ខេត្តព្រៃវែង ៖ កាលពីព្រឹកថ្ងៃទី១២ វិច្ឆិកា នេះ តារាចម្រៀងសន វិជ្ជបុត្រ បានផ្ទុះជម្លោះពីសំណាក់អ្នកភូមិនៅខេត្តព្រៃវែង ព្រោះអ្នកនៅតំបន់នោះមិនឱ្យយកសាកសពលោកយាយបង្កើតទៅបញ្ចុះតាមគម្រោង ។
លោកវិជ្ជបុត្រ បានប្រាប់ឱ្យដឹងថា សពលោកយាយរបស់លោកឈ្មោះឡុង សាត ព្រះជន្ម៨៦ឆ្នាំ បានទទួលមរណភាពកាលពីថ្ងៃទី១១ វិច្ឆិកា ដោយរោគា ។ មុននឹងចែកឋាន លោកយាយបានផ្តាំឱ្យកូនចៅបូជាសពរបស់យាយ និងសុំបញ្ចុះក្នុងវត្តថ្មី ដែលស្ថិតក្នុងភូមិជ្រួលថ្មី ឃុំវិរៈជ័យ ស្រុកបាភ្នំ ខេត្តព្រៃវែង នៅជិតផ្ទះដើម្បីបញ្ចុះ ។
យ៉ាងណាក៏ដោយ នៅពេលគ្រួសារសពទទួលបានការអនុញ្ញាតពីគណៈកម្មាការវត្ត និងពីគណៈស្រុកឱ្យប្រគល់ដីមួយកន្លែងនៅក្នុងវត្តឲ្យបញ្ចុះសព ត្រូវបានផ្ទះការតវ៉ាពីសំណាក់អ្នកភូមិតែម្តង ចាប់តាំងពីព្រឹកព្រលឹមថ្ងៃទី១២ វិច្ឆិកា នេះ ។
លោកបន្តទៀតថាអ្នកភូមិបានប្រកាន់ជំហរមិនឲ្យបញ្ចុះសពនៅត្រង់កន្លែង ដែលបានសុំនោះទេ ដោយលើកហេតុផលថា ទីធ្លាវត្តមានសភាពតូចចង្អៀត និងមិនអាចឲ្យគ្រួសារសពណាមួយសុំដីវត្ត ធ្វើជាកន្លែងបញ្ចុះបានឡើយ ។ នេះជារឿងមិនគួរឱ្យកើត ដោយសារតែនៅក្នុងវត្ត មានគេសុំដីធ្វើចេតីយជាច្រើនរួចមកហើយ ។
លោកសៅ ហឿន មេភូមិជ្រួលថ្មី បានឱ្យដឹងដែរថា ហេតុផលដែលប្រជាជនមិនយល់ព្រម គឺដោយសារតែមកពីគ្រួសារតារាចម្រៀងសន វិជ្ជបុត្រ (គ្រួសារសព) ប្រកាន់ជំហរយកសពបញ្ចុះធ្វើជាម៉ុង ហើយទីធ្លាវត្ត មិនធ្លាប់មានម៉ុងដែលអាចធ្វើឱ្យខូចសោភ័ណភាពវត្ត ។
លោកបញ្ជាក់បន្តថា បើគាត់សុំធ្វើជាចេតីយ គឺគ្មានបញ្ហានោះទេ តែគាត់បែរជាមកចង់បញ្ចុះធ្វើជាម៉ុង ទើបយើងសម្រេចថា ឱ្យគាត់ទៅរកកន្លែងផ្សេង ព្រោះយើងអត់ចង់ឃើញម៉ុង មានសណ្ឋានបែបចិន-វៀតណាម នៅតំបន់វត្តនេះទេ ។ បើទីធ្លាវត្តមានគ្រួសារមួយណា សុំធ្វើម៉ុងបាននោះ អ្នកស្លាប់ផ្សេងៗទៀត ក៏គេមានសិទ្ធិធ្វើតាមដែរ ហើយនោះវានឹងប្រែជាម៉ុងចិន-វៀតណាមបាត់ទៅហើយ ឯវត្តខ្មែរ គឺបាត់ឈ្មោះ ។
ម្ល៉ោះហើយ ទើបផ្ទុះការតវ៉ាហើយសម្រេចថា ទីធ្លាក្នុងវត្តនោះ គឺមិនឱ្យគ្រួសារណាទាំងអស់ធ្វើម៉ុង ដើម្បីកុំឱ្យចង្អៀតវត្ត ។ លោកថា មុននេះបន្តិច ភាពតវ៉ាត្រូវបានបិទបញ្ចប់ពីគ្រួសារសពបានសម្រេចចិត្តស្វែងរកទីធ្លាវត្តផ្សេង ដើម្បីបញ្ចុះសពលោកយាយឡុង សាត ។
គួររំលឹកដែរថា លោកសន វិជ្ជបុត្រ ក្រៅពីជាតារាចំរៀង លោកតែងតែលេចធ្លោជាមួយសកម្មភាពមនុស្សធម៌ ដែលរមែងតែងតែខិតរកជំនួយគ្រប់ទិសទីជាមួយដល់ជនក្រីក្រសាងសង់សាលារៀនជាដើម ទើបរូបលោកត្រូវបានអ្នកក្នុងសង្គមសិល្បៈសរសើរពីទឹកចិត្តដ៏ជ្រះថ្លានេះ ។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]