ចិន៖ សារព័ត៌មានសៀងហៃ ចេញផ្សាយកាលពីថ្ងៃពុធ ទី២៦ ឆ្នាំ២០១៦ បានឲ្យដឹងថា រូបភាពប៉ុន្មានសន្លឹក របស់លោតាចំណាស់ម្នាក់ បានអៀវភរិយារបស់គាត់ ដើរឆ្លងកាត់ផ្លូវដ៏សែនមមាញឹកមួយកន្លែង ក្នុងទីក្រុងប៉េកាំង ប្រទេសចិន កំពុងតែទទួលបានការចាប់អារម្មណ៍ និងរំជួលចិត្តយ៉ាងខ្លាំង ពីសំណាក់អ្នកនិយមលេងបណ្តាញសង្គមជាច្រើន។

តាមរយៈរូបភាព ដែលត្រូវបានថតឡើង និងបង្ហោះចែកចាយនៅលើ បណ្តាញទំនាក់ទំនងសង្គម គេឃើញលោកយាយចំណាស់ម្នាក់ ទំនងជាជើងរបស់គាត់ឈឺមិនអាចដើរបាន ទើបលោកតាជាស្វាមី ចូលខ្លួនមកលើកអៀវដាក់លើខ្នងមុនពេលដើរឆ្លងផ្លូវ។

អ្នកនិយមលេងបណ្តាញសង្គមមួយចំនួន បានធ្វើការបញ្ចេញមតិថា៖ «សេចក្តីស្រលាញ់របស់ពួកគាត់ គឺពិតជាធំធេង និងមិនអាចកាត់ថ្លៃបានឡើយ។ ហើយវាគឺពិតជាត្រូវចំណាយពេលដ៏យូរបំផុត ក្នុងការកសាងក្តីស្នេហ៍មួយនេះ ប្រៀបបីដូចជាភ្នំមួយអ៊ីចឹង»

រីឯអ្នកផ្សេងក៏បានបញ្ចេញមតិដែរថា «នៅពេលដែលខ្ញុំចាស់ទៅ ខ្ញុំសង្ឃឹមថា ខ្ញុំនឹងអាចមានមនុស្សម្នាក់ ដែលផ្តល់ក្តីស្រលាញ់ ចំពោះខ្ញុំខ្លាំងៗបែបនេះ ដូចពួកគាត់ទៅចុះ» ៕

តើសម្រាប់ប្រិយមិត្តវិញយល់យ៉ាងណាដែរ? 

ប្រភព៖ Shanghaiist

កំណត់ហេតុខ្មែរឡូត៖

គួររំលឹកព័ត៌មានចាស់ដែរថា ដោយឡែករឿងរ៉ាវមួយវិញទៀត ជួលចិត្ត! ស្វាមីចំណាយពេល ដាំផ្កាជុំវិញគេហដ្ឋាន ដើម្បីឲ្យប្រពន្ធពិការភ្នែក បានស្រង់ក្លិន។

លោក និង​លោកស្រី Kuroki បានរៀបការ ឆ្នាំ១៩៥៦ បង្កើតបានកូនពីរនាក់ រួមរស់ក្រោមដំបូលសុភមង្គល ដ៏សុខសាន្តមួយ។ បន្ទាប់ពីឆ្លងកាត់ភាពនឿយហត់ ក្នុងជីវិតការងារកន្លងមក អ្នកទាំងពីរក៏បានសម្រាក និងចាប់ផ្តើមគម្រោងជីវិតថ្មី ក្នងដំណើរកម្សាន្តជុំវិញប្រទេសជប៉ុន។

ជាអកុសល ក្រោយរៀបការបាន ៣០ឆ្នាំ អ្នកស្រី Kuroki បានធ្លាក់ខ្លួនឈឺ បណ្តាលឲ្យពិការភ្នែកមើលលែងឃើញ ត្រឹមរយៈពេលត្រឹមមួយសប្តាហ៍ប៉ុណ្ណោះ ព្រោះគាត់មានជម្ងឺ សម្ពាធសសៃឈាមខួរក្បាល។​ ហេតុដូចនេះហើយ អ្នកស្រីហាក់ត្រូវបានផ្តាច់ខ្លួនឆ្ងាយ ពីអ្វីនៅជុំវិញខ្លួនគាត់បន្តិចម្តង ពីមួយថ្ងៃទៅមួយថ្ងៃ។

ដោយឃើញដូចនេះ លោក Kuroki ជាស្វាមី ក៏ចាប់ផ្តើមមានគំនិត ចង់ធ្វើអ្វីមួយជូនភរិយា ដើម្បីឲ្យនាងបានស្រស់ស្រាយ និងបាត់ភាពអផ្សុកផងដែរ។ លោកបានចំណាយពេល ជាង២ឆ្នាំ ដាំផ្កា Shibazakura ពណ៌ផ្កាឈូក នៅពាសពេញ និងជុំវិញគេហដ្ឋានរបស់ពួកគាត់ ដើម្បីវាបានផ្តល់ក្លិនពិដោរដ៏ក្រអូប ជូនភរិយា ក៏ដូចជាដើម្បីទាក់ទាញ ញាតិជិតខាង និងបងប្អូនបានមកទស្សនាគេហដ្ឋាន របស់ពួកគាត់គ្រប់ពេល ហាក់ដូចជាពួកគេបាន កំដរភរិយារបស់គាត់ បំបាត់ភាពអផ្សុកផងដែរ។

ក្រោយមកដោយសម្រស់ផ្កា នៅក្នុងសួនដ៏ធំសម្បើមនោះ ចាប់ផ្តើមរីកស្គុះស្គាយ និងមានពិដោរក្រអូបពេញតំបន់ វាមិនមែនទាក់ទាញត្រឹមចំណាប់អារម្មណ៍ ពីសាច់ញាតិនិងអ្នកជិតខាងប៉ុណ្ណោះទេ តែវាក៏បានទាក់ទាញភ្ញៀវទេសចរមកពីគ្រប់ទិសទី ចូលមកទស្សនា សួនផ្កាជុំវិញគេហដ្ឋានរបស់គាត់ រហូតដល់ខ្ទង់៧,០០០នាក់ ក្នុងមួយថ្ងៃឯណោះនៅក្នុងរដូវផ្ការីក។

បច្ចុប្បន្ន លោក និងលោកស្រី Kuroki បាននិងកំពុងសោយសុខ នឹងជីវិតវ័យចំណាស់របស់ពួកគាត់ ហើយពួកគាត់អាចកាន់ដៃគ្នាដើរលេង នៅក្នុងសួនច្បារជុំវិញផ្ទះរបស់ខ្លួន ជារៀងរាល់ថ្ងៃផងដែរ៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]