ចិន៖ តេឡេស្កុបយក្ស និងប្រព័ន្ធផ្លូវរថភ្លើងអាកាស Cloud Rail លឿនបំផុតក្នុងលោក សម្ពោធមិនទាន់បានប៉ុន្មានផង ពេលថ្មីៗនេះប្រទេសចិនសម្រេចបាន ស្ពានខ្សែកាបច្រើនបំផុតលើលោក មួយទៀតទៅហើយ។ នេះបើតាមការផ្សាយរបស់សារព័ត៌មានដេលីម៉ែល កាលពីថ្ងៃទី២៥ ខែតុលាម្សិលមិញ។
ដោយសារតែភាពរីកចម្រើននៃហេដ្ឋារចនាសម្ព័ន្ធនានា ចិនត្រូវបានគេមើលឃើញថា ជាប្រទេសដែលសម្រេចបានសំណង់ធំៗជាច្រើនជាងគេបំផុត នាពេលបច្ចុប្បននេះ។
ប្រភពព័ត៌មានបានឲ្យដឹងថា ស្ពានខ្សែកាបច្រើនបំផុតថ្មី ដែលនឹងបញ្ចប់ការសាងសង់ ហើយដាក់ឲ្យដំណើរការនៅថ្ងៃសុក្រ ទី២៨ ខែតុលា ខាងមុខនេះ មានឈ្មោះថា Chishi ស្ថិតនៅក្នុងទីក្រុង Chishi ខេត្ត Henan ប្រទេសចិន។ វាត្រូវបានសាងសង់ឡើងដោយចំណាយប្រាក់អស់ចំនួន ១.៣ពាន់លានយ័ន (១៩០លានដុល្លារអាមេរិក) និងចំណាយពេលសាងសង់ចំនួន ៦ឆ្នាំ។
ស្ពាន Chishi នេះសាងសង់ឡើង ដើម្បីតភ្ជាប់ផ្លូវជាតិរវាង Xiamen និង Chendu ដែលមានប្រវែង១,៥០០ម៉ែត្រ និងកម្ពស់ជាង ២៦៩ម៉ែត្រ ដោយសាងសង់កាត់ភ្នំនៅតំបន់នោះ។ វាត្រូវបានបើកការដ្ឋានសាងសង់កាលពីខែមីនា ឆ្នាំ២០១០ និងគ្រោងបើកឲ្យប្រើប្រាស់ជាផ្លូវការនៅក្នុងឆ្នាំ២០១៤ ប៉ុន្តែត្រូវបានពន្យាពេលវិញ ដោយសារមានគ្រោះថ្នាក់មួយចំនួនកើតឡើង អំឡុងពេលសាងសង់។
គួររំឮកថា មួយរយៈពេលចុងក្រោយនេះ ចិនតែងតែបង្ហាញនូវសមិទ្ធផលថ្មីៗជាច្រើនរបស់ខ្លួន ដូចជាស្ពានកញ្ចក់ដ៏វែង និងខ្ពស់ជាងគេបំផុតលើពិភពលោក ដែលមានទីតាំងស្ថិតនៅឯតំបន់ទេសចរណ៍ឧទ្យានជាតិនៃទីក្រុង Zhanjiajie ភាគខាងជើងខេត្តហួណាន បានបើកជាផ្លូវការ កាលពីថ្ងៃទី២០ ខែសីហា ឆ្នាំ២០១៦។ ខណៈតេឡេស្កុបយក្សធំជាងគេរបស់ពិភពលោក មានទីតាំងនៅភាគនិរតីប្រទេសចិន បានបើកដំណើរការកាលពីថ្ងៃទី២៥ កញ្ញា ២០១៦ ផងដែរ។ ហើយសមិទ្ធផលថ្មីបំផុតមួយទៀតនោះគឺ ប្រព័ន្ធផ្លូវរថភ្លើងអាកាស Cloud Rail លឿនបំផុតក្នុងលោក ដែលទើបតែបើកដំណើរការកាលពីពេលថ្មីៗកន្លងទៅនេះដែរ៕
ប្រភព៖ Dailymail
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]