ភ្នំពេញ៖ ព្រឹត្តការណ៍កីឡាជាតិ ជាលើកដំបូងក្នុងប្រវត្តិសាស្រ្ត ប្រទេសកម្ពុជា បានចាប់ផ្តើមដំណើរការកម្មវិធីជាផ្លូវការហើយ នៅពហុកីឡដ្ឋានជាតិអូឡាំពិក ក្រោមក្រសែភ្នែកអ្នកទស្សនារាប់មឺុននាក់ កាលពីល្ងាចថ្ងៃទី២៨ ខែតុលាកន្លងទៅនេះ ។
ក្នុងនោះដែរ ម្ចាស់មេដាយមាសអាស៊ានហ្គេម ឆ្នាំ២០១៤ កីឡាការិនី តៃក្វាន់ដូ ស៊ន សៀវមីុ បានចូលរួមជាកិត្តិយស និងជាអ្នកអុជភ្លើងគប់ ផងដែរនៅក្នុងកម្មវិធី ។
គួរបញ្ជាក់ផងដែរថា ការកាន់ភ្លើងគប់ និងការអុជភ្លើងគប់នេះ គឺជាប្រពៃណីទំនៀមទំលាប់មួយដែលមានតាំងពីយូរលង់ណាស់មកហើយ ដែលកើតចេញដំបូងពីព្រឹត្តការណ៍អូឡាំពិកមកម្ល៉េះ រហូតមកទល់ពេលបច្ចុប្បន្ននេះ គ្រប់ប្រភេទកម្មវិធីកីឡាទាំងអស់ សុទ្ធតែមានរៀបចំនូវកម្មវិធីនេះ មុននឹងបើកការប្រកួត។
ទើបដូច្នេះហើយ កាលពីម្សិលមិញនេះ កីឡាការិនីឆ្នើម ស៊ន សៀវមីុ បានសម្តែងនូវក្តីសោមនស្សរីករាយយ៉ាងខ្លាំង បន្ទាប់ពីកីឡាការិនីរូបនេះ ត្រូវបានជ្រើសរើស និងអ្នកតំណាងឲ្យកម្មវិធីទាំងមូល កាន់និងអុជភ្លើងគប់ ដើម្បីបើកកម្មវិធីជាផ្លូវការ។
ក្នុងនោះ សៀវមីុ បានឲ្យដឹងថា «មហាកិត្តិយសសម្រាប់នាងខ្ញុំ ដែលបានជ្រើសរើសជាអ្នកកាន់ និងដុតភ្លើងគប់ #កីឡាជាតិលើកទី១» ។ ជាមួយនឹងការលើកឡើងរបស់ សៀវមីុ កាលពីម្សិលមិញនេះ ក៏បានធ្វើឲ្យមហាជន ក៏ដូចជាអ្នកគាំទ្រមានការសាទរ និងក្តីមោទនភាពចំពោះកីឡាការិនីរូបនេះទៀតផង។ នេះបើយោងតាមទំព័ររបស់ សៀវមីុ នៅក្នុងបណ្តាញសង្គមហ្វេសប៊ុក។
គួរបញ្ជាក់បន្ថែមទៀតផងដែរថា ក្នុងដំណើរ កាន់ និងអុជភ្លើងគប់នេះ ក៏បានចូលរួមជាកិត្តិយសពីសំណាក់កីឡាករជើងចាស់ទសវត្សទី ៨០ និង៩០ ផងដែរ និងជាពិសេសទៀតនោះ ក៏មានតំណាងកីឡាករបាល់ទាត់ឆ្នើមប្រចាំក្រុមជម្រើសជាតិកម្ពុជាផងដែរ៕
កំណត់ហេតុខ្មែរឡូត៖
ដោយឡែក រំលឹកព័ត៌មានចាស់លើកមុនផងដែរថា ស៊ន សៀវម៉ី ប្រឈមការវះកាត់របួសចាស់ ។ គួររំលឹកកាលពីខែកញ្ញាកន្លងទៅនេះផងដែរថា ដំណឹងមួយនេះ គេចាត់ទុកថាជារឿងភ្ញាក់ផ្អើលមួយថ្មី ខណៈដែលស៊ន សៀវម៉ី ក្នុងពេលកន្លងមកហាក់មិនបានលើកឡើងពីបញ្ហារបួសឱ្យគេបានដឹងនោះទេ ប៉ុន្តែនៅក្នុងពេលនេះស្រាប់តែនាងបញ្ជាក់ថា ជង្គង់មានអាការធ្ងន់ធ្ងរដែលអាចប្រឈមការវះកាត់ ។ នាងអះអាងថា ដោយសារតែការប្រកួត និងហ្វឹកហាត់តេក្វាន់ដូទើបបណ្ដាលឱ្យជង្គង់របស់នាងមានរបួស ហើយបើទោះជាបានព្យាបាលដល់ក្រៅប្រទេសក៏បានត្រឹមតែទប់កុំឱ្យមានបញ្ហាធ្ងន់ធ្ងរជាងមុនប៉ុណ្ណោះ។ នាងថា ជង្គង់ដែលបានធ្វើទុក្ខចាប់ផ្ដើមរើឡើងវិញបន្ទាប់ពីនាងចូលប្រកួតក្នុងព្រឹត្តិការណ៍អូឡាំពិក ខណៈដែលក្នុងពេលនេះ ស្ថានភាពធ្វើទុក្ខកាន់តែមានសភាពធ្ងន់ធ្ងរ។ នាងនិយាយថា របួសរបស់នាងគ្រូពេទ្យកូរ៉េតម្រូវឱ្យនាងវះកាត់ ប៉ុន្តែបើនាងឆ្លងកាត់ការវះកាត់គឺមិនអាចដូចដើមនោះទេ ក្នុងពេលដែលអ្នកណាក៏ដឹងថា ជង្គង់របស់នាងមានសារសំខាន់បំផុតសម្រាប់ការប្រកួតមួយលើកៗ ។
នាងនិយាយថា៖«ជង្គង់ហ្នឹងមានរបួសយូរហើយប៉ុន្តែខ្ញុំចេះតែលេប និងលាបថ្នាំព្យាបាល ឥឡូវវាធ្វើទុក្ខមែនទែន បើចង់ជាទាល់តែវះកាត់ ហើយខ្ញុំអត់ចង់វះព្រោះវាប៉ះពាល់ការប្រកួតក្រោយៗទើបចេះតែទ្រាំ!»។ នាងថា គ្រូបង្វឹកជាជនជាតិកូរ៉េកំពុងរកមធ្យោបាយបញ្ចៀសនាងពីការវះកាត់ និងកំពុងឱ្យនាងធ្វើចលនា និងប្រើថ្នាំជាមួយគ្រូជំនាញម្នាក់នៅក្នុងប្រទេសកម្ពុជា ដើម្បីកុំឱ្យការវះកាត់ធ្វើឱ្យប៉ះពាល់ដល់សមត្ថភាពផ្នែកជង្គង់របស់នាង។ សៀវម៉ីបញ្ជាក់ថា រហូតដល់ខែឧសភា ឆ្នាំ២០១៧ ទើបនាងមានការប្រកួតជាថ្មីម្ដងទៀត អ៊ីចឹងនាងមានឱកាសសម្រាកព្យាបាលជង្គង់នៅក្នុងរយៈពេលនេះ ។ ជាមួយនឹងការធ្វើទុក្ខជំងឺចាស់នេះហើយ ទើបនាងសម្រេចចិត្តពន្យារពេលភ្ជាប់ពាក្យដោយមិនទាន់កំណត់នៅឡើយ ។
ការទម្លាយរបស់នាងធ្វើឱ្យមានក្ដីបារម្ភពីស្រទាប់មហាជន ជាពិសេសក្នុងពេលដែលនាងស្រាប់តែទម្លាយឱ្យដឹងពីបញ្ហាមុខរបួស និងឈានដល់ការពន្យារពេលភ្ជាប់ពាក្យ ។ មានការលើកឡើងថា សមត្ថភាពប្រកួតរបស់ស៊ន សៀវម៉ី នឹងធ្លាក់ចុះដោយសារតែនាងមិនព្រមវះកាត់ឱ្យជាសះ១០០ភាគរយ ហើយបើនាងសុខចិត្តទទួលយកការវះកាត់តើនឹងមានការប៉ះពាល់ដល់ការប្រកួតរបស់នាង ឬយ៉ាងណា? ក្នុងនោះក៏មានការបារម្ភជុំវិញស្នេហារបស់នាងផងដែរ ដោយសារតែនាងទើបនឹងប្រកាសថាភ្ជាប់ពាក្យធ្វើឱ្យមាន ការចាប់អារម្មណ៍ស្រាប់តែត្រូវលុបចោលទៅវិញកណ្ដាលទី បណ្ដាលឱ្យមានការប៉ាន់ស្មានថា គូស្នេហ៍របស់នាងទំនងជាអន់ចិត្ត ។ យ៉ាងណាមិញ កីឡាការិនីរូបនេះបានអះអាងថា ផ្លូវចិត្តរបស់នាងអត់មានបញ្ហាជាមួយគូស្នេហ៍នោះទេ ដោយគូស្នេហ៍របស់នាងបានទាំងបើកចិត្តទូលាយទទួលយកការពន្យារពេលភ្ជាប់ពាក្យរបស់នាងនោះផង ។
នាងនិយាយថា៖ «ខ្ញុំឥឡូវអត់មានគិតរឿងភ្ជាប់ពាក្យ ឬរៀបការអីទេ ដោយសារតែជង្គង់របស់ខ្ញុំស្រាប់តែឈឺ!» ។ នាងថា បុរសដែលនាងស្រឡាញ់អត់មានសតិអារម្មណ៍ដោយសារតែនាងលើកពាក្យភ្ជាប់ពាក្យនោះទេ ។ ផ្ទុយទៅវិញគឺមានតែអាណិត និងយល់ថា នាងគួរតែបានសម្រាកព្យាបាលជង្គង់ឱ្យបានល្អសិន ចាំគិតរឿងអនាគត ។ ស៊ន សៀមម៉ី បញ្ជាក់ថា រវាង នាង និងបុរសឈ្មោះ ណាយ មានទំនាក់ទំនងគ្នាមិនក្រោម៣ឆ្នាំទេក្នុងនាមសង្សារ ហើយក៏ស្គាល់ចិត្តបុរសម្នាក់នេះច្បាស់លាស់ណាស់ដែរ ទើបសម្រេចចិត្តពន្យារភ្ជាប់ពាក្យ ដើម្បីទុកពេលមើលជង្គង់ និងបន្តការប្រកួតដែលនាងស្រឡាញ់ពេញចិត្តនោះសិន ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
