ខ្លួនពីលើស្ពានជ្រោយចង្វា កាលពីវេលាម៉ោង៨ព្រឹកថ្ងៃទី២៨ កុម្ភៈ ដោយតូចចិត្តរឿងគូដណ្តឹងប្រកាសផ្តាច់ពាក្យវិញព្រោះខ្លួនចង់ក្រេបទឹកឃ្មុំមុនថ្ងៃផ្សំដំណេក។
ការប៉ុនប៉ងសម្លាប់ខ្លួននេះពុំបានសម្រេចឡើយ ដោយសារប៉ូលិសការពារស្ពានជ្រោយចង្វាចេញទូកទៅជួយសង្គ្រោះទាន់ពេលវេលា ។
បុរសដែលគិតខ្លីព្រោះតែការថ្លោះធ្លោយដោយចំណង់កាមគុណនោះឈ្មោះទី ណូរ៉ា ហៅដេវ អាយុ២២ឆ្នាំ ជាកម្មករហាងនំប៉័ង មានទីលំនៅក្នុងភូមិត្រោក ឃុំព្រះពន្លា ស្រុកកំពង់រោទ៍ខេត្តស្វាយរៀង ។ យុវជនរូបនេះឱ្យដឹងថា គូដណ្តឹងដែលគេស្រឡាញ់ដល់ឆ្អឹងនោះបានផ្តាច់ពាក្យ ព្រោះខឹងដែលហ៊ានចាប់រំលោភនាង ។
មន្ត្រីប៉ូលិសការពារស្ពានជ្រោយចង្វាឱ្យដឹងថា យុវជនរូបនោះដើរពីទិសខាងកើតឡើងទៅលើស្ពាន លុះដល់កណ្តាលស្ពានក៏លោតទឹកនៅក្នុងទន្លេតែម្តង ។ ពេលឃើញហេតុការណ៍នោះប៉ូលិសប្រចាំការបានប្រកូកប្រកាសឱ្យទូកនេសាទនៅក្បែរនោះនាំគ្នាទៅជួយស្រង់ ហើយនាំទៅកាន់អង្គភាពគោលដៅទី៣ ដើម្បីសាកសួរ ។
នៅចំពោះមុខសមត្ថកិច្ចយុវជននោះឱ្យដឹងថា កាលពីរដូវភ្ជំបិណ្ឌគេមានទំនាក់ទំនងជាមួយកម្មការិនីនៅរោងចក្រកាត់ដេរ សង្កាត់ចោមចៅខណ្ឌដង្កោ ហើយចាប់ចិត្តស្រឡាញ់គ្នា ។ រួបគេបានឱ្យឪពុកម្តាយចូលទៅស្តីដណ្តឹងនាងរយៈពេលប្រមាណជាង១ខែមកហើយ ដោយឪពុកម្តាយខាងស្រីបង្គាប់ថ្លៃផ្ទះចំនួន២.៣០០ដុល្លារ ហើយចុះមកនៅនៅសល់២.១០០ដុល្លារ តែឪពុកម្តាយរបស់គេសុំជូនតែ១.៥០០ដុល្លារប៉ុណ្ណោះ ។ ទោះបីជាយ៉ាងណាក្តីរូបគេធានានៅសល់ប៉ុន្មានរកប្រាក់បង្គ្រប់ និងត្រៀមរៀបអាពាហ៍ពិពាហ៍នៅខែមិថុនាខាងមុខ ។
ទី ណូរ៉ា អះអាងថា កាលពីព្រឹកថ្ងៃទី២៥ កុម្ភៈ គេធ្វើដំណើរទៅលេងផ្ទះគូដណ្តឹង និងដេកនៅជាមួយគ្នា ហើយដោយសារតែទ្រាំមិនបានគេក៏ចាប់រំលោភនាង តែពុំបានសម្រេចទេ ។ បន្ទាប់មកនៅវេលាថ្ងៃត្រង់ថ្ងៃទី២៦ ខែកុម្ភៈ គេបានចាប់រំលោភនាងម្តងទៀតនៅផ្ទះជួល តែពុំបានសម្រេចដដែល ។ ដោយសាររឿងបង្ខំរួមភេទមុនថ្ងៃរៀបការនោះគូដណ្តឹងខឹងរូបគេយ៉ាងខ្លាំងដោយចោទថាមើលងាយនាង និងបានបោះពាក្យថា «សុខចិត្តស្លាប់មិនព្រមយករូបគេជាប្តីទេ »។ លើសពីនេះនាងបានទូរស័ព្ទទៅប្រាប់ម្តាយទៀតផងឱ្យផ្តាច់ពាក្យពីរូបគេវិញ ។
ដោយសារតែតូចចិត្តទូរស័ព្ទទៅគូដណ្តឹង តែនាងពុំនិយាយរក និងផ្តាច់ពាក្យទៀត ទើបនៅព្រឹកថ្ងៃទី២៨ កុម្ភៈ ក៏ខ្លួនសម្រេចចិត្តចេញពីកន្លែងធ្វើការនៅបុរីសុភមង្គលក្នុងសង្កាត់ជ្រោយចង្វាទៅលោតទឹកប៉ងសម្លាប់ខ្លួន ។
បន្ទាប់ពីសាកសួរ និងអប់រំរួចមកនៅព្រឹកនោះមេការហាងនំប៉័ងបានធានាយកយុវជនខូចចិត្តត្រឡប់ទៅវិញ ៕
ផ្តល់សិទ្ធដោយ កោះសន្តិភាព
សូមប្រិយមិត្តជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]