ខេត្តកំពង់ស្ពឺ ៖ បុរសម្នាក់ដែលស្នាក់នៅក្នុងវត្ត និងបក្សពួកម្នាក់ទៀតត្រូវបានសមត្ថកិច្ចឃាត់ខ្លួន ពីបទសង្ស័យថាលួចលុយ ព្រះចៅអធិការវត្តអស់ជាច្រើនលានរៀល ។ ការឃាត់ខ្លួននេះ ធ្វើឡើងកាលពីវេលាម៉ោង ១២និង៣០នាទីថ្ងៃត្រង់ ថ្ងៃទី២៦ ខែតុលា ឆ្នាំ២០១៦ នៅក្នុងវត្តចំបក់ ស្ថិតនៅភូមិចំបក់ ឃុំវល្លិ៍ស ស្រុកសំរោងទង ខេត្តកំពង់ស្ពឺ ។
សង្ស័យ២នាក់ ដែលត្រូវចាប់ខ្លួន ម្នាក់ឈ្មោះ សឿង ពុទ្ធី ភេទប្រុស អាយុ២១ឆ្នាំ ស្រុកកំណើតភូមិ ថ្នល់កែង ឃុំក្បាលទឹក ស្រុកទឹកផុស ខេត្តកំពង់ឆ្នាំង ស្នាក់នៅក្នុងវត្តជាមួយលោក និងម្នាក់ទៀតឈ្មោះ យ៉ង់ ផល្លី ភេទស្រី អាយុ៣៧ឆ្នាំ ស្រុកកំណើត និងស្នាក់នៅផ្ទះជួលក្នុងភូមិកំណប់ ឃុំស្វាយក្រវ៉ាន់ ស្រុកសំរោងទង ខេត្តកំពង់ស្ពឺ ។
លោកអនុសេនីយ៍ឯក ម៉ិច សុភាន់ អធិការរងនគរបាលស្រុកសំរោងទង បានឲ្យដឹងថា ក្រោយពីទទួលសេចក្តីរាយការណ៍ អំពីករណីចោរលួចលុយ ព្រះចៅអធិការវត្តថាបាត់លុយអស់ជាច្រើន លានរៀលរួចមក លោកអអិការបាន ដឹកនាំកម្លាំងចុះធ្វើការស្រាវជ្រាវរហូតឃាត់ បានមុខសញ្ញាគួរឲ្យ សង្ស័យម្នាក់ឈ្មោះ សឿង ពុទ្ធី ភេទប្រុស។ បន្ទាប់ពីឃាត់បានម្នាក់ហើយ សមត្ថកិច្ចរបស់លោកបានបន្ត ទៅឃាត់ខ្លួនបានម្នាក់ទៀត ឈ្មោះ យ៉ង់ ផល្លី ភេទស្រី ។
ព្រះតេជគុណ សាយ សារុន ចៅអធិការវត្តចំបក់ មានសង្ឃដីការថា លុយដែលក្រុមជនសង្ស័យលួយរួមមាន លុយដុល្លារចំនួន ៧០០ដុល្លារ និងលុយខ្មែរចំនួន៩.៥០០.០០០រៀល (ប្រាំបួនលានហាសិបម៉ឺនរៀលគត់) ដែលលុយទាំងអស់ជាលុយដែលព្រះអង្គខិតខំសន្សំទុក ជាយូរមកហើយមិនដែល ហា៑នចាយវាយនោះទេ សុខចិត្តសន្សំទុកសម្រាប់កសាងវត្ត មិនគួរណាពួកគេ ប្រព្រឹត្តបែបនេះសោះ ។
បន្ទាប់ពីឃាត់ខ្លួន សមត្ថកិច្ចជំនាញបាននាំខ្លួន ជនសង្ស័យជាបក្សពួកទៅធើ្វការឆែកឆេនៅផ្ទះជួលខាងលើ ក្នុងនោះសមត្ថកិច្ចរកឃើញ លុយខ្មែរចំនួន៥១២.១០០រៀល (ហាសិបមួយម៉ឺនពីរពាន់មួយរយរៀលគត់) ។ លុយដែលដកហូតបាន សមត្ថកិច្ចបានប្រគេនជូន ចៅអធិការវត្តវិញទាំងអស់ ។ ហើយពេលនេះជនសង្ស័យទាំង២នាក់ កំពុងត្រូវបានសមត្ថកិច្ចជំនាញ ធ្វើការសាកសួររកលុយ ដែលបាត់បង់ទៅ ។
ក្រុមក្មេងៗ ដែលរស់នៅក្នុងវត្ត ជាមួយជនសង្ស័យម្នាក់ៗ បានលាន់មាត់ថា មិនគួរណាគេធ្វើបែបនេះសោះ រស់នៅជ្រកក្រោមម្លប់ព្រះពុទ្ធ ហើយនៅតែមិនស្គាល់បុណ្យបាបអីមែន នេះបានចំជានរកទាំងរស់មែន ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]