(ភ្នំពេញ)៖ ក្រុមជម្រើសជាតិកម្ពុជា និងក្រុមម្ចាស់ផ្ទះមីយ៉ាន់ម៉ា ដែលជាក្រុមបរាជ័យថ្ងៃបើកឆាកពាន AFF Suzuki Cup 2016 នឹងត្រូវជួបគ្នានាវេលាម៉ោង ៦៖៣០នាទីល្ងាចនេះ ដើម្បីប្រជែងយក ៣ពិន្ទុដំបូងរៀងៗខ្លួន សម្រាប់បន្ដឱកាសឡើងទៅវគ្គពាក់កណ្ដាលផ្ដាច់ព្រ័ត្រ គ្រាដែលក្រុមជម្រើសជាតិម៉ាឡេស៊ី ក៏ត្រូវប៉ះក្រុមជម្រើសជាតិវៀតណាម ដើម្បីប្រជែងកៅអីកំពូលតារាងពូល B ថ្ងៃនេះផងដែរ។
សម្រាប់ជំនួបរវាងក្រុមគោព្រៃកម្ពុជា និងមីយ៉ាន់ម៉ា គឺជាការប្រកួតមួយដ៏សំខាន់ ដោយសារក្រុមទាំងពីរសុទ្ធតែត្រូវការ ឈ្នះជាចាំបាច់។ ជាបណ្ដោះអាសន្នក្រុមទាំងពីរ នៅសល់២ប្រកួតដូចគ្នា ប៉ុន្ដែបើសិនល្ងាចនេះ ក្រុមណាចាញ់ ក្រុមនោះនឹងអស់ឱកាសឡើងទៅវគ្គបន្ដ។ តែក្រុមទទួលបានជ័យជម្នះ ក៏មិនទាន់មានសង្ឃឹមច្រើនដែរ គឺត្រូវចាំអ៊ុតការ ប្រកួតចុងក្រោយជាមួយក្រុមវៀតណាម ឬម៉ាឡេស៊ីសិន។
សូមរំឮកថា ចាប់តាំងពីឆ្នាំ២០០៨ រហូតមកទល់នឹងបច្ចុប្បន្នកម្ពុជា និងមីយ៉ាន់ម៉ា មានប្រវត្ដិធ្លាប់ជួបគ្នា ៦លើកមកហើយ ក្នុងនោះជួបគ្នា៥លើកក្រុមមីយ៉ាន់ម៉ា ទទួលបានជ័យជម្នះ ហើយមានម្ដងគត់ ដែលក្រុមទាំងពីរបញ្ចប់ការប្រកួត ដោយលទ្ធផលស្មើគ្នា ០-០ ពោលគឺនៅក្នុងជំនួបមិត្តភាពអន្ដរជាតិលើកចុងក្រោយកាលពីឆ្នាំ២០១៥ កន្លងទៅនៅ លើទឹកដីប្រទេសថៃ។
គួរបញ្ជាក់ថា នៅក្នុងពូល B ជាបណ្ដោះអាសន្នពេលនេះ គឺក្រុមម៉ាឡេស៊ី ឈរកំពូលតារាង ខណៈក្រុមវៀតណាមឈរ លេខរៀងទី២ ប៉ុន្ដែមាន៣ពិន្ទុស្មើគ្នា។ ចំណែកក្រុមគោព្រៃកម្ពុជា និងក្រុមម្ចាស់ផ្ទះមីយ៉ាន់ម៉ា នៅមិនទាន់មានពិន្ទុរាប់នោះទេ បន្ទាប់ពីបរាជ័យក្រោមថ្វីជើងក្រុមម៉ាឡេស៊ី ៣-២ និងវៀតណាម បានយកឈ្នះមីយ៉ាន់ម៉ា ២-១ កាលពីថ្ងៃបើក ឆាកចុងសប្ដាហ៍កន្លងទៅ៕
ប្រភព៖ Khmertalking
កំណត់ហេតុខ្មែរឡូត៖
ដោយឡែក រំលឹកព័ត៌មានចាស់លើកមុនផងដែរថា កម្ពុជាចាញ់ម៉ាឡេស៊ី ៣-២! ខ្សែប្រយុទ្ធខ្លាំងតែខ្សែការពារ នៅមានចំណុចច្រើនត្រូវកែលំអ។ កម្ពុជាចាញ់ម៉ាឡេស៊ី ៣-២ ក្នុងការប្រកួតដំបូងរបស់កម្ពុជា ក្នុងពូលនៃការប្រកួតពានរង្វាន់ AFF Suzuki Cup 2016 ដែលនៅក្នុងនោះ កីឡាកឆ្នើមកម្ពុជា ចាន់ វឌ្ឍនាកា រកបានពីរគ្រាប់សម្រាប់ក្រុមកម្ពុជា។
អ្នកគាំទ្រកម្ពុជាជាច្រើនបានបញ្ចេញមតិថា ខ្សែការពារកម្ពុជា នៅលេងមិនទាន់ល្អដែលបណ្ដាលឲ្យខ្សែប្រយុទ្ធម៉ាឡេស៊ី សម្រុកចូលងាយៗ។ មតិខ្លះក៏បានរិះគន់អាជ្ញាកណ្ដាល ដែលមិនពិន័យកីឡាករម៉ាឡេស៊ី ដែលបានលើកជើងចំមុខកីឡាករ ចាន់ វឌ្ឍនាកា ផងដែរ។
គួរបញ្ជាក់ថា កម្ពុជានឹងជួបក្រុមមីយ៉ាន់ម៉ា ដែលជាក្រុមម្ចាស់ផ្ទះនៅថ្ងៃពុធទី ២៣ និង ក្រុមវៀតណាមនៅថ្ងៃសៅរ៍ទី ២៦៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]