បាត់ដំបង៖ វីដេអូមួយត្រូវបានចុចមើលនៅលើបណ្តាញសង្គមហ្វេសប៊ុក ចំនួនជាង ៥៣០,០០០ដង ក្រោយពីម្ចាស់គណនីម្នាក់ឈ្មោះ Kang Samoun បង្ហោះកាលពីម្សិលមិញ ថ្ងៃទី១៩ ខែវិច្ឆិកា ឆ្នាំ២០១៦ ពោលគឺត្រឹមតែរយៈពេលមួយថ្ងៃប៉ុណ្ណោះ ទទួលបានការចាប់អារម្មណ៍ និងចុចចែករំលែកយ៉ាងច្រើន។
ម្ចាស់គណនីហ្វេសប៊ុកខាងលើ បានសរសេរបញ្ជាក់ឲ្យដឹងថា «ទោះបីគាត់ខុសអ្វីក៏ខ្មែរយើង មិនគួរបណ្តោយឲ្យសន្តិសុខថៃវាយគាត់ដល់ស្លាប់ចឹងទេ ឃើញហើយខ្លោចចិត្តណាស់។ ហេតុអ្វីប៉ូលិសខ្មែរយើងមិនជួយអន្តរាគមន៍ផង! នេះជាលើកទី២ហើយ ដែលខ្មែរយើងបានត្រូវសន្តិសុខថៃវៃដល់ស្លាប់។ ហេតុការណ៍បានកើត(ឡើង)នៅច្រកព្រំដែន (ឡែម ខេត្តបាត់ដំបង)»។
ក្រោយពីបានមើលឃើញហេតុការណ៍ដ៏អាក្រក់នេះហើយ អ្នកនិយមប្រើប្រាស់បណ្តាញសង្គមហ្វេសប៊ុក បានចូលទៅបញ្ចេញមតិយ៉ាងច្រើន ដោយក្នុងនោះមួយចំនួន បានសម្តែងនូវការហួសចិត្តយ៉ាងខ្លាំង ចំពោះអ្នកដែលស្ថិតនៅក្នុងហេតុការណ៍នោះផ្ទាល់ ថាមានគ្នាច្រើនតែបែរជាគ្មាននរណាមានចិត្តចូលទៅឃាត់ ឬជួយជនរងគ្រោះទាល់តែសោះ បានត្រឹមតែឈរមើល និងបណ្តោយឲ្យគេវាយជនរងគ្រោះដែលជាជនជាតិខ្មែរដូចគ្នារហូតដល់ស្លាប់ដូចនេះ៕
វីដេអូខាងក្រោម៖
កំណត់ហេតុខ្មែរឡូត៖ មួយករណីផ្សេងទៀតកាលពីលើកមុន
ពលករខ្មែរម្នាក់ត្រូវបានថៅកែថៃបាញ់សម្លាប់យ៉ាងព្រៃផ្សៃ ត្រូវបានគេបញ្ជូនឲ្យសាច់ញាតិតាមច្រកទ្វារអន្តរជាតិប៉ោយប៉ែតកាលពីវេលាម៉ោងជាង៦ព្រលប់ថ្ងៃទី១៩ ខែវិច្ឆិកា ឆ្នាំ២០១៦ ខណៈកាលពីថ្ងៃទី១៨ វិច្ឆិកា ពលករ៤នាក់ត្រូវក្រុមសន្តិសុខផ្សារបានឡែម ក្នុងខេត្តចាន់បូរី ឈមទឹកដីកម្ពុជា ច្រកទ្វារអន្តរជាតិដូង ស្រុកកំរៀង ខេត្តបាត់ដំបង វាយឲ្យរបួសធ្ងន់ស្រាល ។
ប្រភពព័ត៌មានបានឲ្យដឹងថា ជនរងគ្រោះដោយអំពើបាញ់ប្រហារពីសំណាក់ថៅកែថៃឈ្មោះ ស រងី ភេទប្រុសអាយុ៣១ឆ្នាំ ជាកម្មករស៊ីឈ្នួលដកដំឡូងនៅខេត្តស្រះកែវ លើទឹកដីថៃ និងមានទីលំនៅភូមិតាទយ ឃុំចាឈូស្រុកអង្គរជុំ ខេត្តសៀមរាប ។
គេមិនទាន់ដឹងពីមូលហេតុដែលឈានដល់ការបាញ់សម្លាប់ពលកររងគ្រោះនោះនៅឡើយទេ ប៉ុន្តែបើយោងតាមរបាយការណ៍របស់មន្ត្រីស្ថានកុងស៊ុលខ្មែរប្រចាំខេត្តស្រះកែវ ប្រទេសថៃ បញ្ជាក់ថា ជនរងគ្រោះត្រូវបានថៅកែថៃបាញ់សម្លាប់ដោយសារមានទំនាស់កាលពីម៉ោង៩យប់ ថ្ងៃទី១៨ ខែវិច្ឆិកា ឆ្នាំ២០១៦ ។ សពក្រោយពីបញ្ជូនដល់ព្រំដែន ត្រូវបានសាច់ញាតិជួលរថយន្តដឹកបន្តទៅលំនៅដ្ឋានដើម្បីធ្វើបុណ្យតាមប្រពៃណី ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
