ភ្លៀងខ្យល់ខ្លាំងយប់មិញ បណ្តាលឲ្យបើុងដំបូលអតីតរោងចក្រ៥ជាន់ មួយផ្ទាំងធំ ទៅលើផ្ទះប្រជាពលរដ្ឋ៤ខ្នង ខូចខាតខ្ទង់មឺុនដុល្លារ

(ភ្នំពេញ)៖ ដំបូលរោងសិប្បកម្មលក់ តុ ទូ និងពូក ជាអតីតរោងចក្រ៥ជាន់ មួយផ្ទាំងធំ ស្ថិតនៅសង្កាត់ចាក់អង្រែក្រោម ខណ្ឌមានជ័យ ដែលមានបណ្តោយរហូតទៅដល់៤០ម៉ែត និងទទឹងជាង១០ម៉ែត្រ ដោយសារតែភ្លៀងខ្យល់ខ្លាំង នៅយប់មិញ បានបើិុងទៅលើផ្ទះប្រជាពលរដ្ឋ និងផ្ទះមេភូមិទួលរការ បណ្តាលឲ្យរងការខូចខាត ខ្ទង់មឺិនដុល្លារ។ នេះបើយោងតាម ចៅសង្កាត់ចាក់អង្រែក្រោម ខណ្ឌមានជ័យ លោក ជា សុផៃ បានប្រាប់អង្គភាពFresh News នៅព្រឹកថ្ងៃទី២ ខែវិច្ឆិកា ឆ្នាំ២០១៦នេះ។

លោកចៅសង្កាត់បានបញ្ជាក់ថា នៅយប់មិញ ម៉ោងជាង ៨ នៅពេលមានភ្លៀងខ្យល់ធ្លាក់ខ្លាំង ស្រាប់តែដំបូលរោងសិប្បកម្មលក់ តុ ទូ និងពូក បានដាច់ហើយបើុងទៅប៉ះផ្ទះប្រជាពលរដ្ឋ ចំនួន៤ខ្នង ក្នុងនោះ មានទាំងផ្ទះមេភូមិទួលរការទៀត ដែលគ្រាន់តែផ្ទះមេភូមិខូចខាត មិនក្រោម១មឺិនដុល្លារនោះទេ។

យ៉ាងណាក៏ដោយ រហូតមកដល់ពេលនេះ មិនទាន់ដំណោះស្រាយណាមួយពីសំណាក់ ម្ចាស់រោងសិប្បកម្មនៅឡើុយទេ។

បើតាមលោកចៅសង្កាត់ចាក់អង្រែក្រោម គ្រោះថ្នាក់នេះ មិនបានបណ្តាលឲ្យប្រជាពលរដ្ឋណាម្នាក់ ប៉ះពាល់ដល់អាយុជីវិតនោះទេ៕

ប្រភព៖ Fresh News

កំណត់ហេតុខ្មែរឡូត៖

ដោយឡែក រំលឹកព័ត៌មានចាស់លើកមុនផងដែរថា  ខ្យល់កន្ត្រាក់បាក់រលំផ្ទះ ប្រជាពលរដ្ឋ៨គ្រួសារ នៅស្រុកកណ្តាលស្ទឹង ខេត្តកណ្តាល ។ គួររំលឹកផងដែរថា សេចក្តីរាយការណ៍ពីកម្លាំងអាវុធហត្ថខេត្តកណ្តាល បានឲ្យដឹងនៅព្រឹកថ្ងៃទី២៦ ខែតុលានេះថា មានករណីបាតុភូតខ្យល់កន្ត្រាក់ បានកើតឡើងកាលពីវេលាម៉ោង១២៖១៥នាទីរំលងអធ្រាត្រ ឈានចូលថ្ងៃទី ២៦ ខែតុលា ឆ្នាំ២០១៦ កន្លងទៅ នៅចំណុចភូមិតាព្រ​ហ្ម ឃុំបឹងខ្យាង ស្រុកកណ្តា​លស្ទឹង ខេត្តកណ្តាល​ បណ្តាលឲ្យខូចខាតផ្ទះ ប្រជាពលរដ្ឋចំនួន៩ខ្នង។

បើតាម​ លោក ជុន វណ្ណី មេបញ្ជាការអាវុធហត្ថ ស្រុកកណ្តាលស្ទឹង បានប្រាប់ឲ្យដឹងថា ផ្ទះប្រជាពលរដ្ឋដែលខូចខាតរួមមាន៖

១-ឈ្មោះ ម៉ែន មុំ រលំផ្ទះមួយចំហៀង ទំហំ៤ម៉ែត្រគុណ៥ម៉ែត្រ ធ្វើពីឈើប្រកសង្ក័សី។

២-ឈ្មោះ លាន ឃឿន រលំផ្ទះទាំងស្រុង ទំហំ៤ម៉ែត្រគុណ៥ម៉ែត្រ ធ្វើពីឈើប្រកសង្ក័សី។

៣-ឈ្មោះ មឿន ស៊ីមន ប៉ើងដំបូលទាំងស្រុង ទំហំ៦ម៉ែត្រគុណ៧ម៉ែត្រ ធ្វើពីថ្មប្រកសង្ក័សី និងរោងដាក់សំភារៈ២ខ្នង សង់ពីដែកប្រកសង្ក័សី (ខូចទាំងស្រុង) និងសំភារៈប្រើប្រាស់មួយចំនួនធំ។

៤-ឈ្មោះ ផូ រៀម របើកដំបូលខូចអាគារសាលារៀន ទំហំ ១០ម៉ែត្រ គុណ១០ម៉ែត្រ ថ្មក្រោមដែកសង្ក័សីលើ។

៥-ឈ្មោះ ហេង ម៉ឹង រលំទាំងស្រុងទំហំ៥ម៉ែត្រ គុណ៨ម៉ែត្រ ឈើដំបូលសង្ក័សី។

៦-ឈ្មោះ ផូ ប៊ន ប៉ើងដំបូលមួយចំហៀង ទំហំ៧ម៉ែត្រ គុណ៩ម៉ែត្រ ឈើក្រោមប្រកសង្ក័សី។

៧-ឈ្មោះ វ៉ង់ វុទ្ធី ខូចខាត២ខ្នង ដោយរលំទាំងស្រុងរោងទំហំ៥ម៉ែត្រ គុណ៦ម៉ែត្រ ឈើដំបូលសង្ក័សី និងប៉ើងដំបូលរោងមួយចំហៀងទំហំ១០ម៉ែត្រ​ គុណ៧ម៉ែត្រ ធ្វើពីឈើដំបូលសង្ក័សី។

៨-ឈ្មោះ រ៉េត សារីរ​ លំខូចរោងពពែ១ខ្នង ធ្វើឈើប្រកសង្ក័សី។

• អាកាសធាតុ